Read Tungag ПАВЛИНИН ИЛК КИЙАДЫ САЛОНИКЛИЛЕРӒ 4 Bible Online

ПАВЛИНИН ИЛК КИЙАДЫ САЛОНИКЛИЛЕРӒ 4 - Tungag bible

ПАВЛИНИН ИЛК КИЙАДЫ САЛОНИКЛИЛЕРӒ 4

¹Биткидӓ, кардашлар, истеериз хем йалварэрыз сизӓ Иисус Христозун адыннан, ниӂӓ каблеттиниз биздӓн, ташыйын хем беендирин кендинизи Аллаха, ниӂӓ дӱшер, ниӂӓ дӓ йапэрсыныз, бунда таа илерлейиниз.

²Зерӓ сиз билерсиниз, не сымарламаклар вердик сизӓ Сааби Иисустан.

³Чӱнкӱ Аллахын истедии будур: айоз оласыныз хем запедӓсиниз кендинизи ороспулуктан.

⁴Херкезиниз билсин корумаа кенди гӱӱдесини айозлукта хем сайгылыкта,

⁵ама диил дӱшкӱн истемеклердӓ тайфӓннар гиби, ани Аллахы билмеерлӓр.

⁶Бу ӱзерӓ кимсей, сырайы басып, кардашыны гӱӂендирмесин, зерӓ Сааби хепси бу гӱнахлар ичин ӂезалээр, ниӂӓ биз баштан сизӓ сӧледик хем аннаттык.

⁷Чӱнкӱ Аллах чаармады бизи диилпаклаа, ама чаарды айозлаа.

⁸Онуштан, ким паайа коймээр бу сырайы, паасызландырэр диил инсаны, ама Аллахы, Ангысы верди бизӓ Айоз Духу.

⁹Кардаш севгилии ичин хич йок зорум йазмаа сизӓ, зерӓ сиз кендиниз Аллахтан ӱӱредилмиш олдунуз севмӓӓ бири-биринизи.

¹⁰Аслы, ани северсиниз хепси кардашлары, ким булунэр Македонийада, ама сизӓ йалварэрыз, кардашлар, бу ӱзерӓ таа илерлейин.

¹¹Чалышын услулукта йашамаа, кенди ишинизӓ бакмаа хем кенди еллеринизлӓн ишлемӓӓ, ниӂӓ биз сизӓ сымарладык,

¹²ки гӧтӱрӓсиниз кендинизи йакышыклы дышанкыларын ӧнӱндӓ да, кимсейӓ зорунуз олмасын.

¹³Кардашлар, истӓмеерим сизи билмезликтӓ бракмаа ӧлӱлӓр [2] ичин, ки кахырланмайасыныз, ниӂӓ калан умутсуз инсаннар.

¹⁴Еер биз инанарсак, ани Иисус ӧлдӱ да дирилди, хеп ӧлӓ инаналым, ани Аллах Иисуслан геери гетиреӂек оннары, ким Иисуса инанарак ӧлдӱ.

¹⁵Зерӓ буну сизӓ Саабинин сӧзӱннӓн сӧлеериз, ани биз, дирилӓр, еер йашамакта каларсак Саабинин гелмесиндӓ, ӧлӱлерин ӧнӱнӱ гечмейеӂез.

¹⁶Зерӓ Сааби Кенди гӧктӓн инеӂек, сеседерӓк бир архангил сесиннӓн хем Аллахын борусуннан, да оннар, ким ӧлдӱ Христоза инанарак, илкин калкаӂэклар.

¹⁷Сора биз, дири оланнар, еер йашамакта каларсак о вакытта, оннарлан билӓ алынаӂэз Саабийи каршыламаа гӧкӱн алтында да бутӱрлӱ Онуннан хожма бирердӓ олаӂэз.

¹⁸Ӧлӓ ки, бу лафларлан ӱреклендирин бири-биринизи.