Read Tungag ПЕТРИНИН ИЛК КИЙАДЫ 3 Bible Online

ПЕТРИНИН ИЛК КИЙАДЫ 3 - Tungag bible

ПЕТРИНИН ИЛК КИЙАДЫ 3

¹Хеп ӧлӓ сиз, карылар, ӧн верин кенди коӂаларыныза, ки оннар, ани сеслӓмеерлӓр Аллахын сӧзӱнӱ, карыларынын йашамасындан лафсыз казанылмыш олсуннар,

²гӧрӱп сизин темиз хем икрамны йашаманызы.

³Сизин гӧзеллииниз дышандан олмасын, сӧз гелиши, сач ӧрмелери, алтын такымнар еки рубалар, не гиийерсиниз,

⁴ама олсун ичйандан саклы ӱректӓ бир инсан, сӧрпешмӓз гӧзелликтӓ йаваш хем услу духлан, не Аллахын ӧнӱндӓ чок паалы.

⁵Бутакым евелдӓн айоз карылар донандылар, ким Аллаха умутларыны койарды хем кенди коӂаларына ӧн верӓрди,

⁶ниӂӓ Сарра сеслӓрди Авраамы да она «чорбаӂым» дейӓрди. Сиз Сарранын ушаклары олдунуз, еер иилик йапарсайдыныз да хич бишейдӓн коркмарсайдыныз.

⁷Хеп ӧлӓ сиз дӓ, коӂалар, карыларыныза аннар адамнар олун. Карылара хатыр гӱдӱн, зерӓ оннар сиздӓн таа йуфка, ама сизиннӓн барабар мирасчы олаӂэклар дивеч йашамак баашышына. Ӧлӓ ки сизин дуаларынызда кӧстек олмасын.

⁸Олун хепсиниз бир нееттӓ, пай алын башкаларынын зорлукларында, кардашлары севин, йалпак хем мӱнӱз ӱрекли олун.

⁹Чевирмейин кӧтӱлӱк ичин кӧтӱлӱк еки сӱӱмӓк ичин сӱӱмӓк, ама иисӧзлейин, зерӓ билерсиниз, ани чаарылдыныз, мирасчы оласыныз иисӧзлемеклерӓ.

¹⁰Зерӓ «ким север йашамайы хем ии гӱннӓр истеер гӧрсӱн, о кӧтӱлӱктӓн лӓӓзым дилини дургутсун хем аазыннан йалан сӧлӓмесин.

¹¹Феналыктан узаклансын, иилик йапсын, барышмаклыы аарасын да онун ардындан гитсин.

¹²Зерӓ Саабинин гӧзлери дооруларын ӱстӱндӓдир хем Онун кулаклары дуаларыны ишидер. Ама Сааби оннара каршы дурэр, ким кӧтӱлӱк йапэр».

¹³Ким сизӓ фена йапэр, еер сиз иилик йапмаа чалышкан олурсайдыныз?

¹⁴Еер зеетленирсейдиниз дӓ доорулук ичин, не мутлу сизӓ! Коркмайын, недӓн инсан коркэр, хем кахырланмайын.

¹⁵Христозу ӱреклериниздӓ айозлайын, ниӂӓ Саабийи. Херзаман хазыр олун ӂувап етмӓӓ херкезинӓ, ким истеер есап умут ичин, ани сиздӓ вар. Саде йапын буну йалпаклыклан хем сайгыйлан.

¹⁶Сизин ӱзӱнӱз пак олсун, ки, ачан фена лаф сӧлеерлӓр оннар, ким кӧтӱлеер сизин ии йашаманызы, ани Иисус Христоза баалы, утанмыш калсыннар.

¹⁷Зерӓ еер Аллах истӓрсейди, таа иидир зеетленмӓӓ ии ишлӓр ичин, некадар кӧтӱ ишлӓр ичин.

¹⁸Чӱнкӱ Христос, гетирсин бизи Аллаха дейни, бир керӓ ӧлдӱ гӱнахларымыз ичин, доору олан доору олмайаннар ичин. О гӱӱдейӂесинӓ ӧлдӱрӱлдӱ, ама духчасына дирилдилди.

¹⁹О, Духлан гидип, насаат етти духлара, ангылары зынданда.

²⁰Бир вакыт сеслӓмемиштилӓр оннар, ангыларыны Аллах дайанмаклан бекледи, геми йапыларкан Нойун гӱннериндӓ. О гемидӓ пек азлык судан [1] куртулду, салт секиз киши.

²¹Бу олуш ваатизлӓӓ бензеер, ани шинди сизи куртарэр Иисус Христозун дирилмесиннӓн. Ваатизлик гӱӱденин йыканмасы кирдӓн диилдир, ама Аллахын ӧнӱндӓ темиз ӱректӓн бир адамак.

²²Христос гӧкӓ калкты да Аллахын саа тарафында отурду. Онун запына верилдилӓр ангиллӓр, заабитликлӓр хем куветлӓр.