Read Tungag ПАВЛИНИН КИЙАДЫ РОМАЛЫЛАРА 9 Bible Online

ПАВЛИНИН КИЙАДЫ РОМАЛЫЛАРА 9 - Tungag bible

ПАВЛИНИН КИЙАДЫ РОМАЛЫЛАРА 9

¹Доору сӧлеерим, йалан сӧлӓмеерим, зерӓ бӓн Христоза инанэрым. Ичйанкы дуйгуларым да, Айоз Духлан заплы, дооруклээр буну, не сӧлеерим.

²Чок кахырланэрым хем хожма ӱреемдӓ зеетленерим.

³Бӓн кендим кайылым, бетваланып, айырылайым Христоздан беним кардашларым ичин, беним сенселӓм ичин.

⁴Оннар — израилли. Аллах оннары оол йапты, метинниини гӧстерди, баалантылар йапты, Айоз Закону верди, гӧстерди, нетӱрлӱ Она баш иилтмӓӓ, хем оннара адамаклар верди.

⁵Оннардан патриархлар [3] гелди хем оннардан гӱӱдейӂесинӓ Христос гелди, Ангысы хепсиндӓн таа ӱстӱн хем дивеӂинӓ метинненмиш Аллахтыр. Амин.

⁶Демеерим, ани Аллах сӧзӱнӱ тутмады, зерӓ диил оннар, ким дууду Израилдӓн, хепси хакына Израил.

⁷Диил хепси оннар, ким Авраамын сенселесиндӓн, онун ушаклары, ама ниӂӓ денди: «Исаактан дууаӂэк оннар, ким сайылаӂэк сенин сенселӓн».

⁸Бундан аннашылэр, ани Аллахын ушаклары диил оннар, ким дууэр гӱӱдейӂесинӓ Авраамдан. Ама Авраамын сенселеси сайылаӂэк оннар, ким дууэр Аллахын адамасына гӧрӓ.

⁹Зерӓ о адамакта денди бутӱрлӱ лафлар: «Гелӓн йыла бу вакыт, ачан дӧнеӂӓм, Саррада бир оол олаӂэк».

¹⁰Диил саде бу, ама хеп ӧлӓ олду Ревеккайлан да, ачан о гебӓ калды икиз ооллан бизим бобадан, Исаактан.

¹¹[11-12] Бу икиз оол таа дуумадыйнан да не ии, не кӧтӱ йапмадыйнан, Ревеккайа сӧленди: «Бӱӱк оолун кӱчӱк оолуна измет едеӂек», ки оннардан бирини сечӓркӓн Аллахын курулмушу оннарын йаптыкларындан тутунмасын, ама Кенди Аллахын чаармасындан,

¹³ниӂӓ йазылы: «Иакову севдим, ама Есавдан азетмедим».

¹⁴Шинди не дейеӂез? Аллахта йок му доорулук? Олмаз!

¹⁵Зерӓ Моисейӓ деди: «Кимӓ дӱшер аӂымаа, аӂыйаӂам; кими дӱшер кыймамаа, кыймайаӂам».

¹⁶Ӧлӓ ки, сечилмӓк тутунмээр не ондан, ким истеер, не дӓ ондан, ким чалышэр, ама Аллахтан, Ким аӂыйэр.

¹⁷Зерӓ Айоз Йазыда Аллах деер фараона: «Сени маасуз калдырдым, ки сениннӓн гӧстерейим Кенди куведими, да Беним адым бӱтӱн ер ӱстӱндӓ анылсын».

¹⁸Ӧлӓ ки, Аллах аӂыйэр, кими истеер, хем инатлаштырэр, кими истеер.

¹⁹Беки сӓн бана сораӂан: «Озаман нечин кабаатландырэр? Ким вар ниӂӓ каршы дурсун Онун истедиинӓ?»

²⁰Ӧлӓ, ама кимсин сӓн, бей адам, ки бӧлӓ сормаклар Аллаха койасын? Аӂаба бир кап сорар мы ону йапан устайа: «Нечин бени бӧлӓ йаптын?»

²¹Чӧлмекчи диил ми чорбаӂы чамурун ӱстӱнӓ? Хеп о чамурдан йапэр бир кап маасуз икрам ичин, ама башка кабы йапэр сырадан ишлӓр ичин.

²²Да не дейеӂез, еер Аллах, гӧстерсин дейни Кенди ӱфкесини хем билдирсин Кенди куведини, чок сабурлуклан дайанды о каплара, ангыларыны ӱфкесиннӓн хазырлады, ки йок едилсиннӓр?

²³Да не дейеӂез, еер буну йаптысайды, ки билдирсин Кенди болдан метинниини о каплара, ангыларыны аӂыды хем хазырлады, ки каблетсиннӓр метинник?

²⁴О каплар бизиз, ангыларыны Аллах чаарды диил саде иудейлердӓн, ама башка миллетлердӓн дӓ.

²⁵Ниӂӓ Аллах деер пророк Хосеайлан: «Дейеӂӓм „Беним инсаным“ оннара, ким диилди Беним инсаным. Дейеӂӓм „Беним севгилим“ оннара, ким диилди севгили.

²⁶Хем ниӂӓ орада денер: Сиз диилсиниз Беним инсаным, оннара денеӂек дири Аллахын ооллары».

²⁷Исайа баарып хаберлеер Израил ичин: «Еер Израил оолларынын сайысы олурсайды, ниӂӓ кум дениздӓ, анӂак азы куртулаӂэк.

²⁸Зерӓ Сааби хич ойаланмайарак, /доорулаа гӧрӓ/ таманнайаӂэк Кенди карарыны бу ердӓ».

²⁹Ниӂӓ Исайа ӧнӂӓ хаберледи: «Еер куветлерин Саабиси бракмайайды бизӓ бир сенселӓ, Содом гиби олаӂэйдык, Гоморрайа бензейеӂейдик».

³⁰Шинди не дейеӂез? Башка миллетлӓр, ани чалышмарды доору сайылмаа Аллахын ӧнӱндӓ, едендилӓр доорулук. Бу доорулук са инаннан еденилир.

³¹Ама Израил, ани аарарды закону, ангысыннан доору сайылсын, бутӱрлӱ закон буламады.

³²Нечин? Зерӓ бакмадылар доору сайылсыннар инаннан, ама сандылар, ки кенди йаптыкларыннан доору сайылаӂэклар. Онун ичин сӱрчтӱлӓр кӧстек ташына,

³³ниӂӓ вар йазылы: «Тӓ койэрым Сионда бир кӧстек ташы хем бир сӱрчмӓк кайасы, ама ким Она инанэр, утанмыш калмаз».