Read Tungag ПАВЛИНИН ИЛК КИЙАДЫ КОРИНФЛИЛЕРӒ 4 Bible Online

ПАВЛИНИН ИЛК КИЙАДЫ КОРИНФЛИЛЕРӒ 4 - Tungag bible

ПАВЛИНИН ИЛК КИЙАДЫ КОРИНФЛИЛЕРӒ 4

¹Кимин гиби инсаннар бизи лӓӓзым сайсын: Христозун изметкерлери хем Аллахын саклы ишлеринин векиллери.

²Бундан каарӓ, не истенир бир векилдӓн? Ки кенди ишиндӓ инанч олсун.

³Бӓн аз касаветленерим, еер сиздӓн йада башка инсандан мааналанарсайдым. Бӓн кенди-кендими дӓ мааналамээрым.

⁴Макар ки бӓн кендимдӓ бир кусур билӓ гӧрмеерим, хеп окадар бунуннан доору чыкмээрым. Бени даава чыкаран — Саабидир.

⁵Онуштан хич мааналамайын таа вакыт гелмедийнӓн. Беклейин Саабинин гелмесини, Ангысы ачаӂэк хепсини, не саклы каранныкта, да ӱзӓ чыкараӂэк инсан ӱреклеринин неетлерини. Озаман херкез метинник Аллахтан еденеӂек.

⁶Кардашлар, буннары сӧледим кендим ичин хем Аполлос ичин, сизӓ файдалы олсун дейни, ки ӱӱренӓсиниз биздӓн да чыкмайасыныз ондан, не йазылы, хем хич кимсей башкасынын ӧнӱндӓ ӱӱнмесин.

⁷Ким башкасындан сени таа ӱстӱн йапэр? Не вар сендӓ, ани Аллахтан каблетмедин? Чӱнкӱ Ондан каблеттин, нечин ӱӱнерсин сансын каблетмедин?

⁸Сиз шиндидӓн дойундунуз, шиндидӓн зенгиннединиз! Бизсиз падишахлык едерсиниз! Олайды баарлем хакына падишахлык едӓсиниз, биз дӓ сизиннӓн падишахлык едӓрдик!

⁹Санэрым, ани Аллах бизи, апостоллары, ортайа чыкарды ен сонда, сансын оннары, ким ӧлӱмӓ даава едилмиш. Зерӓ олдук ниӂӓ бир серги бӱтӱн дӱннейӓ — хем ангиллерӓ, хем инсаннара.

¹⁰Биз акылсызыз Христос ичин, ама Христос сизи аариф йапты! Биз йуфкайыз, сиз са каавийсиниз! Сиз метиннийсиниз, биз икрамсыз!

¹¹Шиндийӓ кадар чекериз аачлык, сусузлук, чыплаклык хем дӱӱлериз, ердӓн ерӓ гезериз,

¹²чалышарак ишлеериз кенди еллеримизлӓн. Ачан кӧтӱлеерлӓр бизи, биз иисӧзлеериз. Ачан коолээрлар, дайанэрыз.

¹³Ачан бизӓ фена лаф сӧлеерлӓр, биз йалпак ӂувап едериз. Биз бӱӱнкӱ гӱнӓ кадар гӱбӱр гибийиз бу дӱннедӓ, хепсиндӓн сыбыдылмыш.

¹⁴Йазмээрым буннары, ки утандырайым сизи, ама насаатлайым, ниӂӓ севгили ушакларымы.

¹⁵Зерӓ, олса да биннӓн адамыныз, ким сизи Христоза гӧтӱрер, ниӂӓ чырак ушаа окула гӧтӱрӱр, хеп окадар саде бир бобаныз. Бӓн Ии Хабери сизӓ хаберледиимдӓн сизин бобаныз олдум, инандырарак сизи Иисус Христоза.

¹⁶Ӧлӓ ки, йалварэрым, бана бензейин.

¹⁷Бунун ичин йолладым сизӓ Тимофейи, ангысы беним севгили ушаам, О Саабийӓ инанчтыр. О аклыныза гетиреӂек, насыл бӓн Христозун йолунда гидерим хем несой херердӓ хербир клисейи ӱӱредерим.

¹⁸Сиздӓн кимилери шишкинненди да сандылар, ани сизӓ гелмейеӂӓм.

¹⁹Ама Сааби истӓрсейди, тездӓ гелеӂӓм. Озаман денейеӂӓм бу шишкиннерин диил лафларыны, ама куветлерини.

²⁰Зерӓ Гӧк Падишахлыы тутунмээр лафлардан, ама куветтӓн.

²¹Не истеерсиниз, сизӓ фышканнан мы гелейим оса севгийлӓн хем йаваш духлан мы?