Read Tungag КИЙАТ ЧЫФЫТЛАРА 3 Bible Online

КИЙАТ ЧЫФЫТЛАРА 3 - Tungag bible

КИЙАТ ЧЫФЫТЛАРА 3

¹Ӧлӓ ки, айоз кардашларым, сиз, ани бизимнӓн билӓ гӧкӓ чаарылдыныз, чевирин бакышынызы Апостола хем Баш попаза, Ангысыны шаатлык едериз инанда, Иисуса.

²Иисус, ниӂӓ дӓ Моисей, бӱтӱн Аллахын евиндӓ инанчты Аллаха, Ким койду Ону бу изметчилӓӓ.

³Онуштан Аллах уйгун булду, ани Иисуса таа бӱӱк метинник верилсин, некадар Моисейӓ, ӧлӓ ниӂӓ еви йапан таа чок хатырланэр, некадар ев.

⁴Зерӓ хербир ев йапылы биркимсейдӓн, ама хепсини йапан — Аллахтыр.

⁵Хакына, ани Моисей «инанчты бӱтӱн Аллахын евиндӓ», ниӂӓ изметкӓр, шаатлык етсин дейни о ишлӓр ичин, не сора хаберленеӂейди.

⁶Ама Христос, ниӂӓ Оол, инанчты Аллаха Кенди евиндӓ. Онун еви — биз, еер кыйышмаклан /биткийӓдӓн/ коруйарсак умуду, нейлӓн ӱӱнериз.

⁷Онуштан, ниӂӓ Айоз Дух деер: «Бӱӱн, еер ишидирсениз Аллахын сесини,

⁸инатлаштырмайын ӱреклеринизи, бензӓмейин деделеринизӓ, ангылары, баш калдырып, денедилӓр Ону чол ердӓ.

⁹Орада денедилӓр Бени, бактылар аннамаа аслысыны Беним ичин, макар ки гӧрдӱлӓр Беним йаптыкларымы кырк йыл.

¹⁰Онуштан о бой инсан дарсытты Бени, да бу бетерӓ дедим: „Оннар херзаман шашык ӱрекли адамнар, Беним йолларымы танымадылар.

¹¹Онуштан Бӓн ӱфкейлӓн емин еттим, ани оннар гирмейеӂеклӓр Беним раатлыыма“».

¹²Кардашлар, бакын, олмасын сиздӓн бирисиндӓ фена хем инансыз бир ӱрек, ангысы атылэр дири Аллахтан.

¹³Ӱреклендирин бири-биринизи хер гӱн, окадар вакыт, некадар денер «Бӱӱн», ки бириниз билӓ инатлаштырмасын ӱреени, алданарак гӱнахлан.

¹⁴Чӱнкӱ олэрыз пайӂы Христозлан билӓ, еер баштан биткийӓдӓн умудун темелини каави тутарсак.

¹⁵Ниӂӓ ӧнӂӓ дедик: «Бӱӱн, еер ишидирсениз Аллахын сесини, инатлаштырмайын ӱреклеринизи деделериниз гиби, ачан баш калдырдылар».

¹⁶Зерӓ кимдир оннар, ким ишиттиктӓн сора баш калдырды? Диил ми хепси оннар, ким Моисейин йардымыннан Мысырдан чыктылар?

¹⁷Кимди оннар, ким Ону кырк йыл дарсытты? Диил ми оннар, ани гӱнаха гирдилӓр да ӧлӱп-дӱштӱлӓр чол ердӓ?

¹⁸Кимин ичин О емин етти, ани гирмейеӂеклӓр Онун раатлыына? Диил ми оннар ичин, ангылары сеслӓмедилӓр?

¹⁹Ӧлӓ ки, гӧрериз, ани оннар гирӓмедилӓр инансызлык бетеринӓ.