Read Tungag ПАВЛИНИН ИЛК КИЙАДЫ КОРИНФЛИЛЕРӒ 14 Bible Online

ПАВЛИНИН ИЛК КИЙАДЫ КОРИНФЛИЛЕРӒ 14 - Tungag bible

ПАВЛИНИН ИЛК КИЙАДЫ КОРИНФЛИЛЕРӒ 14

¹Севгинин ардына гидин, ама чалышын духча баашышлары еденмӓӓ, ен чок пророклук етмӓӓ.

²Ким лафедер башка дилдӓ, лафетмеер инсана, ама Аллаха, зерӓ кимсей ону аннамээр. О духлан саклы ишлӓр лафедер.

³Ама ким пророклук едер, о лафедер, ки инсаны каавилесин, хавезлендирсин хем хошландырсын.

⁴Ким лафедер башка дилдӓ, кендини каавилеер, ама ким пророклук едер, каавилеер клисейи.

⁵Истеерим, хепсиниз лафедӓсиниз башка диллердӓ, ама таа чок истеерим, пророклук едӓсиниз. Ким пророклук едер, о таа бӱӱк, некадар бири, ким лафедер башка дилдӓ, еер бу дили чевирмӓрсейди, клисейи каавилендирсин дейни.

⁶Шинди, кардашлар, еер, гелип сизӓ, башларсайдым лафетмӓӓ башка дилдӓ, ама лафым йапмарсайды, ки еденӓсиниз Аллахтан ачыкламак, билги, пророклук йада бир ӱӱретмӓк, не файда сизӓ гетиреӂӓм?

⁷ӂансыз ишлӓр дӓ, ангылары сес верерлӓр, чыртма йада арфа, еер вермӓрсейди айыры сеслӓр, ким таныйабилир, не хава чалынэр бу чыртмайлан йада арфайлан?

⁸Еер труба беллисиз бир сес верӓрсӓ, ким ӂенк ичин хазырланар?

⁹Хеп ӧлӓ сиз дӓ, еер дилинизлӓн аннашылмаз лафлар сӧлӓрсейдиниз, насыл аннашылар, не сӧлеерсиниз? Сиз озаман сансын лӱзгерӓ лафедерсиниз!

¹⁰Доору, ани дӱннедӓ чок тӱрлӱ дил вар. Хич бир дил аннамасыз диилдир.

¹¹Ама еер билмӓрсейдим лафларын аннамасыны, бӓн йабанӂыйым лафеденӓ, лафедӓн дӓ бана йабанӂы.

¹²Хеп ӧлӓ сиз дӓ, чӱнкӱ чалышкансыныз еденмӓӓ Духун баашышларыны, чалышын зееделенмӓӓ баашышларлан, ани клисейи каавилеер.

¹³Онуштан, ким лафедер башка дилдӓ, дуа етсин, ки чевирӓбилсин, не лафедер.

¹⁴Зерӓ, ачан дуа едерим башка дилдӓ, беним духум дуа едер, ама фикирим файда еденмеер.

¹⁵Озаман не йапайым? Дуа едейим духлан, дуа едейим аклымнан да; тӱркӱ чалайым духлан, тӱркӱ чалайым аклымнан да.

¹⁶Еер сӓн шӱкӱр едӓрсейдин саде духлан, сырадан адам, орада булунан, насыл «Амин» дейӓбилир сенин шӱкӱр етменӓ? Зерӓ о аннамады, не сӧледин.

¹⁷Беки сӓн ии шӱкӱр едерсин, ама бу шӱкӱр о адама йардым етмеер.

¹⁸Шӱкӱр едерим Аллаха, ани бӓн таа чок лафедерим башка диллердӓ, некадар сиз хепсиниз.

¹⁹Ама клиседӓ таа чок истеерим сӧлейим беш лаф беним аклымнан, ки башкаларыны да ӱӱредӓбилейим, некадар сӧлейим он бин лаф башка дилдӓ.

