Read Tungag ПАВЛИНИН ИКИНӁИ КИЙАДЫ ТИМОФЕЙӒ 4 Bible Online

ПАВЛИНИН ИКИНӁИ КИЙАДЫ ТИМОФЕЙӒ 4 - Tungag bible

ПАВЛИНИН ИКИНӁИ КИЙАДЫ ТИМОФЕЙӒ 4

¹Еминнеерим сени Аллахын хем Сааби Иисус Христозун ӧнӱндӓ, Ангысы даава кесеӂек дирилерӓ хем ӧлӱлерӓ, зерӓ О, гелип, падишахлык едеӂек.

²Аллахын сӧзӱнӱ хаберлӓ, херзаман чалыш бу иштӓ, ии вакытта хем зор вакытта. Инандыр, таказала, ӱреклендир, ӱӱредерӓк бӱтӱн сабурлуклан.

³Зерӓ вакыт гелеӂек, ачан саа ӱӱретмеклерӓ дайанамайаӂэклар, ама йаннарына топлайаӂэклар ӱӱредиӂилери кенди истедиклеринӓ гӧрӓ, ки назландырсыннар оннары.

⁴Кулакларыны тыкайаӂэклар, ки сеслӓмесиннӓр аслылыы, йолдан сапарак, масаллара давранаӂэклар.

⁵Ама сӓн хербир иш ӱзерӓ кушку ол, зеетлерӓ дайан, Ии Хабери насаат ет, изметчилиини таманна.

⁶Зерӓ шиндӓн сора беним каным дӧкӱлеӂек, ниӂӓ шарап курбанын ӱстӱнӓ, беним ичин гечинмӓк вакыды йаклашты.

⁷Ии савашта дӱӱштӱм, йарышы битирдим, инаны корудум.

⁸Шиндӓн сора бана хазыр дурэр доорулук фенеци, ани Сааби, Доору Дааваӂы, о Гӱндӓ вереӂек бана, диил саде бана, ама хепсинӓ, ким ӧзлемӓклӓн беклеер Онун гелмесини.

⁹Некадар тез чалыш бана гелмӓӓ.

¹⁰Зерӓ Димас бени бракты, чӱнкӱ таа чок севди бу дӱннейи да гитти Салоник касабасына. Крискис гитти Галатийайа, Тит — Далматийайа.

¹¹Салт бир Лука калды бенимнӓн. Ал Маркы да гетир сениннӓн, зерӓ о бана йардымӂы олар изметтӓ.

¹²Бӓн Тихики йолладым Ефес касабасына.

¹³Ачан гелеӂӓн, гетир йаамурлуу, ани брактым Троада касабасында Карпын евиндӓ. Гетир кийатлары, айыры, пергаментлери [1].

¹⁴Бакырӂы Александру чок феналык бана йапты. Сааби ӧдесин онун ишлеринӓ гӧрӓ!

¹⁵Сӓн дӓ сакын ондан, зерӓ чок каршы дурду бизим сӧзлеримизӓ.

¹⁶Илк корунмак лафымда кимсей беним тарафымда калмады, хепси бени бракты. Бунун ичин оннардан есап сорулмасын!

¹⁷Ама Сааби беним йанымдайды, О бени каавиледи, ки насаат иши таманнансын беним аазымнан, да хепси миллетлӓр ону ишитсиннӓр. Бӧлӓ асланын аазындан куртулдум.

¹⁸Сааби бени хертӱрлӱ кӧтӱлӱктӓн куртараӂэк да Кенди Гӧктеки Падишахлыы ичин коруйаӂэк. Она метинник дивечтӓн дивеӂӓ! Амин.

¹⁹Селӓм вер Прискиллайа хем Акилайа хем Онисифорун евдекилеринӓ.

²⁰Ераст калды Коринф касабасында. Трофими хаста брактым Милит касабасында.

²¹Чалыш кыштан ӧнӂӓ бана гелмӓӓ. Селӓм сана верер Еввул, Пуденс, Лин, Клавдийа хем хепси кардашлар.

²²Сааби /Иисус Христос/ олсун сенин духуннан. Сизиннӓн ииверги олсун. /Амин./