Read Tungag ПАВЛИНИН КИЙАДЫ ГАЛАТИЙАЛЫЛАРА 3 Bible Online

ПАВЛИНИН КИЙАДЫ ГАЛАТИЙАЛЫЛАРА 3 - Tungag bible

ПАВЛИНИН КИЙАДЫ ГАЛАТИЙАЛЫЛАРА 3

¹Ей, фикирсиз галатийалылар! Ким бӱӱледи сизи, /ки сеслӓмейӓсиниз аслылыы/? Гӧзлериниз ӧнӱндӓ ачык гӧстерилди, ниӂӓ Иисус Христос ставроза герилмиш олду.

²Салт буну истеерим сиздӓн билейим: насыл Айоз Духу каблеттиниз? Закону таманнамаклан ми оса инаннан мы хаберӓ, не ишиттиниз?

³Букадар фикирсиз мийсиниз? Башладыныз Духлан, да шинди битирмӓӓ инсан ишиннӓн ми истеерсиниз?

⁴Наафилӓ ми букадар зеет чектиниз? Шӱпесиз, бу олмаз олсун наафилӓ!

⁵О, Ким дайма верер сизӓ Айоз Духу хем кудретли ишлӓр йапэр аранызда, Закону таманнаманызлан мы йапэр оса инанынызлан мы хаберӓ, не ишиттиниз?

⁶Ӧлӓ ки, «Авраам инанды Аллахы, да бу сайылды она доору сайылмак».

⁷Онуштан билин, ким инанэр, оннар — Авраамын ушаклары.

⁸Айоз Йазыда вакытча хаберленди, ани Аллах аклээр йабанӂы миллетлердӓн оланнары инаннан. Онуштан илкин Авраама бу ии хабер верилди: «Сендӓ иисӧзленеӂек хепси миллетлӓр».

⁹Ӧлӓ ки, оннар, ким инанэр, иисӧзленерлӓр инанӂы Авраамнан барабар.

¹⁰Хепси, ким умутланэр, ани доору сайылаӂэк Закону таманнамаклан, бетва алтында булунэрлар, зерӓ вар йазылы: «Бетвалы хепси оннар, ким херзаман чалышмээр таманнасын хепсини, не Законун кийадында йазылы».

¹¹Танынэр, ани кимсей Законнан доору сайыламаз Аллахын ӧнӱндӓ, зерӓ вар йазылы: «Ким инаннан доору сайылэр, о йашайаӂэк».

¹²Ама Закон диил темелли инанда, буна каршы, «Ким таманнайаӂэк сымарламаклары, о бунуннан йашайаӂэк».

¹³Христос куртарды бизи Законун бетвасындан, ачан О бетвалы олду бизим ичин. Зерӓ вар йазылы: «Бетвалы хепси, кимин ӧлӱсӱ аачта асылы».

¹⁴Бу олду, ки иисӧзленмӓк, ани аданмыш Авраама, олсун колай Иисус Христозун араӂылыыннан даалсын йабанӂы миллетлерӓ, да биз инаннан кабледелим аданмыш Духу.

¹⁵Кардашлар! Бир ӧрнек верейим инсан йашамасындан. Макар ки бир бааланты саде инсандан йапылы, йок насыл биркимсей ону бозсун еки она бишей еклесин.

¹⁶Адамаклар верилди Авраама хем онун сенселесинӓ. Аллах демеер «сенселелеринӓ», сансын чок инсан ичин, ама ачан деер «сенин сенселенӓ», лафедер бир Адам ичин, Ангысы — Христос.

¹⁷Тӓ, не истеерим бунуннан сӧлемӓӓ: Бааланты, ани ӧнӂӓ Аллахтан курулу, йок насыл бозулсун Айоз Законнан, ани дӧртӱз отуз йылдан сора гелди, ӧлӓ, ани адамак куветсиз калсын.

¹⁸Зерӓ, еер мирасчылык Закондан тутунарса, озаман тутунмээр адамактан, ама Аллах мирасчылыы адамаклан Авраама верди.

¹⁹Озаман нечин лӓӓзым Закон? Закон екленди, ки кабаатлары ӱзӓ чыкарсын, Авраамын сенселеси Христос гелинӂӓ, Ангысы ичин сӧленер бу адамак. Закон верилди ангиллӓрлӓн, бир араӂы ашыры.

²⁰Салт бир тараф варса, араӂы диил лӓӓзым, Аллах са салт бириӂик.

²¹Не дейеӂез? Закон каршы дурэр мы Аллахын адамакларына? Олмаз, бир сыра билӓ! Еер верилмиш олайды бир закон, ани гетирӓбилеӂейди йашамак, озаман доору, ани инсан доору сайылаӂэйды Закондан.

²²Ама Айоз Йазылар хепсини капээр гӱнах алтына, ки аданмыш баашыш, ани инаннан Иисус Христоза темелли, верилсин инанӂылара.

²³Инан гелинӂӓ, Законун капанӂысыйдык, сансын зынданда китлийдик о вакыдадан, ачан инан лӓӓзымды ачылсын.

²⁴Бутӱрлӱ, Закон, ушак бакан чырак гиби, бизи Иисус Христоза гетирди, ки инаннан доору сайылалым.

²⁵Ама биз инандыктан сора, диил лӓӓзым Закон таа бизи баксын.

²⁶Хепсиниз, инаннан Иисус Христоза, олэрсыныз Аллахын ооллары.

²⁷Хепсиниз, ким ваатизликтӓ Христозлан бир олдунуз, Христозлан гииндиниз.

²⁸Йок шиндӓн сора не иудей, не урум, не чырак, не сербест, не адам, не кары; Иисус Христозда хепсиниз бир.

²⁹Еер сиз Христозунсайдыныз, озаман Авраамын сенселесийсиниз да мирасчы олэрсыныз Аллахын адамасындан.