Read Tungag ПАВЛИНИН КИЙАДЫ ФИЛИПЛИЛЕРӒ 1 Bible Online

ПАВЛИНИН КИЙАДЫ ФИЛИПЛИЛЕРӒ 1 - Tungag bible

ПАВЛИНИН КИЙАДЫ ФИЛИПЛИЛЕРӒ 1

¹Иисус Христозун чыраклары, бӓн, Павли, хем Тимофей, селӓм йоллээрыз Иисус Христозун бӱтӱн айоз халкына, ани булунэр Филип касабасында, хеп ӧлӓ епископлара хем диаконнара [1].

²Ииверги хем услулук олсун сизӓ Аллах Бобадан хем Сааби Иисус Христоздан.

³Шӱкӱр едерим беним Аллахыма херзаман, ачан аклыма гетирерим сизи.

⁴Херзаман, хербир дуамда хепсиниз ичин севинмӓклӓн дуа едерим,

⁵зерӓ илк гӱндӓн шиндийӓ кадар сиз пай алэрсыныз Ии Хабери хаберлемектӓ.

⁶Пек инанэрым, ани О, Ким чекеттирди сиздӓ бу ии иши, битиреӂек Иисус Христозун гӱнӱнӓ кадар.

⁷Доору, ани бӧлӓ сизин ичин дӱшӱнерим, зерӓ сиз беним ӱреемдӓйсиниз. Хем ачан синӂирлӓрлӓн баалыйым, хем да ачан Ии Хабери коруйэрым хем аслысыны чыкарэрым, сиз хепсиниз пай алэрсыныз бу хайырда бенимнӓн барабар.

⁸Аллах бана шаат, ани бӓн ӧзлеерим хепсинизи Иисус Христозун севгисиннӓн.

⁹Дуа едерим, ки сизин севгиниз таа чок хем таа чок бӱӱсӱн билгидӓ хем аннамакта.

¹⁰Озаман таныйабилирсиниз, не файдалы, ки оласыныз темиз хем кусурсуз Христозун гӱнӱндӓ,

¹¹долу доорулук мейвасыннан, ани гелер Иисус Христоздан, Аллахын шаны ичин хем метиннии ичин.

¹²Истеерим билӓсиниз, кардашлар, ани беним халым файда олду таа чок Ии Хаберин хаберленмесинӓ.

¹³Ӧлӓ ки аннады херкези императорун бинасында хем хепси калан инсаннар, ани бӓн синӂирлӓрлӓн баалыйым Христос ичин.

¹⁴Чойу кардашлардан, Саабийӓ умутланарак, беним синӂирлеримдӓн таа чок кыйышмак едендилӓр да коркусуз сӧлеерлӓр Аллахын сӧзӱнӱ.

¹⁵Доору, ани кимиси насаат едер Христос ичин хасеетликтӓн хем йарышмактан, ама башкалары ии неетлӓн.

¹⁶Кимиси буну йапэр севгиликтӓн, билерӓк ани бӓн койулдум, ки коруйайым Ии Хабери.

¹⁷Башкасы хаберлеер Христозу кендини калдырмак ичин, диил пак неетлӓн, санарак, ани бунуннан зееделеерлӓр зеетлерими капанда.

¹⁸Ама не зарары вар? Истӓр йапынмаклан, истӓр хализ ӱректӓн, Христос хаберленер. Бунун ичин севинерим хем таа чок севинеӂӓм дӓ.

¹⁹Зерӓ билерим, ани бу бана куртулмак гетиреӂек сизин дуаларынызлан хем Иисус Христозун Духунун йардымыннан.

²⁰Хавезлӓн беклеерим хем умутланэрым, ани хич утанмыш олмайаӂам, ама кыйышмаклан лафедеӂӓм, да ниӂӓ херзаман, ӧлӓ шинди дӓ, йашарсам да, ӧлӱрсӓм дӓ, Христос беним гӱӱдӓмнӓн метинненеӂек.

²¹Зерӓ беним ичин йашамак — Христос, ӧлӱм — казанч.

²²Еер илери доору йашарсам гӱӱдедӓ, файдалы ишлӓр йапабилӓрим. Ама билмеерим, не айырайым.

²³Чекер бени бу да, о да. Истеерим гечинейим бу дӱннедӓн да олайым Христозлан, зерӓ бу чок таа ии.

²⁴Ама гӱӱдедӓ каларсайдым, бу сизин ичин таа лӓӓзымныклы.

²⁵Чок инанарак буна, билерим, ани йашайаӂам да илери доору сизиннӓн хепсинизлӓн барабар олаӂам, ки сиз, инанда илерлейип, севинӓсиниз.

²⁶Озаман таа чок ӱӱнӓбилеӂениз Христос Иисуслан беним ичин, ачан сизӓ геери гелеӂӓм.

²⁷Саде йакышыклы йашайыныз Христозун Ии Хаберинӓ гӧрӓ, ки еер гелирсӓм да гӧрӱрсӓм сизи, еки гелмӓрсӓм, ишидейим сизин ичин, ани духча бирликтӓ дурэрсыныз, ниӂӓ бир ӂан савашарак, ки Ии Хабер инанылсын,

²⁸хем каршы дураннардан хич коркмайарак. Бу оннар ичин бир нышан, ани оннар кайбелеӂеклӓр, ама сиз куртулаӂэныз. Бу да вар Аллахтан.

²⁹Зерӓ сизӓ Христос ичин верили, диил саде Она инанасыныз, ама зеетленӓсиниз дӓ Онун ичин.

³⁰Сиз хеп ӧлӓ савашэрсыныз, ниӂӓ бендӓ гӧрдӱнӱз хем ниӂӓ шинди беним ичин ишидерсиниз.