Read Tungag ПАВЛИНИН ИЛК КИЙАДЫ ТИМОФЕЙӒ 3 Bible Online

ПАВЛИНИН ИЛК КИЙАДЫ ТИМОФЕЙӒ 3 - Tungag bible

ПАВЛИНИН ИЛК КИЙАДЫ ТИМОФЕЙӒ 3

¹Аслыдыр о сӧз, ани ким ӧзенер епископ [4] олсун, хавез ии ишӓ.

²Онуштан епископ лӓӓзым олсун мааналанмаз табеетли, бир карыйлан евли, айык, саа фикирли, есаплы, мусаафирӂи, беӂерик ӱӱретмӓӓ.

³Олмасын сарфошчу, дӱӱшчӱ, /тамах,/ ама йалпак олсун, кавга етмесин, пара севмесин.

⁴Ии куллансын кенди евини, ӧлӓ ки ушаклары бӱтӱн сайгыйлан ӧн версиннӓр.

⁵Зерӓ ким кенди евини кулланмаа беӂермеер, несой вар насыл гӱдӓбилсин Аллахын клисесини?

⁶Олмасын инана ени дӧнмӱшлердӓн, ки ходулланмасын да диавол гиби кабаатлы калмасын.

⁷Лӓӓзым, ки клиседӓн дышанда оланнардан бир ии инсан гиби танынсын, башка тӱрлӱ оннардан мааналанар хем дӱшӓр диаволун капканына.

⁸Хеп ӧлӓ диаконнар да дӱшер, сайгылы олсуннар, лафыны басан олмасыннар, ичкиӂилӓӓ верилмесиннӓр, тамах олмасыннар,

⁹инанын саклылыыны пак ӱзлӓн корусуннар.

¹⁰Буннар да ӧнӂӓ лӓӓзым дененсиннӓр, сора измет етсиннӓр, еер оннарда кусур олмарса.

¹¹Хеп ӧлӓ карылар сайгылы олсуннар, фитлейиӂи олмасыннар, айык олсуннар, инанч хербир иш ӱзерӓ.

¹²Диаконнар олсун бир карыйлан евли, ии куллансыннар ушакларыны хем кенди евлерини.

¹³Зерӓ диаконнар, ким ии измет едер, кендилеринӓ икрам еденер хем чок кыйышмак еденерлӓр инаннарында Иисус Христоза.

¹⁴Умутланэрым тездӓ гелейим сана. Ама сана буннары йазэрым,

¹⁵ки, еер биртӱрлӱ ойаланарсам, сӓн билӓсин, ниӂӓ дӱшер гӧтӱрмӓӓ кендини Аллахын евиндӓ, ани вар дири Аллахын клисеси, аслылыын дирӓӓ хем темели.

¹⁶Хич лафсыз, Аллахын йолунун саклылыы бӱӱктӱр: Аллах тенӂӓ гӧстерилди, Духлан Кендини доорулады, ангиллерӓ гӧрӱндӱ, миллетлердӓ насаат едилди, дӱннедӓ инаннан кабледилди, метинниклӓн йукары алынды.