Read Tungag ИАКОВУН КИЙАДЫ 1 Bible Online

ИАКОВУН КИЙАДЫ 1 - Tungag bible

ИАКОВУН КИЙАДЫ 1

¹Бӓн, Иаков, Аллахын хем Сааби Иисус Христозун чыраа, дааныкта оники тамызлаа селӓм йоллээрым.

²Бӱтӱн севинмеликлӓн кабледин, кардашларым, ачан гечерсиниз хертӱрлӱ денемеклердӓн,

³билерӓк, ани денемеклӓр инанда сизи дайанмайа алыштырэр.

⁴Бакын, дайанмак ишини таман йапсын, ки сиз таманнанмыш хем кусурсуз оласыныз, хем хич бир кедериниз олмасын.

⁵Еер сиздӓн бирисинӓ аарифлик етишмӓрсейди, истесин Аллахтан, Ангысы ӂӧмертликлӓн херкезинӓ верер, хич маана аарамээр, да она верилеӂек.

⁶Ама салт инаннан истесин, хич шӱпеленмейерӓк, зерӓ ким шӱпеленер, о бензеер дениз далгасына, ани лӱзгердӓн кооланэр хем саурулэр.

⁷Бӧлӓ адам санмасын, ани Саабидӓн бишей кабледеӂек.

⁸Адам, ани икилеер, карарсыздыр хепси йаптыкларында.

⁹Ашаа бойдан кардаш севинсин кенди ӱӱсеклииннӓн.

¹⁰Зенгин олан ӱӱнсӱн кенди алчаклыыннан, зерӓ о да кыр чичӓӓ гиби гечеӂек.

¹¹Ачан гӱн кызгын сыӂааннан дууэр, от куруйэр, отун чичӓӓ ерӓ дӱшер, гӧрӱшӱ хем гӧзеллии кайбелер. Хеп ӧлӓ зенгин олан да, кенди ишлерини йапаркан, сӧрпешер.

¹²Не мутлу адам, ким дайанмаклан денемеклери гечирер, зерӓ, дененмиш олуп, йашамак фенецини кабледеӂек, ани адады Сааби хепсинӓ оннара, ким Ону север.

¹³Ким дененмектӓ йанылэр, демесин: «Аллах бени йанылтты», зерӓ Аллах Кенди кӧтӱлӱклӓн йанылдылмаз хем башка биркимсейи дӓ йанылтмаз.

¹⁴Ама херкез, ким йанылэр, кенди истемесиннӓн чекилмиш, алданэр.

¹⁵Сора истемеси, гебӓ калып, гӱнахы дуудурэр, гӱнах да, олгуннандыйнан, ӧлӱм гетирир.

¹⁶Севгили кардашларым, алданмайын!

¹⁷Хер ии верги хем хер таман баашыш йукардан гелер, Бобадан, Ани йаратты гӧктеки шафклары, да Ангысында йок диишилмӓк не дӓ дӧнеклик гӧлгеси.

¹⁸О Кенди истедиинӓ гӧрӓ йапты, ки биз дууалым аслылык сӧзӱннӓн да еденелим илк ери оннарын арасында, не О йаратты.

¹⁹Буну ии билин, севгили кардашларым, херкези сеслемейӓ чабук олсун, лафетмейӓ йаваш хем ӱфкеленмейӓ сабур олсун.

²⁰Зерӓ инсан ӱфкеси Аллахын доорулууну йапамаз.

²¹Онуштан бракылын хертӱрлӱ кирли ишлердӓн хем кӧтӱлӱктӓн, ани хер тарафа йайылмыш, да йавашлыклан кабледин екилмиш сӧзӱ, ани вар ниӂӓ куртарсын ӂаннарынызы.

²²Аллахын сӧзӱнӱ саде ишитмӓклӓн кендинизи алдатмайын, Аллахын сӧзӱнӱн таманнайыӂылары олун.

²³Зерӓ ким сӧзӱ ишидип таманнамээр, о адам бензӓр олэр бирисинӓ, ангысы айнада бакэр ӱзӱнӓ да гӧрер, насылдыр кендиси,

²⁴бактыктан сора гидер да, несой кендиси, хемен унудэр.

²⁵Ама ким ии бакэр о таман Закона, ани сербестлик верер, да ону илери доору таманнээр, диил ниӂӓ бир унудан сеслейиӂи, ама ниӂӓ бир чалышкан ишчи, бу адам кенди ишиндӓ мутлу олаӂэк.

²⁶Еер биркимсей кендини аллахчы сайарсайды, ама кенди дилини запламарсайды, о кенди-кендини алдадэр, онун аллахчылыы да наафилӓ.

²⁷Аллах Бобанын ӧнӱндӓ темиз хем кусурсуз аллахчылык будур: зеет чекӓн ӱӱсӱзлери хем дуллары долашмаа хем кендини дӱннедӓн лекесиз тутмаа.