Read Tungag ПАВЛИНИН ИКИНӁИ КИЙАДЫ КОРИНФЛИЛЕРӒ 4 Bible Online

ПАВЛИНИН ИКИНӁИ КИЙАДЫ КОРИНФЛИЛЕРӒ 4 - Tungag bible

ПАВЛИНИН ИКИНӁИ КИЙАДЫ КОРИНФЛИЛЕРӒ 4

¹Онуштан, чӱнкӱ Аллахын аӂыйанныыннан бизим бӧлӓ изметчилиимиз вар, биз умуду кайбетмеериз.

²Ама бракылдык саклы айып ишлердӓн, бакмээрыз шалвирленмӓӓ хем Аллахын сӧзӱнӓ бишей катмээрыз, ама аслылыы ачыклайарак, кендимизи хепси инсанын ӱзӱндӓ хем Аллахын ӧнӱндӓ темиз гӧстерериз.

³Еер бизим Ии Хабер ӧртӱлӱсейди, ӧртӱлӱ кайып оланнар ичин,

⁴инансызлар ичин, кимин фикирлерини бу заманын аллахы [1] кӧӧр етти, ки оннары айдыннатмасын Ии Хаберин шафкы Христозун метиннии ичин, Ким гӧрӱнмӓз Аллахын гӧрӱнмесидир.

⁵Зерӓ насаат етмеериз кендимизи, насаат едериз Иисус Христозу ниӂӓ Саабийи, ама кендимизи ниӂӓ чырак сизӓ Иисус ичин.

⁶Зерӓ Аллах, Ким деди: «Айдыннык шафк етсин каранныктан», О айдыннатты ӱреклеримизи, ки таныйалым Аллахын метинниини, ани шафк едер Иисус Христозун ӱзӱндӓн.

⁷Бу хазнайы ташыйэрыз топрак каплар ичиндӓ, ки билинсин, ани ӱстӱнкӱ кувет гелер Аллахтан, ама диил биздӓн.

⁸Биз хер тарафтан сыкыштырылмышыз, ама диилиз езилмиш. Биз кахырланэрыз, ама умутсуз диилиз.

⁹Кооланмышыз, ама бракылмыш диилиз. Ерӓ урулмуш, ама ӧлдӱрӱлмӱш диилиз.

¹⁰Херзаман гӱӱдемиздӓ Сааби Иисусун ӧлӱмӱнӱ ташыйэрыз, ки Иисусун йашамасы да бизим гӱӱдемиздӓ ачылсын.

¹¹Зерӓ биз йашайаннар херзаман ӧлӱмӓ верилийиз Иисус ичин, ки Иисусун йашамасы ачылсын бизим ӧлӱмнӱ гӱӱдемиздӓ.

¹²Ӧлӓ ки, ӧлӱм ишлеер биздӓ, ама йашамак — сиздӓ.

¹³Чӱнкӱ биздӓ вар хеп о инан духу, ниӂӓ йазылы: «Инандым, онуштан лафеттим», биз дӓ инанэрыз, онуштан лафедериз,

¹⁴билерӓк, ани Ким дирилтти Сааби Иисусу, О Иисуслан билӓ бизи дӓ дирилдеӂек да сизиннӓн билӓ Кенди каршысына чыкараӂэк.

¹⁵Зерӓ хепси буннар сизин файданыз ичин олэр, ки Аллахын иивергиси, зееделенип, таа чок инсана етишсин, да шӱкӱр зееделенсин Аллахын метиннии ичин.

¹⁶Онуштан умуду кайбетмеериз. Еер бизим дышандакы адам чӱрӱрсейди, бизим ичйанкы адам гӱн-гӱндӓн ениленер.

¹⁷Зерӓ бизим илин гӱчлӱклӓр тез гечер, ама казандырэр бизӓ дивеч метинник, ани аарлыкта хепсини ашар.

¹⁸Биз бакмээрыз гӧрӱнӓр, ама гӧрӱнмӓз ишлерӓ, зерӓ гӧрӱнӓр ишлӓр бир вакыда кадар, ама гӧрӱнмӓз ишлӓр дивечтир.