²⁰Кардашлар, фикирлӓн ушак гиби олмайын, кӧтӱлӓӓ кӱчӱк евлат гиби олун, ама фикирлӓн олун олгун адам.

²¹Айоз Законда йазылы: «„Лафедеӂӓм бу халка йабанӂы диллӓрлӓн хем йабанӂыларын аазындан, ама хеп окадар Бени сеслӓмейеӂеклӓр“, — деер Сааби».

²²Белли, ки башка дилдӓ лафетмӓӓ диил нышан инанӂылар ичин, ама инансызлар ичин. Пророклук са нышан инанӂылар ичин, ама диил инансызлар ичин.

²³Еер топланарсайды бӱтӱн клисӓ бирери, да херкези башларсайды башка диллердӓ лафетмӓӓ, ама бир сырадан инсан йада инансыз адам гелирсейди топлантыныза, демейеӂеклӓр ми, ани сиз делийсиниз?

²⁴Ама пророклук едӓрсейди хепси, да гелӓрсейди бир инансыз, йада сырадан бир инсан, о хепсиндӓн азарланыр хем хепсиндӓн даавалы олур.

²⁵Ӧлӓ ки, онун ӱреендеки саклы ишлери белли олэр, о, дӱшӱп ӱзӱкойну, баш иилдеӂек Аллаха хем дейеӂек, ани хакына Аллах араныздадыр.

²⁶Озаман не йапалым, кардашлар? Ачан бирери топланэрсыныз, херкезиниздӓ вар бир псалма, бир ӱӱретмӓк, бир ачыкламак, башка дилдӓ лафетмӓк еки диллери чевирмӓк. Хепси буннар олсун клисенин каавиленмеси ичин.

²⁷Еер биркимсей лафедӓрсӓ башка дилдӓ, лафетсиннӓр сыравардыр ики-ӱч киши, бириси дӓ чевирсин, не сӧленер.

²⁸Еер йоксайды ким чевирсин, башка дилдӓ лафедӓн суссун клиседӓ, кенди-кендинӓ хем Аллаха лафетсин.

²⁹Пророклардан лафетсин ики-ӱч киши, каланы да аараштырсын, не сӧленер.

³⁰Еер Аллахтан бир ачыкламак гелӓрсейди отураннардан ӧбӱрӱнӓ, илкинкиси суссун.

³¹Хепсиниз вар насыл бири-биринин ардына пророклук едӓсиниз, ки хепси ӱӱренип, хепси ӱрекленсиннӓр.

³²Пророкларын духлары пророкларын запындадыр.

³³Зерӓ Аллах диил сырасызлык Аллахы, ама услулук Аллахы. Бу сыра кулланылэр Аллахын айоз халкынын хербир клисесиндӓ.

³⁴/Сизин/ карылар клисӓ топлантыларында суссуннар, зерӓ оннара изин верилмӓр, лафетсиннӓр, ама ниӂӓ йазылы законда, сеслейиӂи олсуннар.

³⁵Еер ӱӱренмӓӓ истӓрсейдилӓр бишей, евдӓ кенди коӂаларына сорсуннар, зерӓ утанчтыр, ки кары лафетсин клисӓ топлантысында. [8]

³⁶Не, Аллахын сӧзӱ илк сиздӓн, коринфлилердӓн ми чыкты йада салт сизӓ ми етишти?

³⁷Еер биркимсей сайарсайды кендини пророк, Духтан кулланылы, озаман лӓӓзым аннасын, ани не йазэрым сизӓ, Саабинин сымарламасы.

³⁸Ама еер биркимсей буну есап алмарсайды, ону да есаба алмайын!

³⁹Ӧлӓ ки, кардашлар, чалышын пророклук етмӓӓ, ама оннары, ким башка диллердӓ лафедер, дургутмайын.

⁴⁰Салт ки хепси йакышыклы хем сырайа гӧрӓ уйгун йапылсын.