Read Tungag ПАВЛИНИН ИЛК КИЙАДЫ КОРИНФЛИЛЕРӒ 3 Bible Online

ПАВЛИНИН ИЛК КИЙАДЫ КОРИНФЛИЛЕРӒ 3 - Tungag bible

ПАВЛИНИН ИЛК КИЙАДЫ КОРИНФЛИЛЕРӒ 3

¹Кардашлар, бӓн йокту ниӂӓ лафедейим сизиннӓн ниӂӓ Духтан кулланылмышларлан. Лӓӓзым олду лафедейим ниӂӓ тендӓн кулланылмышларлан, ниӂӓ инсаннарлан, ангылары кӱчӱк евлат гиби Христозда.

²Дойурдум сизи сӱтлӓн. Вермедим сизӓ четин имӓк, зерӓ чиинейӓмейеӂейдиниз, шинди дӓ чиинейӓмеерсиниз,

³чӱнкӱ сиз таа тендӓн кулланылмышсыныз. Еер сизин аранызда варса кысканчлык хем кавга, /хем айырыклык/, бу гӧстермеер ми, ани тендӓн кулланылмышсыныз хем йашээрсыныз калан инсаннар гиби?

⁴Еер сиздӓн биркимсей дейӓрсӓ: «Бӓн Павлининим», башкасы да дейӓрсӓ: «Бӓн Аполлосунум», диилсиниз ми сиз дӱннӓ инсаннары гиби?

⁵Ким Павли? Ким Аполлос? Оннар изметкерлӓр, кимин йардымыннан сиз инандыныз. Сааби херкезинӓ кенди ишини верди.

⁶Бӓн ектим тоому, Аполлос йыслады, ама Аллах бӱӱттӱ.

⁷Ӧлӓ ки, ким екти хем ким дӓ йыслады — оннар бишей диил, ама Аллах, Ани бӱӱттӱ, О — ӂӱмнӓ.

⁸Ким екер хем ким йыслээр, оннарын бир сайгылары. Херкези кенди зааметинӓ гӧрӓ ӧдек кабледеӂек.

⁹Зерӓ биз — Аллахын ишчилери, ама сиз — Аллахын тарласы, Аллахын йапысы.

¹⁰Аллахын иивергисинӓ гӧрӓ, не бана верили, бӓн, ниӂӓ бир аариф уста, темели койдум, башкалары да бу темел ӱстӱнӓ йывды. Херкез лӓӓзым баксын, нетӱрлӱ йывэр.

¹¹Зерӓ кимсей йок насыл койсун башка бир темел, ондан каарӓ, не койулу, ангысы вар — Иисус Христос.

¹²Еер биркимсей йыварсайды бу темелин ӱстӱнӓ алтын, гӱмӱш, паалы таш, аач, саман, сааз, —

¹³херкезин иши белли олаӂэк, зерӓ даава гӱнӱндӓ ӱзӓ чыкаӂэк, чӱнкӱ атешлӓн ачыкланаӂэк. Атеш херкезин ишини денейеӂек, ким недӓн йывды, гӧстереӂек.

¹⁴Еер йапы, ани йывылы биркимсейдӓн темел ӱстӱнӓ, айакча каларсайды, о баашыш еденеӂек.

¹⁵Еер биркимсейин йапысы йанарсайды, о зарар гӧтӱреӂек. Кендиси куртулаӂэк, ама олаӂэк, сансын атеш ичиндӓн гечмиш.

¹⁶Билмеерсиниз ми, ани сиз Аллахын айоз бинасы, хем ани Аллахын Духу сиздӓ йашээр?

¹⁷Еер биркимсей йыкарса Аллахын айоз бинасыны, она Аллах бела вереӂек, зерӓ Аллахын бинасы айоздур. Сиз — о айоз бина.

¹⁸Кимсей кендини алдатмасын. Еер сиздӓн биркимсей сайарсайды кендини аариф бу заманда, о лӓӓзым «акылсыз» олсун, ки етишсин хакына аарифлӓӓ.

¹⁹Зерӓ бу дӱннейин аарифлии, Аллахын ӧнӱндӓ бир акылсызлык гиби. Ниӂӓ дӓ йазылы: «Аллах тутэр аарифлери оннарын шалвирликлериннӓн».

²⁰Хем таа: «Аллах билер, ани аарифлерин дӱшӱнмеклери бошунадыр».

²¹Онуштан кимсей ӱӱнмесин инсаннан, зерӓ хепси сизин.

²²Олсун Павли, олсун Аполлос, олсун Кифа, олсун дӱннӓ, олсун йашамак, олсун ӧлӱм, олсун шиндики ишлӓр йада гелӓн ишлӓр, хепси сизиндир.

²³Ама сиз Христозун, Христос да Аллахын.