Read Tungag ПАВЛИНИН КИЙАДЫ РОМАЛЫЛАРА 3 Bible Online

ПАВЛИНИН КИЙАДЫ РОМАЛЫЛАРА 3 - Tungag bible

ПАВЛИНИН КИЙАДЫ РОМАЛЫЛАРА 3

¹Ӧлӓ ки, иудейлердӓ не ӱстӱннӱк вар? Не файда кесикликтӓн?

²Хер тарафтан чок файда вар. Илкин, иудейлерин елинӓ Аллахын сӧзлери верилди.

³Не дейеӂез, еер оннардан кимиси инанчсыз олдуйса, оннарын инанчсызлыы вар мы ниӂӓ йок етсин Аллахын инанчлыыны?

⁴Олмаз! Еер хепси инсаннар йаланӂы да олса, Аллах доору калэр, ниӂӓ йазылы: «Сӧзӱндӓ доору чыкэрсын хем даавада даавайы казанэрсын».

⁵Еер бизим хаксызлык таа ачык Аллахын доорулууну йапарсайды, не дейеӂез? Аллах доору йапмээр мы, ачан бизи ӂезалээр? Дӱшӱнерим адамӂасына.

⁶Олмаз! Ӧлӓ олурса, ниӂӓ Аллах бу дӱннейи даава едӓбилир?

⁷Еер Аллахын аслылыы беним йаланымнан Онун метинниини таа ии ачарсайды, озаман нечин бӓн гӱнахкер гиби даава олайым?

⁸Нечин демейелим «Кӧтӱлӱк йапалым, ки бундан иилик чыксын»? Кимиси бизи кӧтӱлеер хем сӧлеер, ани биз ӧлӓ деериз. Оннар, ниӂӓ дӱшер, даавалы олаӂэклар.

⁹Ӧлейсӓ, не дейеӂез? Биз иудейлӓр таа ӱстӱнӱз башка миллетлердӓн ми? Елбетки диилиз. Зерӓ биз ӧнӂӓ гӧстердик, ки хепси — иудейлӓр дӓ, урумнар да — гӱнахын запында.

¹⁰Ниӂӓ йазылы: «Доору кимсей йок, бир киши билӓ йоктур.

¹¹Аннайан кимсей йок, Аллахы аарайан кимсей йок.

¹²Хепси йолдан саптылар, хепси файдасыз олдулар. Иилик йапан йок, бир киши билӓ йоктур».

¹³«Аазлары — ачык мезардыр, диллери йалан сӧлеер». «Дудакларынын алтында йылан зихири вар».

¹⁴«Аазлары бетвайлан хем аӂы лафларлан долу».

¹⁵«Айаклары кан дӧкмӓӓ алатлээр,

¹⁶кайыплык хем зеет йолларында.

¹⁷Селемет йолуну оннар билмеерлӓр».

¹⁸«Аклыларына Аллахтан корку гелмеер».

¹⁹Ама биз билериз, не сӧленер Айоз Законда, сӧленер оннара, ким Законун запында, ӧлӓ ки хербир ааз капансын, да бӱтӱн дӱннӓ Аллахын ӧнӱндӓ кабаатлы калсын.

²⁰Зерӓ Закону таманнамаклан Аллахын ӧнӱндӓ кимсей доору чыкмайаӂэк, зерӓ Закондан белли олэр, ани инсан гӱнахкер.

²¹Шинди ачылды, ани Аллах, бакмайарак Закона, инсаны доору сайэр. Бунун ичин Закон хем пророклар шаатлык еттилӓр.

²²Аллах хепсини инанӂылары доору сайэр инаннарыннан Иисус Христоза. Чӱнкӱ айырмак йоктур.

²³Хепси гӱнаха дӱштӱлӓр, Аллахын метинниинӓ етишӓмедилӓр.

²⁴Хепси ӧдексиз доору сайылэрлар Аллахын иивергисиннӓн, зерӓ оннары Иисус Христос куртарды.

²⁵Аллах Христозу курбан йапты, ани инаннан кабледилир, ки гӱнахлар Онун каныннан афедилсин. Бунуннан Аллах гӧстерди, ниӂӓ инсаны доору сайэр, зерӓ ӧнӂӓ йапылмыш гӱнахлары ӂезасыз бракты.

²⁶Аллах дайанды, о бетерӓ, ки гӧстерсин, ниӂӓ доору сайэр бӱӱнкӱ вакытта инсаны. Бутӱрлӱ О хем Кенди доорулууну коруйэр, хем хепсини доору сайэр, ким Иисуса инанэр.

²⁷Шинди бизӓ не калды, ӱӱнелим? Йок нейлӓн ӱӱнелим. Бунун себеби недир? Закону таманнамаклан мы доору сайылэрыз? Диил, ама салт инаннан.

²⁸Зерӓ биз инанэрыз, ани инсан доору сайылэр инаннан, ама диил Закону таманнамаклан.

²⁹Аллах не, салт иудейлерин Аллахы мы, диил ми башка миллетлерин дӓ? Елбетки, башка миллетлерин дӓ.

³⁰Чӱнкӱ Аллах бирдир, Ангысы кесикли оланнары да, кесиксиз оланнары да инаннан доору сайэр.

³¹Ӧлейсӓ, не, инаннан Айоз Закону куветсиз ми йапэрыз? Олмаз! Ама инаннан Закону каавилеериз.