Read Tungag ПАВЛИНИН КИЙАДЫ ГАЛАТИЙАЛЫЛАРА 1 Bible Online

ПАВЛИНИН КИЙАДЫ ГАЛАТИЙАЛЫЛАРА 1 - Tungag bible

ПАВЛИНИН КИЙАДЫ ГАЛАТИЙАЛЫЛАРА 1

¹Бӓн, Павли, диил инсаннардан сечилмиш апостол еки инсанын араӂылыыннан, ама Иисус Христоздан хем Аллах Бобадан, Ангысы Иисусу ӧлӱмдӓн дирилтти,

²хем хепси бенимнӓн олан кардашлар селӓм йоллээрыз Галатийа клиселеринӓ.

³Ииверги хем услулук сизӓ Аллах Бобадан хем Сааби Иисус Христоздан,

⁴Ангысы верди Кендини бизим гӱнахлар ичин, ки куртарсын бизи бӱӱнкӱ кӧтӱ дӱннедӓн, бизим Аллах Бобанын истедиинӓ гӧрӓ.

⁵Она олсун дивечтӓн дивеӂӓ метинник! Амин.

⁶Шашэрым, не тез дӧнерсиниз Ондан, Ким Христозун иивергисиннӓн чаарды сизи бир диишик ии хаберӓ.

⁷Диил, ани вар башка ии хабер, ама вар кими инсаннар, ани сизи долаштырэрлар да истеерлӓр Христозун Ии Хаберини бозсуннар.

⁸Артык еер биз кендимиз йада бир ангил гӧктӓн насаат едӓрсӓ бу Ии Хаберӓ каршы, ани сизӓ насаат еттик, бетвалы олсун.

⁹Шинди енидӓн сӧлеерим, не баштан да сӧледим: Еер биркимсей насаат едӓрсӓ каршы бу Ии Хаберӓ, ани сиз каблеттиниз, бетвалы олсун.

¹⁰Бӓн шинди инсанын кайыллыыны мы аарээрым оса Аллахын мы? Аӂаба инсана мы бакэрым кендими беендирейим? Еер инсана кендими беендирмӓӓ бакарсам, озаман олмарым Христозун чыраа.

¹¹Кардашлар, истеерим, билӓсиниз, ани Ии Хабер, ангысыны насаат еттим сизӓ, курулу диил инсандан.

¹²Зерӓ бӓн каблеттим хем ӱӱрендим ону диил инсандан, ама Иисус Христозун ачыкламасындан.

¹³Сиз ишиттиниз, ниӂӓ вакыдын бириндӓ йашардым иудей дининӓ гӧрӓ. Бӓн Аллахын клисесини ӂансыз коолардым да бакардым ону телеф етмӓӓ.

¹⁴Бӓн иудей дининдӓ акраннарымын чойундан таа ӧнӂӱйдӱм беним миллетимдӓ. Бендӓ варды бир тербеесиз кыйаклык деделеримин адетлери ичин.

¹⁵Ама Аллах бени дуумактан илери айырды да чаарды Кенди иивергисиннӓн да, ачан кайыл олду

¹⁶бана ачсын Кенди Оолуну, ки Онун Ии Хаберини насаат едейим йабанӂы миллетлерӓ, бӓн данышмадым бир дӓ адама.

¹⁷Гитмедим Иерусалимӓ, оннара, ким беним ӧнӱм сора апостолду, ама чабук гиттим Аравийайа да сора енидӓн Дамаск касабасына геери дӧндӱм.

¹⁸Ӱч йылдан сора гиттим Иерусалимӓ, булушайым Кифайлан [1] дейни, да онда калдым онбеш гӱн.

¹⁹Башка апостоллары гӧрмедим, Иаковдан каарӓ, ангысы Саабинин кардашы.

²⁰Аллахын ӧнӱндӓ сӧлеерим, ани, не йазэрым сизӓ, диил йалан.

²¹Ондан сора бӓн гиттим Сирийа хем Киликийа ерлеринӓ.

²²Иудейада Христозун клиселери беним ӱзӱмӱ таа гӧрмедийдилӓр.

²³Салт буну ишитмиштилӓр: «О, ким бизи бир вакыт кооларды, шинди насаат едер инан ичин, ангысыны таа илери йок етмӓӓ бакарды».

²⁴Да метиннӓрдилӓр Аллахы беним ичин.