Read Tungag ПАВЛИНИН ИКИНӁИ КИЙАДЫ КОРИНФЛИЛЕРӒ 8 Bible Online

ПАВЛИНИН ИКИНӁИ КИЙАДЫ КОРИНФЛИЛЕРӒ 8 - Tungag bible

ПАВЛИНИН ИКИНӁИ КИЙАДЫ КОРИНФЛИЛЕРӒ 8

¹Кардашлар, истеерим аклыныза гетирейим иивергийи, не Аллах Македонийа клиселеринӓ верди.

²Макар ки чок зеетлердӓн денендилӓр, оннарын чок севинчлери хем бӱӱк фукааралыы йапты оннары чок зенгин ӂӧмертли баашыш вермектӓ.

³Зерӓ оннар кендиликлериндӓн вердилӓр куветлеринӓ гӧрӓ, да артык куветлериндӓн дышары. Бӓн буна шаадым.

⁴Оннар пек йалвардылар бизӓ, истейерӓк пай алсыннар бу хайырлы иштӓ — йардым етмектӓ Аллахын айоз халкына.

⁵Вердилӓр диил саде, не умутланардык, ама вердилӓр кендилерини илкин Саабийӓ, сора да бизӓ, Аллахын истедиинӓ гӧрӓ.

⁶Онуштан биз йалвардык Тита, ки, ниӂӓ башлады аранызда бу хайырлы иши, ӧлӓ дӓ биткийӓ кадар гӧтӱрсӱн.

⁷Ама ниӂӓ хер тарафтан ӱстӱннӱӱнӱз вар инанда, лафетмектӓ, билгидӓ, хертӱрлӱ чалышмакта хем севгидӓ, ани биз дебрештирдик сиздӓ, бакын бу хайырлы иштӓ дӓ ӱстӱн оласыныз.

⁸Сӧлеерим буну диил бир сымарламак гиби, ама башкаларынын чалышмасыннан сизин севгилиинизи денерим, ки гӧрейим, аслы мы.

⁹Зерӓ сиз билерсиниз бизим Сааби Иисус Христозун иивергисини. О Кендиси, оларак зенгин, фукаараланды сизин ичин, ки сиз Онун фукааралыыннан зенгиннейӓсиниз.

¹⁰Онун ичин сӧлеерим сизӓ бу дӱшӱнмеклерими, зерӓ буннар файда сизин ичин. Таа гечӓн йылдан беери диил саде илк баашышы вердиниз, ама илк истейеннӓр дӓ олдунуз.

¹¹Шинди таманнайын бу иши, ки, ниӂӓ ону хавезликлӓн истединиз, хеп ӧлӓ таманнайасыныз онуннан, не вар сиздӓ.

¹²Зерӓ не верилер хавезликлӓн, о баашыш кабул олэр, диил ани версин биркимсей нейи йок, ама нейи вар.

¹³Истӓмеериз, ки башкаларына олсун илин, ама сизӓ зор.

¹⁴Истеериз хепсинӓ биртӱрлӱ олсун, шинди сизин ташкынныыныз оннарын йоклууну таманнасын, ки сора оннарын ташкынныы сизин йоклуунузу таманнасын, да хепси биртӱрлӱ олсун.

¹⁵Ниӂӓ йазылы: «Ким топлады чок, артыы йокту, ама ким топлады аз, кытлыы йокту».

¹⁶Шӱкӱр Аллаха, ани Титын ӱреенӓ койду бенимнӓн бир чалышканнык сизин ичин.

¹⁷Зерӓ о саде каблетмеди беним йалвармамы, ама о сизин ичин окадар чалышкан, ки кенди истедииннӓн сизӓ гидер.

¹⁸Онуннан барабар йолладык бир кардаш, кими хепси клиселердӓ метедерлӓр, зерӓ Ии Хабери насаат едер.

¹⁹Бундан каарӓ, бу кардаш клиселердӓн сечилди, йол аркадашымыз олсун бу хайырлы изметчиликтӓ, не йапэрыз Саабинин метиннии ичин, ки ачылсын бизим хавезлиимиз йардым етмӓӓ.

²⁰Сакынэрыз, ки биркимсей мааналамасын бизи бу ӂӧмерт баашыш ичин, ани биз гӧтӱрӱрӱз.

²¹Зерӓ чалышэрыз иилик йапмаа диил саде Саабинин ӧнӱндӓ, ама инсанын да.

²²Биз йолладык оннарлан бизим кардашы, ангысыны чок сыра хем чок ишлердӓ денедик да чалышкан булдук. О шинди таа чалышкан олду, зерӓ сизи чок инанэр.

²³Лафедерӓк Тит ичин, о пай алэр беним изметчилиимдӓ, ишлейип бенимнӓн сизин аранызда. Ама не вар насыл демӓӓ бизим кардашлар ичин, оннар клиселердӓн йолланылмышлар, ангылары Христоза метинник гетирерлӓр.

²⁴Онуштан клиселерин ӧнӱндӓ оннара гӧстерин сизин севгилиин аслысыны, ки танынсын, ани биз доору сизиннӓн ӱӱнериз.