Read Tungag ПАВЛИНИН КИЙАДЫ ТИТА 3 Bible Online

ПАВЛИНИН КИЙАДЫ ТИТА 3 - Tungag bible

ПАВЛИНИН КИЙАДЫ ТИТА 3

¹Инанӂылара аклына гетир, кулланыӂылара хем заабитлерӓ ӧн версиннӓр, оннары сеслесиннӓр да хербир ии ишӓ хазыр олсуннар.

²Кимсейи кӧтӱлӓмесиннӓр, кавга йапмасыннар, ама хербир иш ӱзерӓ йаваш хепси инсаннарлан олсуннар.

³Зерӓ биз кендимиз да, вакыдын бириндӓ фикирсиз, сеслӓмейиӂи хем шашыктык. Измет едӓрдик тӱрлӱ хамеллерӓ хем кефлерӓ. Йашардык кинниктӓ хем кысканчлыкта. Хепси биздӓн, биз дӓ бири-биримиздӓн азетмӓрдик.

⁴Ама ачан ачылды Аллахын, бизим Куртарыӂынын, иилии хем инсана севгиси,

⁵О куртарды бизи диил бизим доору йаптыкларымыз ичин, ама Кенди аӂыйанныыннан. Зерӓ О йыкады бизи, енидӓн дуудурарак хем енилейерӓк Айоз Духлан,

⁶Ангысыны зебилликтӓн дӧктӱ бизим ӱстӱмӱзӓ Куртарыӂымыз Иисус Христозлан,

⁷ки биз Онун иивергисиннӓн доору сайылалым да, ниӂӓ умутланэрыз, мирасчы дивеч йашамакта олалым.

⁸Аслыдыр бу сӧз, да бӓн истеерим, ани сӓн буннары каавилейӓсин, ки оннар, ким Аллаха инанды, баксыннар кендилерини вермӓӓ ии ишлерӓ, зерӓ буннар ии хем файдалы адама.

⁹Ахмак чекишлердӓн хем сенселӓ дизиннериндӓн, кавгалардан хем денклешмеклердӓн Закон ичин сӓн сакын. Зерӓ буннар файдасыз хем бошуна иш.

¹⁰Инсан бӧленнердӓн, бир-ики азарламактан сора, йыраклан.

¹¹Бил, ани оннар доору йолдан саптылар хем гӱнах йапэрлар, да кенди-кендилеринӓ даава едерлӓр.

¹²Ачан сана Артемайы йада Тихики йоллайаӂам, алатла гелмӓӓ бана Никополис касабасына, зерӓ орада, дӱшӱндӱм, кышлайым.

¹³Адвокат Зенайы хем Аполлосу йоллайаӂэйкан йола, чалыш, ки оннарын бишей ичин лӓӓзымныклары олмасын.

¹⁴Ко бизимкилӓр дӓ ӱӱренсиннӓр кендилерини вермӓӓ ии ишлерӓ да йардым етмӓӓ зорлукта оланнара, ки мейвасыз калмасыннар.

¹⁵Сана селӓм йоллээр хепси, ким бенимнӓн билӓ булунэр. Селӓмнӓ оннары, ким инанда бизи север. Сизиннӓн хепсинизлӓн ииверги олсун. /Амин./