Read Tungag КИЙАТ ЧЫФЫТЛАРА 10 Bible Online

КИЙАТ ЧЫФЫТЛАРА 10 - Tungag bible

КИЙАТ ЧЫФЫТЛАРА 10

¹Айоз Закон, ангысында вар салт гелӓр ииликлерин гӧлгеси, ама диил хакына ишлерин аслысы, хеп о курбаннарлан, ани йылдан йыла дурмамайӂа гетирилер, йок ниӂӓ таман йапсын оннары, ким Аллаха йаклашэр.

²Башка тӱрлӱ дургунаӂэйдылар курбаннары гетирмӓӓ, зерӓ оннар, ким измет едер Аллаха, бир керӓ пакландыктан сора дуймаздылар ӱреклериндӓ кендилерини гӱнахкер.

³Ама бу курбаннар йыл йылдан инсанын аклына гетирер гӱнахларыны.

⁴Зерӓ йок насыл буалар хем текелӓр каны гӱнахы йок етсин.

⁵Онуштан Христос, гелип бу дӱннейӓ, деди Аллаха: «Сӓн курбан хем баашыш истӓмедин, ама бир гӱӱдӓ Бана хазырладын.

⁶Хептӓн йакылан хайваннары хем гӱнах ичин курбаннары Сӓн беенмедин.

⁷Озаман дедим: „Тӓ, гелерим, ниӂӓ Закон кийадында йазылы Беним ичин, ей, Аллах, ки Сенин истедиини йапайым!“»

⁸Христос баштан деди: «Не курбаннары, не баашышлары, не хептӓн йакылан хайваннары, не гӱнах ичин курбаннары Сӓн истӓмедин хем беенмедин, макар ки буннар Закона гӧрӓ гетирилер».

⁹Сора екледи: «Тӓ, гелерим, /ей, Аллах,/ ки Сенин истедиини йапайым». Илкинкисини ортадан калдырыр, ки еринӓ икинӂисини койсун.

¹⁰Аллахын бу истемесинӓ гӧрӓ, биз айозландык бир сыра херзамана, ачан Иисус Христос курбан гетирди Кенди гӱӱдесини.

¹¹Хербир попаз, гӱн гӱндӓн изметчилик йапарак, чок сыра гетирер хеп о курбаннары, ангылары бир сыра билӓ йок едӓмӓз гӱнахы.

¹²Ама О, Кендини гетирип салт бир сыра курбан гӱнахлар ичин, отурду херзамана Аллахын саа тарафына.

¹³Шиндӓн сора беклеер, душманнары койулсун Онун айаклары алтына.

¹⁴Зерӓ О бир курбаннан таман йапты херзамана оннары, ким айозланмак йолунда.

¹⁵Бунун ичин бизӓ шаатлык едер Айоз Дух да, дейип:

¹⁶«Тӓ, будур бааланты, ани о гӱннердӓн сора оннарлан йапаӂам, деер Сааби: Беним законнарымы оннарын ӱреклеринӓ койаӂам хем оннарын фикирлеринӓ йазаӂам.

¹⁷Артык оннарын гӱнахларыны хем законсузлукларыны аклыма гетирмейеӂӓм».

¹⁸Ама нередӓ гӱнах афедилмиш, орада йок лӓӓзымнык гӱнах ичин курбан гетирмӓӓ.

¹⁹Ӧлӓ ки, кардашлар, Иисус Христозун каныннан вар насыл кыйышмаклан Ен айоз ерӓ ени хем дири йолдан гирелим.

²⁰Бу йолу О ачты бизӓ ичйанкы пердейлӓн, ангысы Онун гӱӱдесидир.

²¹Бир бӱӱк Попазымыз да вар койулу Аллахын евинин ӱстӱнӓ.

²²Онуштан йаклашалым Аллаха пак ӱреклӓн хем каави инаннан, серпип ӱзлеримизи, кӧтӱ неетлердӓн паклайалым хем гӱӱдемизи темиз суйлан йыкайалым.

²³Салланмадык о умуттан тутуналым, ангысы ичин шаатлык едериз, зерӓ адамак верӓн инанчтыр.

²⁴Чалышалым бири-биримизи хавезлендирмӓӓ, ки севгийлӓн иилик йапалым.

²⁵Топлантыларымыздан бракылмайалым, ниӂӓ кимилери алышты, ама окадар таа чок бири-биримизи ӱреклендирелим, некадар таа чок гӧрерсиниз, ани о Гӱн йаклашты.

²⁶Зерӓ еер биз, ким аслылыы ӱӱренди хем каблетти, истейерӓк гӱнах йапарсак, озаман башка бир курбан гӱнахларымыз ичин калмаз.

²⁷Калэр, салт коркуйлан бекленилсин даава вакыды хем кызгын атеш, ани йок едеӂек душманнары.

²⁸Еер оннар, ангылары Моисейин законуну басарды, ики-ӱч кишинин шаатлыыннан аӂыйанныксыз ӧлдӱрӱлӱрсӓ,

²⁹сиз не деерсиниз? Некадар таа бӱӱк ӂеза кабледеӂек о, ким Аллахын Оолуну чиинемиш, бааланты каныны ашааламыш, нейлӓн айозландыйды, да бутакым Аллахын хайырлы Духуну гӱӂендирмиш.

³⁰Биз таныйэрыз Ону, Ким деди: «Кин чыкармак Беним ишим, кӧтӱлӱклӓр ичин Бӓн ӧдейеӂӓм, деер Сааби» хем «Сааби Кенди даава кесеӂек инсанына».

³¹Титсидир, дӱшӓсин дири Аллахын елинӓ!

³²Аклына гетирин баштан вакытлары, ачан айдынныы гӧрдӱктӓн сора, чок савашып, аӂы чектиниз.

³³Кими керӓ таказаланып хем зеетленип, аалемин гӱлӱнтӱсӱ олдунуз. Кими керӓ пай алдыныз оннарлан, ангылары хеп бу денемеклердӓн гечирдилӓр.

³⁴Сиз аӂыдыныз оннары, ким капанда булунду; варлыынызын кайыплыыны севинмӓклӓн каблеттиниз, чӱнкӱ билерсиниз, ани /гӧктӓ/ таа ии хем гечмӓз бир варлык еденеӂениз.

³⁵Ӧлӓ ки бракмайын гиргинниинизи, ангысы ичин бир бӱӱк баашыш олаӂэк.

³⁶Сизӓ дайанмак лӓӓзымдыр, ки, таманнайып Аллахын истедиини, кабледӓсиниз, не аданмыш сизӓ.

³⁷Зерӓ, ниӂӓ Аллах деер Айоз Йазыда, «аз, пек аз калды да Гелӓн гелеӂек, хич ойаланмайаӂэк.

³⁸Беним доору оланнарым инаннан йашайаӂэклар, ама ким геери чекилер, оннары беенмӓм».

³⁹Биз диилиз оннардан, ким геери чекилер да кайбелер, ама оннардан, ким инанэр да ӂаныны коруйэр.