Read Tungag ПАВЛИНИН ИКИНӁИ КИЙАДЫ КОРИНФЛИЛЕРӒ 11 Bible Online

ПАВЛИНИН ИКИНӁИ КИЙАДЫ КОРИНФЛИЛЕРӒ 11 - Tungag bible

ПАВЛИНИН ИКИНӁИ КИЙАДЫ КОРИНФЛИЛЕРӒ 11

¹Умут едерим, ани дайанэрсыныз бираз беним акылсызлыыма. Не олурса, дайанын бана!

²Зерӓ бӓн алифли сизин ичин Аллахын алифлииннӓн, чӱнкӱ йавклу еттим сизи бир коӂайлан, Христозлан, ки чыкарабилейим сизи Онун ӧнӱнӓ бир темиз кыз гиби.

³Ама коркэрым, ки, ниӂӓ йылан шалвирлииннӓн алдатты Евайы, хеп ӧлӓ сизин фикирлериниз дӓ, бозулуп, сапар сизин пак хем хализ инандан Христоза.

⁴Зерӓ, ачан гелер биркимсей да насаат едер сизӓ башка бир Иисус ичин, Ангысыны биз насаат етмедик, еки кабледерсиниз башка бир дух йада башка бир ии хабер, ани каблетмединиз, сиз буннары колай кабледерсиниз.

⁵Ама бӓн санэрым, ани бу «ӱстӱн апостоллардан» бӓн таа ашаа диилим.

⁶Олэр, ки беӂериксизим лафымда, ама беӂериксиз диилим билгидӓ. Хер тарафтан, хер иштӓ буну гӧстердик сизӓ.

⁷Гӱнах мы йаптым бӓн, ачан алчалттым кендими, ки сиз ӱӱселӓсиниз, да сизӓ парасыз насаат еттим Аллахын Ии Хаберини?

⁸Башка клиселердӓн пара алдым, кабледерӓк оннардан ӧдек, ки измет едӓбилейим сизӓ. Сиздӓ булунаркан, бакмайарак, ани йоклук чекӓрдим, бӓн кимсейӓ аарлык гетирмедим.

⁹Зерӓ беним йоклууму Македонийадан гелӓн кардашлар долдурдулар. Хербир иш ӱзерӓ сакындым хем сакынаӂам да, ки бишейлӓн ӱк олмайым сизӓ.

¹⁰Ниӂӓ Христозун аслылыы вар бендӓ, хеп ӧлӓ деерим, ани Ахайа долайында хич кимсей дургудамайаӂэк бени бӧлӓ ӱӱнмектӓн.

¹¹Нечин? Онуштан, ки севмеерим сизи? Аллах билер, ани сизи северим! Ама ниӂӓ йаптым, ӧлӓ йапаӂам илери доору да,

¹²ки ӧн вермейим оннара, ким аарээр ӱӱнсӱн, ки ишлеер бизим гиби.

¹³Бусой инсаннар — йаланӂы апостоллар, алдадыӂы ишчилӓр, ангылары йапынэрлар, ани Христозун апостоллары.

¹⁴Бу диил шашма иш, зерӓ кендиси шейтан йапынэр, ки айдыннык ангили булунэр.

¹⁵Диилдир бӱӱк иш, еер онун изметкерлери дӓ йапынарсайдылар, ани доорулуун изметкерлери булунэрлар. Оннарын биткиси олаӂэк оннарын йаптыкларына гӧрӓ.

¹⁶Таа чок дейеӂӓм: биркимсей санмасын бени акылсыз. Еер сиз ӧлӓ санарсайдыныз, озаман кабледин бени ниӂӓ бир акылсызы, ки бӓн дӓ бираз ӱӱнейим.

¹⁷Не сӧлейеӂӓм, сӧлӓмейеӂӓм Саабийӓ гӧрӓ, ама бир акылсыз гиби кыйышмаклан ӱӱнерӓк.

¹⁸Чӱнкӱ чойу ӱӱнер тенӂесинӓ, ӱӱнеӂӓм бӓн дӓ.

¹⁹Зерӓ сиз, акыллылар, майылсыныз дайанмаа акылсызлара!

²⁰Хакына сиз дайанэрсыныз, ачан биркимсей сизи чырак еринӓ кулланэр, ачан йудар хем сойар сизи, ачан кабарэр ӧнӱнӱздӓ хем ӱзӱнӱзӓ урэр.

²¹Утанмаклан сӧлеерим, ани буна куведимиз етишмеди! Ама еер биркимсей кыйышарса ӱӱнсӱн, — бир акылсыз гиби лафедерим! — кыйышэрым бӓн дӓ ӱӱнмӓӓ.

²²Оннар чыфыт мы? Бӓн дӓ. Оннар израилли ми? Бӓн дӓ. Оннар Авраамын сенселесиндӓн ми? Бӓн дӓ ӧлӓйим.

²³Оннар Христозун изметкерлери ми? Дели гиби лафедерим! Бӓн оннардан таа ӱстӱн изметкерим. Бӓн таа чок чалыштым, таа чок капана дӱштӱм, сайысыз сыра дайак идим, чок сыра ӧлӱм дӧшеендӓ булундум.

²⁴Иудейлердӓн беш сыра лобут идим, отуз докузар урмак.

²⁵Ӱч керӓ дӱӱлдӱм фышканнан. Бир керӓ дӱӱлдӱм ташлан. Ӱч керӓ гечирдим геми батмасы. Бир гӱн хем бир геӂӓ калдым ачык дениздӓ.

²⁶Чок керӓ йолӂулук еттим, булундум титсиликтӓ акар сулардан, титсиликтӓ хайдутлардан, титсиликтӓ кенди сенселемдӓн, титсиликтӓ башка миллетлердӓн, титсиликтӓ касаба ичиндӓ, титсиликтӓ чол ердӓ, титсиликтӓ дениз ӱстӱндӓ, титсиликтӓ йаланӂы кардашлар арасында,

²⁷чалышмакта, савашмакта; чок керӓ уйкусузлукта, аачлыкта, сусузлукта; чок керӓ оручта, суукта, чыплаклыкта.

²⁸Буннардан каарӓ, бени басэр хер гӱн кахыр хепси клиселӓр ичин.

²⁹Ким йуфкаланды, да бӓн йуфка олмадым? Ким кӧстекленди, да бӓн онун ичин йанмадым?

³⁰Еер лӓӓзымса ӱӱнейим, ӱӱнеӂӓм оннарлан, не ачэр беним йуфкалыымы.

³¹Сааби Иисусун Бобасы Аллах, Ким дивеч метинненмиш, билер, ани йалан сӧлӓмеерим:

³²Дамаск касабасында падишах Аретанын ӧндерӂиси коллады касабайы, ки тутсун бени, ама бени читен ичиндӓ касаба дуварында бир пенчередӓн индирдилӓр, да бутакым куртулдум онун елиндӓн.