Read Tungag ПАВЛИНИН ИКИНӁИ КИЙАДЫ САЛОНИКЛИЛЕРӒ 3 Bible Online

ПАВЛИНИН ИКИНӁИ КИЙАДЫ САЛОНИКЛИЛЕРӒ 3 - Tungag bible

ПАВЛИНИН ИКИНӁИ КИЙАДЫ САЛОНИКЛИЛЕРӒ 3

¹Биткидӓ, кардашлар, дуа един бизим ичин, ки Аллахын сӧзӱ чабук даалсын хем метинненсин, ниӂӓ дӓ сиздӓ,

²да куртулалым есапсыз хем кӧтӱ адамнардан, зерӓ хепсиндӓ инан йок.

³Инанчтыр Сааби, Ангысы каавилейеӂек сизи хем кӧтӱ оландан коруйаӂэк.

⁴Биз умут койэрыз Саабийӓ сизин ичин, ани сиз таманнээрсыныз хем таманнайаӂэныз ону, не биз сизӓ сымарлээрыз.

⁵Сааби доорутсун сизин ӱреклеринизи Аллахын севгисинӓ хем Христозун дайанмасына.

⁶Иисус Христозун адыннан сымарлээрыз сизӓ, кардашлар, йыракланасыныз хербир кардаштан, ани хайлазлыкта йашээр, диил о ӱӱретмеклерӓ гӧрӓ, ани биздӓн каблеттиниз.

⁷Сиз кендиниз билерсиниз, несой лӓӓзым бензейӓсиниз бизӓ, зерӓ биз сиздӓ диилдик хайлазлыкта.

⁸Кимсейин екмеени ӂабадан имедик, ама ишледик хем саваштык, чалышарак геӂӓ-гӱндӱз, ки аарлык йапмайалым сизӓ.

⁹Диил, ани йок доорулуумуз аарлык йапмаа, ама кендимизи вердик сизӓ ӧрнек, ки бизӓ бензейӓсиниз.

¹⁰Ачан биз таа сиздӓ булунардык, сизӓ буну сымарладык: ким истӓмеер ишлесин, о дӱшмеер исин дӓ.

¹¹Биз ишидериз, ани кимилери сиздӓн хайлазлыкта йашээр, хич иш йапмээр, ама хербир ишӓ карышэрлар.

¹²Бӧлелеринӓ сымарлээрыз хем насаат верериз бизим Сааби Иисус Христозун адыннан, ани оннар услулукта ишлесиннӓр да кенди екмеени исиннӓр.

¹³Ама сиз, кардашлар, йорулмайын иилик йапмаа.

¹⁴Еер биркимсей сеслӓмӓрсейди бизим лафларымызы бу кийаттан, ону нышаннайын да онуннан баалантыныз олмасын, ки утандырылсын.

¹⁵Салт саймайын ону ниӂӓ бир душманы, ама акыл верин ниӂӓ бир кардаша.

¹⁶Кенди услулук верӓн Сааби баашласын сизӓ услулук херзаман хем хербир иш ӱзерӓ! Сааби сизиннӓн хепсинизлӓн олсун.

¹⁷Бӓн, Павли, бу селӓми йазэрым кенди елимнӓн. Бу беним нышаным хепси кийатларымда. Бӓн бӧлӓ йазэрым.

¹⁸Бизим Сааби Иисус Христоздан ииверги олсун хепсинизлӓн. /Амин./