Read Tungag КИЙАТ ЧЫФЫТЛАРА 8 Bible Online

КИЙАТ ЧЫФЫТЛАРА 8 - Tungag bible

КИЙАТ ЧЫФЫТЛАРА 8

¹Сӧледиклеримизин ӧзӱ будур: биздӓ вар ӧлӓ бир Баш попаз, Ангысы гӧклердӓ отурду бӱӱк Аллахын чорбаӂылык скемнесинин саа тарафында.

²О изметчидир Айоз ердӓ, хакына Булушмак Чадырында, ани курулу Кендиндӓн Саабидӓн, ама диил инсандан.

³Хербир баш попаз сыралы, ки гетирсин баашыш хем курбан. Онуштан лӓӓзым олду, ки бу Баш попаз да гетирсин курбан.

⁴Еер О калайды бу ердӓ, олмайаӂэйды попаз, зерӓ вар башка попазлар, ани Закона гӧрӓ баашыш гетирерлӓр.

⁵Оннар измет едерлӓр гӧктекилерин бенземесинӓ хем гӧлгесинӓ, ниӂӓ Аллах сӧледи Моисейӓ, ачан йапаӂэйды Булушмак Чадырыны: «Бак да йап хепсини ӧрнӓӓ гӧрӓ, не гӧстерилди сана байыр ӱстӱндӓ».

⁶Ама шинди Христос еденди окадар таа ӱстӱн изметчилик, некадар таа ӱстӱн баалантынын араӂысы олду, зерӓ бу бааланты курулу таа ии адамакларлан.

⁷Еер илк бааланты кусурсуз олайды, лӓӓзымнык дуйулмайаӂэйды башка баалантыйа.

⁸Ама Аллах, илк баалантыда, маана буларак оннара, деер: «Тӓ, гелер гӱннӓр, деер Сааби, ачан бир ени бааланты йапаӂам Израилин хем Иуданын миллетиннӓн.

⁹Диил ӧлӓ бир бааланты, ниӂӓ йаптым оннарын бобаларыннан, ачан, еллериндӓн тутуп, чыкардым оннары Мысырдан, зерӓ оннар Беним баалантыма инанч калмадылар, онуштан Бӓн дӓ касаветсиз олдум оннар ичин, деер Сааби.

¹⁰Тӓ, будур бааланты, не Израил миллетиннӓн йапэрым о гӱннердӓн сора, деер Сааби: Беним законнарымы оннарын фикирлеринӓ койаӂам хем ӱреклеринӓ йазаӂам. Бӓн оннарын Аллахы олаӂам, оннар да Беним халкым олаӂэклар.

¹¹Кимсей ӱӱретмейеӂек йакын оланыны хем кенди кардашыны, дейип: „Саабийи таны“, зерӓ кӱчӱк-бӱӱк, хепси Бени таныйаӂэк.

¹²Зерӓ оннарын законсузлукларыны афедеӂӓм хем гӱнахларыны таа аклыма гетирмейеӂӓм».

¹³Дейип «ени», гӧстерди, ани илкинкиси ескийди, ама не ески хем чоктанкы, о йакын сонуна.