Read Tungag ПАВЛИНИН ИЛК КИЙАДЫ КОРИНФЛИЛЕРӒ 2 Bible Online

ПАВЛИНИН ИЛК КИЙАДЫ КОРИНФЛИЛЕРӒ 2 - Tungag bible

ПАВЛИНИН ИЛК КИЙАДЫ КОРИНФЛИЛЕРӒ 2

¹Ачан гелдим сизӓ, кардашлар, гелмедим, ки ачайым сизӓ бир саклы хабер [1] Аллахтан лаф усталыыннан хем ӱстӱн аарифликлӓн.

²Зерӓ карарладым, сиздӓ унудайым хепсини, Иисус Христоздан каарӓ, Ангысы герилди ставроза.

³Бӓн кендим сизин аранызда йуфкайдым, коркардым хем чок титирӓрдим!

⁴Не сӧледим хем насаат еттим, диилди инсанын аарифлииндӓ, инандырыӂы лафларында, ама куветтӓ, не Айоз Дух ачыклээр,

⁵ки сизин инаныныз темелленсин диил инсан аарифлиинӓ, ама Аллахын кувединӓ.

⁶Хеп окадар биз насаат едериз аарифлик олгун инанӂылар арасында, ама бу аарифлик диил шиндики заманын йада шиндики кулланыӂыларын аарифлии, ангылары гелип-гидерлӓр.

⁷Ама насаат едериз Аллахын аарифлиини — гизли, саклы тутулмуш аарифлии, ани Аллах дӱннейин курулмасындан ӧнӂӓ сыралады бизим метинниимиз ичин.

⁸О аарифлии кимсей танымады шиндики заманын кулланыӂыларындан. Еер таныйайдылар, ставроза гермейеӂейдилӓр метинни Саабийи.

⁹Ама ниӂӓ йазылы: «Не инсан гӧзӱ гӧрмеди, не инсан кулаа ишитмеди, хем не инсан ӱреенӓ дамнамады, ӧлӓ о ишлӓр, не Аллах хазырлады оннар ичин, ким Ону север».

¹⁰Бизӓ Аллах Кенди Духуннан ачыклады буну. Аллахын Духу хепсини аараштырэр, артык Аллахын деринниклерини дӓ.

¹¹Хакына, ким таныйабилир инсанын неетлерини, кенди духундан каарӓ, ани инсанда? Хеп ӧлӓ кимсей таныйамээр Аллахын неетлерини дӓ, Аллахын Духундан каарӓ.

¹²Биз каблетмедик дӱннӓ духуну, ама Духу, ани Аллахтан гелир, ки таныйалым о баашышлары, не Аллах верди бизӓ.

¹³Бунун ичин лафедериз диил сӧзлӓрлӓн ӱӱредилмӓ инсан аарифлииндӓн, ама ӱӱредилмӓ Духтан, ачыклайып духча ишлери оннара, кимдӓ Дух вар.

¹⁴Инсан, ани тендӓн кулланылмыш, каблетмеер Аллахын Духунун ишлерини, зерӓ буннар гӧрӱнер она бир акылсызлык гиби, да йок насыл аннасын, зерӓ буннары лӓӓзым аннамаа духча.

¹⁵Духтан кулланылмыш инсан са хепсини аннар, ама кендиси кимсейдӓн аннанылмамыш калэр.

¹⁶Зерӓ «ким вар насыл аннасын Саабинин дӱшӱнмесини да Она акыл верӓбилсин?» Ама биздӓ вар Христозун дӱшӱнмеси.