Read Tungag ПАВЛИНИН КИЙАДЫ ЕФЕСЛИЛЕРӒ 5 Bible Online

ПАВЛИНИН КИЙАДЫ ЕФЕСЛИЛЕРӒ 5 - Tungag bible

ПАВЛИНИН КИЙАДЫ ЕФЕСЛИЛЕРӒ 5

¹Аллаха бензейин, ниӂӓ севгили ушаклар.

²Севгиликтӓ йашайын, ниӂӓ Христос бизи севди да Кендини бизим ичин верди Аллаха гӧзӓл кокулу бир баашыш хем курбан гиби.

³Ама ороспулук хем хертӱрлӱ диилпаклык еки тамахлык хич анылмасын билӓ сизин аранызда, чӱнкӱ бу йакышмаз Аллахын айоз халкына.

⁴Айып сӧзлӓр, бош лафлар хем каскаты шакалар да олмасын. Буннар йарашмээр. Таа ислӓӓ шӱкӱр един.

⁵Зерӓ билерсиниз, ани хич бир ороспу, диилпак, еки тамах олан, ангысы идоллара баш иилдӓн гиби, мирасчы олмайаӂэк Христозун хем Аллахын падишахлыында.

⁶Кимсей алдатмасын сизи бош лафларлан, зерӓ бу ишлӓр бетеринӓ Аллахын ӱфкеси гелер сеслӓмейӓн инсаннар ӱстӱнӓ.

⁷Оннарлан пайдаш олмайын.

⁸Вакыдын бириндӓ сиз каранныктыныз, ама шинди Саабидӓ айдынныксыныз. Гӧтӱрӱн кендинизи, ниӂӓ айдыннык евлатлары.

⁹Зерӓ айдынныын мейвасы хертӱрлӱ иилик, доорулук хем аслылык.

¹⁰Бакын ӱӱренмӓӓ, не Сааби беенер.

¹¹Каранныын кысыр ишлериндӓ пай алмайын. Ама таказалайын оннары.

¹²Зерӓ айыптыр сӧлемӓӓ о ишлери, не оннар саклы йапэрлар.

¹³Ама айдыннык хепсини белли едер, ӱзӓ чыкарып, зерӓ хепси, не белли олэр, айдынныктыр.

¹⁴Онуштан денер: «Сӓн, ани уйуйэрсын, уйан уйкудан, ӧлӱдӓн дирил! Христос сана шафк едер».

¹⁵Ӧлӓ ки, ии бакын, ниӂӓ йашээрсыныз. Олмайын фикирсиз, ама аариф олун.

¹⁶Вакыды паайа койун, зерӓ бу гӱннӓр кӧтӱ гӱннӓр.

¹⁷Онуштан олмайын акылсыз, ама аннайын, недир Аллахын истедии.

¹⁸Сарфош олмайын шараплан, зерӓ сарфошлук сизи запсызлаа гӧтӱрӱр, ама долушун Айоз Духлан.

¹⁹Бири-биринизӓ псалмалар, метинник лафлары хем духча тӱркӱлӓр чалып-сӧлейин. Бӱтӱн ӱректӓн Саабийӓ тӱркӱ хем хава чалын.

²⁰Шӱкӱрлук гетирин хепси ичин херзаман Аллах Бобайа бизим Сааби Иисус Христозун адыннан.

²¹Бири-биринизӓ ӧн верин, Христоздан коркарак.

²²Карылар ӧн версиннӓр кенди коӂаларына, ниӂӓ Саабийӓ.

²³Зерӓ коӂа баштыр карыйа, ниӂӓ Христос да баштыр клисейӓ хем Кендиси гӱӱденин Куртарыӂысы.

²⁴Ниӂӓ клисӓ ӧн верер Христоза, хеп ӧлӓ карылар да хербир иш ӱзерӓ ӧн версиннӓр коӂаларына.

²⁵Коӂалар, севин кенди карыларынызы, ниӂӓ Христос да севди клисейи да онун ичин кендини курбан верди,

²⁶ки ону, суйлан йыкайып, Аллахын сӧзӱннӓн пакладыктан сора айозласын,

²⁷да ону Кенди ӧнӱнӓ чыкарсын бир метинни клисӓ гиби, лекесиз, бурушуксуз хем башка кедерсиз, ки айоз хем кусурсуз олсун.

²⁸Коӂалар да дӱшер кенди карыларыны хеп ӧлӓ севсиннӓр, ниӂӓ кенди гӱӱделерини. Ким север кенди карысыны, о север кендисини.

²⁹Зерӓ кимсей бир сыра билӓ кенди гӱӱдесинӓ кин гӱтмеди, ама ону беслеер хем йысыдэр, ниӂӓ Христос клисейи.

³⁰Зерӓ биз Онун гӱӱдесинин еклери, /Онун етиндӓн хем Онун кемиклериндӓн/.

³¹«Онуштан адам бракаӂэк кенди бобасыны хем анасыны, карысына бааланаӂэк, да икиси бир гӱӱдӓ олаӂэклар».

³²Бу — бир бӱӱк саклылык. Бӓн лафедерим Христос ичин хем клисӓ ичин.

³³Ама сиздӓн херкези кенди карысыны севсин, ниӂӓ кендини; кары да хатыр гӱтсӱн коӂасына.