Read Tungag ПАВЛИНИН КИЙАДЫ ФИЛИМОНА 1 Bible Online

ПАВЛИНИН КИЙАДЫ ФИЛИМОНА 1 - Tungag bible

ПАВЛИНИН КИЙАДЫ ФИЛИМОНА 1

¹Бӓн, Павли, Иисус Христос ичин капанӂы, хем кардаш Тимофей, селӓм йоллээрыз сана, Филимона, ани бизим севгили кафадарымыз иштӓ,

²кызкардаш Апфийайа, Архипӓ, ани бизим кафадарымыз бир дӱӱштӓ, хем сенин евдеки клисенӓ.

³Ииверги сизӓ хем услулук бизим Аллах Бобадан хем Сааби Иисус Христоздан.

⁴Шӱкӱр едерим беним Аллахыма, херзаман сени анарак беним дуаларымда,

⁵зерӓ ишиттим, ниӂӓ инандын Сааби Иисуса хем ниӂӓ северсин Аллахын хепси айоз халкыны.

⁶Дуа едерим, ки сӓн чалышкан оласын хаберлемектӓ сенин инаныны, чӱнкӱ таныйэрсын хербир иилии, ангысыны каблеттик Иисус Христоздан.

⁷Зерӓ биз пек севиндик хем ӱреклендик сенин севгин ичин, зерӓ сениннӓн, кардашым, хошланды айозларын ӱреклери.

⁸Макар ки Христозда вар кыйышмаклыым, сана сымарлайым, ки йапасын, не лӓӓзым,

⁹сайэрым, таа ислӓӓ йалварайым сана севгийлӓн. Зерӓ йалваран диил башкасы, ама бӓн, ихтӓр Павли, ани шинди Иисус Христос ичин капанӂы.

¹⁰Йалварэрым сана беним ушаам ичин, Онисим [1] ичин, ангысыны дуудурдум, булунарак баалы синӂирлӓрлӓн.

¹¹Бир вакыт о сана йарамарды, ама шинди йарар хем сана, хем бана.

¹²Ону, ким беним ӱрӓӓм, сана геери йоллээрым.

¹³Бӓн истедим ону йанымда тутайым, ки сенин еринӓ измет етсин бана бу синӂирлердӓ, нейлӓн баалыйым Ии Хабер ичин.

¹⁴Ама изин олмайынӂа сендӓн, истӓмедим буну йапмаа. Истедим, иилик йапасын диил зорланмыш, ама ии истедииндӓн.

¹⁵Зерӓ олабилир, ани о бир парча вакыда айырылды сендӓн, ки геери ону аласын херзамана,

¹⁶диил ниӂӓ бир чыраа, ама таа ӱстӱн чырактан, олсун ниӂӓ бир севгили кардаш, чок беним ичин, ама таа чок сенин ичин, ниӂӓ бир инсан, хеп ӧлӓ ниӂӓ бир инанӂы Саабидӓ.

¹⁷Еер сӓн бени пайдаш сайарсайдын, каблет ону, ниӂӓ бени.

¹⁸Еер сени бишейлӓн гӱӂендирдийсӓ еки борчлуйса сана, кой оннары беним ӱстӱмӓ.

¹⁹Бӓн, Павли, йаздым кенди елимнӓн: кендим ӧдейеӂӓм. Демеерим, ани сӓн кендин дӓ бана борчлуйсун.

²⁰Хакына, кардашым, вер бана колайлык Саабидӓ сендӓн файдаланайым, хошландыр беним ӱрееми Христозда.

²¹Йаздым сана, чок инанарак, ани сӓн сеслейеӂӓн, да билерим, ани йапаӂан таа чок, некадар бӓн истеерим.

²²Хеп ӧлӓ хазырла бир ер бана, калайым сендӓ, зерӓ умутланэрым, сизин дуаларынызлан, чыкып капандан, гелейим сизӓ.

²³Селӓм йоллээр сана Епафрас, ани капанӂы бенимнӓн билӓ Иисус Христос ичин,

²⁴Марк, Аристарх, Димас, Лука, беним кафадарларым.

²⁵Бизим Сааби Иисус Христоздан ииверги сизин духунузлан олсун. /Амин./