Read Tungag ПАВЛИНИН ИЛК КИЙАДЫ КОРИНФЛИЛЕРӒ 7 Bible Online

ПАВЛИНИН ИЛК КИЙАДЫ КОРИНФЛИЛЕРӒ 7 - Tungag bible

ПАВЛИНИН ИЛК КИЙАДЫ КОРИНФЛИЛЕРӒ 7

¹Дӧнелим оннара, нечин йаздыныз бана: «Иидир, ки адам карыйа докунмасын», — деерсиниз.

²Ама, ки ороспулуктан корунсуннар, хербир адамын кенди карысы олсун хем хербир карынын кенди коӂасы олсун.

³Коӂа кенди борӂуну карынын ӧнӱндӓ йапсын, хеп ӧлӓ кары да кенди борӂуну коӂанын ӧнӱндӓ йапсын.

⁴Кары диил чорбаӂы кенди гӱӱдесинӓ, ама коӂа. Хеп ӧлӓ коӂа да диил чорбаӂы кенди гӱӱдесинӓ, ама кары.

⁵Бири-бириниздӓн атылмайын, салт кайыллыклан бир вакыда айыры калабилирсиниз, ки верилӓсиниз дуайа; ама сора енидӓн бирлешин, ки запсызлык бетеринӓ шейтан денӓмесин сизи.

⁶Буну сизӓ вермеерим бир сымарламак гиби, ама бир насаат гиби.

⁷Бӓн истеерим, ки хепси инсан беним гиби олсун, ама херкезин Аллахтан вар кенди баашышы. Бирисинӓ бир тӱрлӱ, башкасына башка тӱрлӱ верили.

⁸О евленмемишлерӓ хем дуллара деерим, ани ии олур, ки беним гиби калсыннар.

⁹Ама заплайамарсайдылар кендилерини, ко евленсиннӓр. Зерӓ таа ии, ки евленсиннӓр, некадар севдайлан йансыннар.

¹⁰Евлилерӓ деерим диил бӓн, ама Сааби: кары айырылмасын коӂасындан.

¹¹Еер айырылдысайды, дурсун евленмедик, йада кенди коӂасыннан барышсын. Коӂа да бракмасын кенди карысыны.

¹²Ӧбӱрлеринӓ деерим бӓн, ама диил Сааби. Еер бир кардашын карысы инансызсайды, ама кайылсайды онуннан йашамаа, айырылмасын карысындан.

¹³Еер карынын коӂасы инансызсайды, ама истӓрсейди онуннан йашамаа, айырылмасын коӂасындан.

¹⁴Зерӓ о инансыз коӂа айозланэр инанӂы карыдан, хем инансыз кары айозланэр инанӂы коӂадан. Башка тӱрлӱ ушакларыныз пак олмайаӂэйдылар, ама шинди оннар айоз.

¹⁵Еер инансыз тараф истӓрсейди айырылмаа, ко айырылсын. Бу халда кардаш йада кызкардаш диил баалы. Аллах чаарды бизи йашайалым услулукта.

¹⁶Зерӓ нередӓн билӓсин сӓн, кары, куртармайаӂан мы коӂаны? Еки, коӂа, нередӓн билерсин, куртармайаӂан мы карыны?

¹⁷Херкез йашасын ӧлӓ, ниӂӓ Аллах она пайетти, хем ниӂӓ Сааби ону чаарды. Бу сырайы ерлештирдим хепси клиселердӓ.

¹⁸Еер биркимсей кесиклийкӓн чаарылдысайды, о кесикли калсын. Еер биркимсей кесиксизкӓн чаарылдысайды, о йапмасын кесиклик.

¹⁹Кесиклик бишей диил, кесиксизлик дӓ бишей диилдир. Аслы не лӓӓзым — таманнамаа Аллахын сымарладыкларыны.

²⁰Херкез не халда чаарылды, о халда да калсын.

