Read Tungag ПАВЛИНИН ИЛК КИЙАДЫ САЛОНИКЛИЛЕРӒ 3 Bible Online

ПАВЛИНИН ИЛК КИЙАДЫ САЛОНИКЛИЛЕРӒ 3 - Tungag bible

ПАВЛИНИН ИЛК КИЙАДЫ САЛОНИКЛИЛЕРӒ 3

¹Онуштан, шиндӓн сора дайанамайарак, биз кайыл олдук йалныз калалым Афина касабасында,

²да йолладык Тимофейи, бизим кардашы хем кафадары Аллах ичин, ки Христозун Ии Хаберини насаат етсин да каавилесин хем гиргиннетсин сизи инанда,

³ки кимсей сарсаланмасын бу зеетлердӓ. Зерӓ сиз кендиниз билерсиниз, ани бизим ӧлӓ кысметимиз.

⁴Биз ачан сиздейдик, ӧнӂӓ сӧледик, ани зеет чекеӂез, ӧлӓ дӓ разгелди, ниӂӓ билерсиниз.

⁵Онуштан бӓн зеедӓ дайанамайарак, йолладым Тимофейи, ки аннайым сизин инаныныз ичин. Коркардым, ани биртӱрлӱ сизи денейиӂи [1] алдатмасын, да бизим ишимиз бошуна калмасын.

⁶Ама шинди, ачан сиздӓн гелди Тимофей да гетирди бизӓ ии хабер сизин инаныныз ичин хем севгиниз ичин, хем ани сиз бизи херзаман ии лафлан анэрсыныз да истеерсиниз гӧрмӓӓ бизи, ниӂӓ дӓ биз сизи,

⁷бизим кахырымызда хем зорлуумузда иилендик сизиннӓн, кардашлар, сизин инаныныз ичин.

⁸Зерӓ биз сефа йашээрыз, ачан сиз Саабидӓ каави дурэрсыныз.

⁹Несой шӱкӱрлӱк вар ниӂӓ гетирелим Аллаха сизин ичин, бӱӱк севинмӓк ичин, ани каблеттик сиздӓн бизим Аллахын ӧнӱндӓ.

¹⁰Геӂӓ-гӱндӱз бӱтӱн ӱректӓн дуа едериз, ки гӧрелим сизин ӱзӱнӱзӱ да долдуралым, не етишмеер сизин инанда.

¹¹Кенди бизим Аллах Боба хем Саабимиз Иисус Христос доорутсун бизим йолумузу сизӓ.

¹²Сааби зееделесин хем таштырсын севгинизи бири-биринизӓ хем хепсинӓ, ниӂӓ дӓ биз сизи севериз,

¹³ки каавилесин ӱреклеринизи, айозлукта оласыныз кабаатсыз бизим Аллах Бобанын ӧнӱндӓ бизим Сааби Иисусун гелмесиндӓ хепси айоз халкыннан. /Амин./