Read Tungag ПАВЛИНИН КИЙАДЫ КОЛОСЛУЛАРА 4 Bible Online

ПАВЛИНИН КИЙАДЫ КОЛОСЛУЛАРА 4 - Tungag bible

ПАВЛИНИН КИЙАДЫ КОЛОСЛУЛАРА 4

¹Сиз, чорбаӂылар, верин не дӱшер чыраклара, да хепсини биртӱрлӱ сайын, билерӓк, ани сизин дӓ вар Чорбаӂыныз гӧктӓ.

²Херзаман верилин дуайа. Дуа едӓркӓн, кушку олун хем шӱкӱр един.

³Дуа един бизим ичин дӓ, ки Аллах ачсын бизӓ бир капу насаат ичин, ки хаберлейелим Христозун саклылыыны, ангысы ичин капана дӱштӱм,

⁴ки буну ачык билдирӓбилейим, да, ниӂӓ дӱшер, лафедейим.

⁵Клиседӓн дышанда оланнарлан гӧтӱрӱн кендинизи аарифликлӓн, вакыды паайа койуп.

⁶Сизин лафыныз херзаман хайырлы олсун, тузланмыш, ки билӓсиниз, ниӂӓ дӱшер херкезинӓ ӂувап етмӓӓ.

⁷Сизӓ, беним ичин хепсини сӧлейеӂек Тихик, бизим севгили кардаш хем инанч йардымӂы, хем кафадар Саабинин изметиндӓ,

⁸ангысыны сизӓ маасуз йолладым, ки аннасын халынызы да ӱреклендирсин сизи.

⁹Онуннан билӓ йолладым Онисими дӓ, ангысы инанч хем севгили кардаштыр сизин араныздан. Оннар сӧлейеӂеклӓр сизӓ хепсини, не бурада олэр.

¹⁰Селӓм йоллээр сизӓ Аристарх, ани капалы бенимнӓн барабар, хем Марк, Варнаванын тейзӓ оолу, ангысы ичин сиз сымарламак алдыныз, ки гелдийнӓн кабледӓсиниз ону,

¹¹хеп ӧлӓ Иисус, ангысына денер Иуст. Кесикли оланнардан йалныз буннар ишлеерлӓр бенимнӓн билӓ Аллахын Падишахлыы ичин. Оннар ӱрееми сериннеттилӓр.

¹²Селӓм йоллээр сизӓ Епафрас, Иисус Христозун чыраа, ани сиздӓн. О херзаман чалышкан сизин ичин дуада, ки оласыныз таман хем каави инанда, таныйарак хепсини, не истеер Аллах.

¹³Шаатлык едерим онун ичин, ани о чок чалышкан сизин ичин хем оннар ичин, ким Лаодикийа хем Иерапол касабаларында булунэр.

¹⁴Селӓм йоллээр сизӓ Лука, севгили дофтор, хем Димас.

¹⁵Селӓмнейин кардашлары Лаодикийа касабасындан, хем Нимфайы хем клисейи, ани бу карынын евиндӓ топланэр.

¹⁶Бу кийат аранызда окундуктан сора, бакын да верин, Лаодикийа клисесинӓ окусуннар. Сиз дӓ окуйун кийады, ани Лаодикийадан гелеӂек.

¹⁷Сӧлейин Архипӓ бӧлӓ: «Бак да таманна изметчилии, ани каблеттин Саабидӓн».

¹⁸Бӓн, Павли, йазэрым бу селӓми кенди елимнӓн. Унутмайын беним синӂирлерими. Сизиннӓн ииверги олсун. /Амин./