²¹Чырак мыйдын, ачан чаарылдын? Кахырланма, ама еер бошанабилирсейдин, таа ии олур, ки файдаланасын бу колайлыктан.

²²Ким чыракты, ачан Саабидӓн чаарылды, о Саабидӓ сербест. Хеп ӧлӓ ким сербесткӓн чаарылды, о Христозда чырак.

²³Сиз сатын алындыныз бир бӱӱк паайлан. Онуштан олмайын чырак инсаннара.

²⁴Кардашлар, херкез калсын о халда Аллахын ӧнӱндӓ, не халда чаарылды.

²⁵Кызлар ичин бендӓ Саабидӓн йок емир. Ама бӓн бир насаат верерим, чӱнкӱ едендим Саабидӓн аӂыйаннык, ки инанч олайым.

²⁶Ӧлӓ санэрым, ки шиндики сыкынтылара гӧрӓ, ии олур, ки хербири калсын, ниӂӓ булунэр.

²⁷Баалыйсын мы карыйлан? Ондан бошанмаа бакма. Бошандын мы карыдан? Аарама башка кары.

²⁸Ама еер евленӓрсейдин, гӱнах йапмээрсын. Кыз да, еер евленӓрсейди, гӱнах йапмээр. Салт ки оннарын бу йашамакта сыкынтылары олаӂэк, да бӓн истеерим сизи бундан куртарайым.

²⁹Кардашлар, тӓ не истеерим сӧлемӓӓ: вакыт кысалды. Шиндӓн сора кимин вар карысы, олсун, ниӂӓ дӓ йок.

³⁰Ким аалээр, олсун ааламайаннар гиби. Ким севинер, олсун севинмейеннӓр гиби. Ким сатын алэр, олсун оннар гиби, кимдӓ йок.

³¹Ким файдаланэр бу дӱннейин ииликлериндӓн, олсун, ниӂӓ оннар, ким файдаланмээр, зерӓ дӱннейин шиндики халы гечӓр.

³²Ама бӓн истеерим, ки сиз оласыныз кахырсыз. Ким евленмеди, кахырланэр Саабинин ишлери ичин. Бакэр, кендини Аллаха беендирсин.

³³Ама евли кахырланэр дӱннӓ ишлери ичин. Бакэр, кендини карысына беендирсин.

³⁴Хеп ӧлӓ айырыклык вар евли карынын хем кызын арасында. Кыз кахырланэр Саабинин ишлери ичин. Бакэр, ниӂӓ гӱӱдесиннӓн хем духуннан айозлансын. Ама евли кары кахырланэр дӱннӓ ишлери ичин. Бакэр, кендини коӂасына беендирсин.

³⁵Сӧлеерим буну сизин иилииниз ичин, диил ки сизи сыкылайым, ама ки сиз йакышыклы йашайасыныз хем херзаман бӱтӱн фикиринизлӓн Саабийӓ измет едӓсиниз.

³⁶Еер биркимсей сайарсайды, ани диил йакышыклы, ки кызы генчлиини гечирсин, лӓӓзымса евленсин, о йапсын, ниӂӓ истеер, кызыны еверсин.

³⁷Ама кимин йокса зору еверсин кызыны, ким кенди ӱреендӓ каавийсӓ, да варса насыл йапсын истедиинӓ гӧрӓ хем ӱреендӓ карарладыйса, ки евермесин кызыны, о ии йапэр.

³⁸Ӧлӓ ки, ким еверер кызыны, ии йапэр, ама ким евермеер, таа ии йапэр.

³⁹Евли кары баалы законнан коӂасына окадар вакыт, некадар йашээр коӂасы. Ама еер коӂасы ӧлӓрсейди, озаман кары сербест, вар ниӂӓ евленсин, кимӓ истеер, ама салт она, ким Саабининдир.

⁴⁰Ама беним дӱшӱнмемӓ гӧрӓ, кары олур таа мутлу, еер евленмедик каларсайды. Санэрым, ани бендӓ дӓ вар Аллахын Духу.