Read Tungag ПАВЛИНИН КИЙАДЫ КОЛОСЛУЛАРА 2 Bible Online

ПАВЛИНИН КИЙАДЫ КОЛОСЛУЛАРА 2 - Tungag bible

ПАВЛИНИН КИЙАДЫ КОЛОСЛУЛАРА 2

¹Истеерим, ки билӓсиниз, некадар чок чалышэрым сизин ичин, лаодикийалылар ичин хем хепси оннар ичин, ким гӧрмеди беним ӱзӱмӱ.

²Истеерим, ани оннарын ӱреклери хошлансын хем севгийлӓн бирлешсиннӓр, ки таман билимин бӱтӱн зенгиниини еденсиннӓр да танысыннар Аллахын саклы курулмушуну, ани Христостур,

³Ангысында саклы бӱтӱн аарифлиин хем билимин хазнасы.

⁴Буну сӧлеерим, ки биркимсей сизи йанылтмасын кулаа назландыран лафларлан.

⁵Зерӓ, макар ки гӱӱдейӂесинӓ булунмээрым аранызда, духча сизиннӓним. Гӧрӱп некадар тертиплийсиниз хем некадар каави инанэрсыныз Иисус Христоза, бӓн чок севинерим.

⁶Онуштан, ниӂӓ каблеттиниз Сааби Иисус Христозу, ӧлӓ дӓ Онда йашайын.

⁷Кӧклешин хем темелленин Онда, каавилешин инанда, ниӂӓ ӱӱрендиниз, херзаман шӱкӱр едерӓк Аллаха.

⁸Бакын, кардашлар, ки биркимсей сизи есир алмасын философлуклан, бошуна алдангач лафларлан, инсанын адетлеринӓ гӧрӓ, бу дӱннейин башланкы ӱӱретмеклеринӓ гӧрӓ, ама диил Христоза гӧрӓ.

⁹Зерӓ Онда гӱӱдейӂесинӓ булунэр Аллахын бӱтӱн таманныы.

¹⁰Одур, Ким хербир кулланыӂылыын хем заабитлиин Башы, Онда сиз дӓ таман олдунуз.

¹¹Ондан кесикли олдунуз диил бир ел кесиклииннӓн, ама сойунарак тенӂӓ табеетлериниздӓн кесикликлӓн, ани Христос йапты,

¹²Онуннан гӧмӱлӱп ваатизликтӓ, хеп Онуннан дирилдиниз инаннан Аллахын кувединӓ, Ангысы Ону ӧлӱдӓн дирилтти.

¹³Сиз ӧлӱйдӱнӱз, зерӓ гӱнах йапардыныз хем гӱӱдейӂесинӓ диилдиниз кесикли. Ама Аллах сизӓ йашамак Христозлан верди. Зерӓ О баашлады хепси бизим гӱнахларымызы.

¹⁴О бизим борч йазымызы силди, ани сыраларыннан бизӓ каршыйды да кабаатлы чыкарарды. Ону арадан алып, ставроза какты.

¹⁵Гӧктеки кулланыӂыларын хем заабитлерин силӓхларыны алды, ставрозлан гездирип оннары енсемӓк парадында, херкезин гӧзӱ ӧнӱндӓ утандырды.

¹⁶Онуштан кимсей сизи имӓк ичин, ичмӓк ичин, бир йорту ичин, ени ай ичин еки ӂумертеси ичин кабаатландырмасын.

¹⁷Буннар гелӓр вакыдын гӧлгесидир, ама аслылык Христозда.

¹⁸Кимсей баашышынызы капмасын, истейерӓк, оласыныз мӱнӱз хем верили ангиллерӓ. Бӧлӓ бир адам карышэр оннара, не кенди гӧрмеди, бошуна кабарэр кенди тенин фикириннӓн

¹⁹да тутунмээр Баштан, Кимдӓн бӱтӱн гӱӱдӓ еклери хем баалантылары йардымыннан бесленер хем бирлештирилер, да башарэр, бӱӱйерӓк Аллахын йардымыннан.

²⁰Еер сиз, ӧлерӓк Христозлан билӓ, дӱннейин башланкы ӱӱретмеклериндӓн куртулдусайдыныз, озаман нечин сиз, сансын дӱннедӓ йашайаннар, бу сыралары тутэрсыныз:

²¹«Диимӓ», «датма», «докунма».

²²Хепси бу сыралар верилди о ишлӓр ичин, ани кулланылдыкча йок олэр. Буннар — инсан емирлери хем адам ӱӱретмеклери.

²³Бу сыралар йапынар аллахчылыклан, тутаклыклан хем гӱӱдейӂӓ зеетленмӓклӓн аариф гӧрӱнӱр, ама тенин истедиклерини дургутмак ичин оннарын файдасы йок.