Read Tungag ПАВЛИНИН ИЛК КИЙАДЫ САЛОНИКЛИЛЕРӒ 5 Bible Online

ПАВЛИНИН ИЛК КИЙАДЫ САЛОНИКЛИЛЕРӒ 5 - Tungag bible

ПАВЛИНИН ИЛК КИЙАДЫ САЛОНИКЛИЛЕРӒ 5

¹Кардашлар, бу олушлар ичин йок зорлук йазмаа сизӓ, не вакыт хем не гӱннердӓ олаӂэк,

²зерӓ кендиниз ии билерсиниз, ани Саабинин гӱнӱ гелеӂек, ниӂӓ бир хырсыз геӂӓ гелер.

³Озаман, ачан дейеӂеклӓр «услулук хем коркусузлук», озаман ап-ансыздан бела ӱстлеринӓ гелеӂек, ниӂӓ карынын дуумак санӂылары, да куртуламайаӂэклар.

⁴Ама сиз, кардашлар, диилсиниз каранныкта, ки о гӱн тутсун сизи хырсыз гиби.

⁵Зерӓ сиз хепсиниз айдыннык ооллары, гӱндӱз ооллары, диилиз не геӂӓ, не дӓ караннык ушаклары.

⁶Онуштан уйумайалым, ниӂӓ каланы, ама айык хем уйанык олалым.

⁷Чӱнкӱ уйуйаннар геӂӓ уйуйэрлар, ичкиӂилӓр дӓ геӂӓ сарфош олэрлар.

⁸Ама биз гӱндӱз ооллары, онуштан лӓӓзым айык олалым, гӱӱсӱмӱзӓ инан хем севги зирхини гиийелим, башымыза куртулмак умут башлыыны такалым.

⁹Чӱнкӱ Аллах бизи ӱфкеси ичин айырмады, ама куртулмак еденелим бизим Сааби Иисус Христос адындан,

¹⁰Ангысы ӧлдӱ бизим ичин, ки биз уйаныкыз мы, уйуйэрыз мы, йашайалым Онуннан билӓ.

¹¹Онуштан бири-биринизи ӱреклендирин хем духча каавилейин, ниӂӓ дӓ йапэрсыныз.

¹²Йалварэрыз сизӓ, кардашлар, хатырлайын сиздеки ишчилери, ани сизи кулланэрлар Саабинин йолунда хем акыл верерлӓр.

¹³Оннара ен бӱӱк сайгы хем севги гӧстерин оннарын иши ичин. Бири-биринизлӓн барышмакта йашайын.

¹⁴Сизӓ йалварэрыз, кардашлар, акыл верин касаветсизлерӓ, ӱреклендирин коркаклары, йуфкалары аркалайын, хепсиннӓн сабурлу олун.

¹⁵Бакын, ки кимсей кӧтӱлӱк ичин кӧтӱлӱк чевирмесин, ама чалышын херзаман иилик йапмаа бири-биринизӓ хем херкезинӓ.

¹⁶Херзаман севинин.

¹⁷Дайма дуа един.

¹⁸Хербир халда шӱкӱр един, зерӓ ӧлӓдир сизин ичин Аллахын истедии Иисус Христозда.

¹⁹Айоз Духу сӱӱндӱрмейин.

²⁰Пророклуу паасызландырмайын.

²¹Хепсини денейин, не ии, ондан тутунун.

²²Йыракланын хертӱрлӱ кӧтӱлӱктӓн.

²³Услулук верӓн Аллах бӱтӱннӓ сизи айозласын. Сизин духунуз, ӂаныныз хем гӱӱдениз бӱтӱннӓ кедерсиз корунсун бизим Сааби Иисус Христозун гелмесиндӓ.

²⁴Сизи чааран Аллах инанчтыр, О буннары йапар.

²⁵Кардашлар! Дуа един бизим ичин.

²⁶Селӓмнейин хепси кардашлары айоз ӧпӱшлӓн.

²⁷Саабинин адыннан сымарлээрым, окуйун бу кийады хепси /айоз/ кардашлара.

²⁸Ииверги олсун сизиннӓн бизим Сааби Иисус Христоздан. /Амин./