Read Tungag ПАВЛИНИН ИЛК КИЙАДЫ КОРИНФЛИЛЕРӒ 1 Bible Online

ПАВЛИНИН ИЛК КИЙАДЫ КОРИНФЛИЛЕРӒ 1 - Tungag bible

ПАВЛИНИН ИЛК КИЙАДЫ КОРИНФЛИЛЕРӒ 1

¹Бӓн, Павли, Иисус Христоздан чаарылмыш апостол олмаа Аллахын истедиинӓ гӧрӓ, хем кардаш Сосфен

²селӓм йоллээрыз сизӓ — Аллахын клисесинӓ Коринф касабасында, ангылар айозланмыш Иисус Христоздан хем чаарылмыш айоз олмаа — хем хепсинӓ, ким анэр бизим Саабимизин Иисус Христозун адыны херердӓ. О хем оннарын, хем бизим Сааби.

³Ииверги хем услулук сизӓ Аллахтан, бизим Бобадан, хем Сааби Иисус Христоздан.

⁴Херзаман шӱкӱр едерим беним Аллахыма сизин ичин хем Аллахын иивергиси ичин, ани верилди сизӓ Иисус Христозда.

⁵Зерӓ Ондан хербир ӱзерӓ зенгиннединиз, хертӱрлӱ сӧзлӓн хем билгийлӓн,

⁶чӱнкӱ шаатлыымыз Христос ичин кӧк салды сизин аранызда.

⁷Ӧлӓ ки, сиз геери калмээрсыныз хич бир баашышта, беклӓркӓн Иисус Христозун гелмесини.

⁸О каавилейеӂек сизи биткийӓ кадар, ки чыкасыныз кабаатсыз о гӱн, незаман бизим Сааби Иисус Христос гелеӂек.

⁹Аллах инанчтыр, Ангысы сизи чаарды, бирлик оласыныз Онун Оолуннан, бизим Сааби Иисус Христозлан.

¹⁰Йалварэрым, кардашлар, бизим Сааби Иисус Христозун адыннан, хепсиниз аннашын, да олмасын айырыклык аранызда. Олун бирликтӓ, бир нееттӓ хем бир дӱшӱнмектӓ.

¹¹Зерӓ хабер каблеттим Клоинин адамнарындан, ани аранызда олэр кавгалар.

¹²Не демӓк истеерим, сиздӓ деерлӓр: «Бӓн Павлининим!», «Бӓн Аполлосунум!», «Бӓн Кифаныным!» йада «Бӓн Христозунум!»

¹³Не, Христос бӧлӱндӱ мӱ? Павли ми сизин ичин ставроза герилди? Оса Павлинин адына мы ваатиз олдунуз?

¹⁴Шӱкӱр едерим Аллаха, ани кимсейи сиздӓн ваатиз етмедим, Крисптӓн хем Гайдан каарӓ,

¹⁵ки кимсей дейӓмесин, ани ваатиз олдунуз беним адыма.

¹⁶Доору, ани ваатиз еттим Стефанын да евдекилерини. Оннардан каарӓ, билмеерим, башка биркимсейи ваатиз еттим ми.

¹⁷Христос бени йоллады диил ваатиз едейим, ама насаат едейим Ии Хабери, диил аариф лафларлан, ки Христозун ставрозу аннамасыны кайбетмесин.

¹⁸Зерӓ насаат ставроз ичин акылсызлык сайылэр оннарда, ким булунэр кайыплык йолунда, ама бизим ичин, ким куртулмак йолунда, Аллахын куведийдир.

¹⁹Зерӓ йазылы: «Телеф едеӂӓм аарифлерин аарифлиини хем йок едеӂӓм фикирлилерин билгичлиини».

²⁰Нередӓ аарифлӓр? Нередӓ билгичлӓр? Нередӓ бу дӱннейин лаф усталары? Не, Аллах гӧстермеди ми, ани бу дӱннейин аарифлии бир акылсызлыктыр?

²¹Чӱнкӱ Аллахын аарифлиинӓ гӧрӓ бу дӱннӓ Аллахы кенди аарифлииннӓн танымады, Аллах кайыл олду, куртарсын инанӂылары акылсыз сайылан насаатлан.

²²Иудейлӓр истеерлӓр мераклы нышаннар, урумнар да аарээр аарифлик.

²³Ама биз насаат едериз Христозу, ани ставроза герилди. Бу иудейлӓр ичин бир кӧстектир, ама йабанӂы миллетлӓр ичин бир акылсызлык.

²⁴Чаарылмыш оланнар ичин сӓ, олсун иудей, олсун урум, Христос — Аллахын куведи хем аарифлии.

²⁵Зерӓ Аллахчасына акылсызлык таа аарифтир инсанӂасына аарифликтӓн, Аллахчасына йуфкалык таа каавийдир инсанӂасына куветтӓн.

²⁶Сӧзгелиши, кардашлар, дӱшӱнӱн, несой инсаннардыныз сиз, ачан Аллах чаарды сизи. Инсан аннамасына гӧрӓ чойунуз аариф диилдиниз, чойунуз каави диилдиниз, чойунуз бӱӱк бойдан диилдиниз.

²⁷Ама Аллах айырды, не дӱннӓ акылсызлык сайэр, ки аарифлери утандырсын. Аллах айырды, не дӱннӓ йуфка сайэр, ки каавилери утандырсын.

²⁸Аллах айырды, не дӱннедӓ паасыз хем сайгысыз. Оннары, кими инсан бишейӓ саймээр, ки йоклаа индирсин бӱӱк оланнары,

²⁹ки кимсей ӱӱнӓмесин Аллахын ӧнӱндӓ.

³⁰Ама Аллах йапты инанӂы оласыныз Иисус Христоза. Онда, Ким олду бизим ичин Аллахтан аарифлик, доорулук, айозлук хем куртулмак.

³¹Ӧлӓ ки, ниӂӓ йазылы, «Ким ӱӱнер, ӱӱнсӱн Саабийлӓн».