Read Tungag ПАВЛИНИН ИКИНӁИ КИЙАДЫ САЛОНИКЛИЛЕРӒ 2 Bible Online

ПАВЛИНИН ИКИНӁИ КИЙАДЫ САЛОНИКЛИЛЕРӒ 2 - Tungag bible

ПАВЛИНИН ИКИНӁИ КИЙАДЫ САЛОНИКЛИЛЕРӒ 2

¹Бизим Сааби Иисус Христозун гелмеси ичин хем бизим Она топланмамыз ичин лафеделим. Йалварэрыз сизӓ, кардашлар,

²чабук шӱпейӓ дӱшмейин хем ӱркмейин не бир духтан, не бир лафтан, не дӓ сансын биздӓн йолланмыш бир кийаттан, санарак, ани Христозун гӱнӱ гелди.

³Кимсей сизи биртӱрлӱ алдатмасын. Зерӓ о гӱн гелмейеӂек илкин олмайынӂа инандан атылмак хем ачылмайынӂа законсуз адам, ангысынын сону — кайыплык.

⁴О каршы дураӂэк хем кендини ӱӱсеклендиреӂек хепсиндӓн таа чок, нейӓ денер аллах еки нейӓ баш иилдилер, ӧлӓ ки Аллахын Айоз бинасында отураӂэк, сансын о Аллах, да кендини Аллахын еринӓ койаӂэк.

⁵Тутмээрсыныз мы аклынызда, ачан таа сиздейдим, бӓн буннары сӧледим.

⁶Билерсиниз, не шинди дургудэр ону, ки ачылсын кенди вакыдында.

⁷Зерӓ законсузлуун саклы куведи шинди дӓ ишлеер, салт о вакыдадан, ачан О, Ким шинди ону дургудэр, орталыктан алынаӂэк.

⁸Озаман законсуз олан ачылаӂэк, ангысыны Сааби Иисус ӧлдӱреӂек Кенди аазындан солууннан да телеф едеӂек Кенди гелмесинин пейдаланмасында.

⁹Законсуз оланын гелмеси шейтанын ишиндӓн олаӂэк, ангысы файдалээр хертӱрлӱ кудретли йаптыклары, алдадыӂы нышаннары хем шашмаклы ишлери,

¹⁰хем хертӱрлӱ кӧтӱ шалвирлии, ки кайыплык йолунда оланнары алдатсын. Оннар кайбелеӂеклӓр, зерӓ истӓмеерлӓр севмӓӓ аслылыы, куртулсуннар дейни.

¹¹Онуштан Аллах оннара бир алдадыӂы кувет йоллээр, ки инансыннар йаланы,

¹²ки даава кесилсин хепсинӓ, ким инанмээр аслылыы, ама майыл олэр йалана.

¹³Биз лӓӓзым херзаман шӱкӱр еделим Аллаха сизин ичин, севгили кардашлар, ани Аллах сечти сизи, ки илк куртуланнар оласыныз Духун айозламасыннан хем инаннан аслылаа.

¹⁴Бунун ичин О чаарды сизи Ии Хаберлӓн, ангысыны насаат еттик, ки еденӓбилӓсиниз Сааби Иисус Христозун метинниини.

¹⁵Онуштан, кардашлар, каави олун хем тутун ӱӱретмеклери, не ӱӱрендиниз лафлан йада биздӓн йолланмыш кийатлан.

¹⁶Кендиси бизим Сааби Иисус Христос хем бизим Аллах Бобамыз, ани севди бизи да иивергисиннӓн дивеч гиргинник хем каави умут верди,

¹⁷ко сизи ӱреклендирсин хем каавилесин хербир ии ишлӓн хем лафлан.