Read Tungag ПАВЛИНИН ИЛК КИЙАДЫ ТИМОФЕЙӒ 5 Bible Online

ПАВЛИНИН ИЛК КИЙАДЫ ТИМОФЕЙӒ 5 - Tungag bible

ПАВЛИНИН ИЛК КИЙАДЫ ТИМОФЕЙӒ 5

¹Ихтӓры [5] серт азарлама, ама насаат вер она, ниӂӓ бобана. Насаат вер генч адамнара, ниӂӓ кардашларына;

²ихтӓр карылара, ниӂӓ анана; генч карылара, ниӂӓ кызкардашларына, бӱтӱн паклыклан.

³Хатыр гӱт дул карылара, ани хакына кимсейсиз.

⁴Ама еер бир дул карынын варса ушаклары еки унукалары, оннар ӱӱренсиннӓр Аллахын йолунда гитмӓӓ, илкин кенди айлесинӓ йардым етсиннӓр, иилик чевирсиннӓр ана-бобаларына, зерӓ буну Аллах беенер.

⁵Дул кары, ани хакына кимсейсиз хем йалныз калмыш, умудуну Аллаха койэр хем геӂӓ-гӱндӱз дурмамайӂа Она йалварэр хем дуа едер.

⁶Ама дул кары, ани кендини верер сефалык сӱрмейӓ, таа йашаркан, ӧлӱдӱр.

⁷Бу ишлери оннара аннат, ки маанасыз табеетли олсуннар.

⁸Еер биркимсей кенди йакыннары ичин, маасуз кенди айлеси ичин заамет гӱтмӓрсейди, о инаны инкӓр етмиш да таа бетердир, некадар бир инансыз.

⁹Ки ады дуллар листасына йазылсын, дул кары лӓӓзым олсун алтмыш йашындан йукары, бир коӂайлан евленмиш,

¹⁰ии ишлери ичин билинӓн, ушак бӱӱтмӱш, мусаафир каблетмиш, Аллахын айоз халкынын айакларыны йыкамыш [6], сыкынтыда оланнара йардым етмиш хем чалышканныклан хертӱрлӱ иилик йапмыш.

¹¹Таа генч дулларын адларыны листайа йазма. Зерӓ оннар, тенӂӓ истедиклери каавиледип Христоза каршы, енидӓн евленмӓӓ истеерлӓр.

¹²Озаман кабаатлы калэрлар, зерӓ бозэрлар еминнерини, ани илкин йаптылар.

¹³Ондан каарӓ, оннар ӱӱренерлӓр хайлак гезмӓӓ евдӓн евӓ, да диил саде хайлак гезмӓӓ, ама ченели олмаа хем башкаларын ишлеринӓ карышмаа, сӧлейерӓк, не дӱшмеер.

¹⁴Онуштан истеерим, ки генч дуллар евленсиннӓр, ушак дуудурсуннар, евлерини куллансыннар да каршы дурана колайлык вермесиннӓр, ки бизи кӧтӱлесин.

¹⁵Зерӓ кимиси оннардан шиндӓн сора саптылар да шейтанын ардына гиттилӓр.

¹⁶Еер бир инанӂы карынын дул йакыннары варса, лӓӓзым оннара баксын да зааметӓ коймасын клисейи, ки клисӓ йардым едӓбилсин дуллара, ани хакына кимсейсиз.

¹⁷Пресвитерлӓр, ани ии ӧндерлеерлӓр, лӓӓзым ики катына хатырлансыннар, айырыӂа оннар, ким ишлеер насаат етмектӓ хем ӱӱретмектӓ.

¹⁸Зерӓ Айоз Йазы деер: «Баалама ӧкӱзӱн аазыны, харман дӱӱйӓркӓн» хем «Ишчийӓ йарашэр кенди ӧдӓӓ».

¹⁹Кабаатландырмак пресвитерӓ каршы каблетмӓ, олмайынӂа ики-ӱч шаат.

²⁰Ким илери доору гӱнах йапэр, оннары таказала хепсинин ӧнӱндӓ, ки каланы да корксун.

²¹Аллахын, Иисус Христозун хем сечилмиш ангиллерин ӧнӱндӓ сени еминнеерим, ки пай тутмайарак хем кимсейин ӱзӱнӓ бакмайарак бу сымарламаклары таманнайасын.

²²Еллерини кимсейин ӱстӱнӓ тез койма, пай алма башкаларын гӱнахларында. Кендини пак тут.

²³Илери доору ичмӓ салт су, ама ич бираз шарап сенин катынын хем сык хасталыкларын бетеринӓ.

²⁴Кими инсаннарын гӱнахлары ачык, оннар ӧнӂӓ, даава олмадаан, билинер. Башкаларын гӱнахлары сора ачылэр.

²⁵Хеп ӧлӓ ии ишлӓр дӓ ачык, оннар да, ани диил ачык, йок насыл саклы калсын.