Read Tungag ИАКОВУН КИЙАДЫ 4 Bible Online

ИАКОВУН КИЙАДЫ 4 - Tungag bible

ИАКОВУН КИЙАДЫ 4

¹Нередӓн сиздӓ дӱӱшлӓр хем кавгалар? Диил ми сизин истемелериниздӓн, не сизин гӱӱделеринизин еклериндӓ ӂенклешер?

²Истейип, еденӓмеерсиниз, онуштан ӧлдӱрерсиниз. Хасеетленерсиниз, ама не истеерсиниз, етишӓмеерсиниз. Кавга едерсиниз хем дӱӱшерсиниз, ама еденӓмеерсиниз, зерӓ Аллахтан истӓмеерсиниз.

³Истейип, каблетмеерсиниз, зерӓ истеерсиниз кӧтӱ неетлӓн, ки файдаланасыныз салт кенди сефалыыныз ичин.

⁴Сиз ороспулар! Билмеерсиниз ми, ани дӱннейлӓн достлук — Аллаха душманнык! Ӧлӓ ки, ким истеер дӱннейлӓн дост олмаа, о душман олэр Аллаха.

⁵Оса санэрсыныз, бошуна мы Айоз Йазыда денер: «Аллах кызгынныклан истеер духу, ангысыны койду ичимизӓ».

⁶Ама О бизӓ таа бӱӱк бир хайыр баашлээр, онуштан деер: «Аллах шишкиннерӓ каршы дурэр, ама йалпаклара хайыр баашлээр».

⁷Аллахын запына верилин, диавола каршы дурун, да о сиздӓн качаӂэк.

⁸Еер сиз Аллаха йаклашарсайдыныз, О да сизӓ йаклашаӂэк. Еллеринизи паклайын, ей, гӱнахкерлӓр! Ӱреклеринизи темизлейин, ей, карарсызлар!

⁹Кахырланын, аалайын хем сызлайын. Сизин гӱлӱшӱнӱз аалайыша хем севинмениз гӱчлӓӓ дӧнсӱн.

¹⁰Йаваш олун Саабинин ӧнӱндӓ, да О ӱӱсеклендиреӂек сизи.

¹¹Бири-бириниз ичин фена лафетмейин, кардашлар. Ким фена лафедер йада даава кесер кардашына, о фена лафедер хем даава кесер Айоз Закона. Ама еер сӓн даава кесӓрсейдин Закона, озаман сӓн диилсин закону таманнайан, ама закона дааваӂы.

¹²Аллах, закон куран хем даава кесӓн — бирдир. О куртарэр, О да йок едер. Ама сӓн кимсин, ани башкасына даава кесерсин?

¹³Шинди сеслейин сиз, ани деерсиниз: «Бӱӱн йада йаарына филан касабайа гидеӂез, орада бир йыл йашайаӂэз, алыш-вериш йапаӂэз да пара казанаӂэз».

¹⁴Сиз билмеерсиниз, не йаарына сизиннӓн олаӂэк! Зерӓ недир сизин йашаманыз? Йашамак бир буу гибидир, аз вакыт гӧрӱнер, сонда йок олэр.

¹⁵Сиз башка тӱрлӱ дейин: «Еер Аллах истӓрсейди, да биз йашарсайдык, буну еки ӧбӱрӱнӱ йапарыз».

¹⁶Ама шинди ӱӱнерсиниз хем шишкинниклӓн лафедерсиниз. Бутӱрлӱ ӱӱнмеклӓр херзаман кӧтӱ.

¹⁷Ӧлӓ ки, ким билер ниӂӓ йапмаа иилик да йапмээр, о гӱнах йапэр.