Read Tungag ПЕТРИНИН ИЛК КИЙАДЫ 5 Bible Online

ПЕТРИНИН ИЛК КИЙАДЫ 5 - Tungag bible

ПЕТРИНИН ИЛК КИЙАДЫ 5

¹Сиздеки пресвитерлерӓ йалварэрым, чӱнкӱ кендим дӓ пресвитерим. Бӓн шаадым Христозун зеетлеринӓ хем пайдашым метинниктӓ, ани лӓӓзым ачылсын.

²Йалварэрым, гӱдӱн Аллахын сӱрӱсӱнӱ, ани сиздӓ вар, коруйарак оннары диил зорландырылмыш, ама ии истедиктӓн, ниӂӓ Аллаха йакышыклы. Буну йапмайын тамахлыклан казанч ичин, ама севинчлӓн,

³диил, ки чорбаӂылык едӓсиниз оннара, ким верилди сизин елинизӓ, ама чалышын вермӓӓ ӧрнек сӱрӱйӓ.

⁴Ачан гелеӂек Бӱӱк Гӱдӱӂӱ, еденеӂениз бир сӧрпешмӓз шанны фенец.

⁵Хеп ӧлӓ сиз дӓ, генчлӓр, ӧн верин пресвитерлерӓ. Хепсиниз, бири-биринизӓ ӧн верерӓк, кушанын йавашлыклан. Зерӓ «Аллах шишкиннерӓ каршы дурэр, ама йавашлара ииверги верер».

⁶Онун ичин йаваш олун, верилип Аллахын каави елинӓ, ки, вакыт гелдийнӓн, ӱӱсеклендирсин сизи.

⁷Хепси кахырларынызы Онун ӱстӱнӓ койун, зерӓ О сизин ичин кахырланэр.

⁸Айык хем кушку олун, зерӓ сизин душманыныз диавол гезер бир хырлайан аслан гиби да аарээр, кими йутсун.

⁹Она каршы дурун каави инаннан, билерӓк ани хеп бӧлӓ зеетлери гечирерлӓр сизин кардашларыныз дӱннейин херериндӓ.

¹⁰Аллах хертӱрлӱ ииверги верер. О чаарды сизи Кенди дивеч метинниинӓ, ани Иисус Христозда. Сиз бираз зеетлендиктӓн сора, Кендиси сизи таманнаа гетиреӂек, ерлештиреӂек, каавилендиреӂек хем салланмаз йапаӂэк.

¹¹Она /метинник хем/ кувет дивечтӓн дивеӂӓ. Амин.

¹²Йаздым сизӓ кысадан бу лафлары Силуанын елиннӓн, ангысыны инанч кардаш сайэрым. Истеерим хавезлендирейим сизи хем шаатлык едейим, ани будур Аллахын хакына иивергиси. Бундан тутунун.

¹³Селӓмнеер сизи Вавилондан клисӓ, ани Аллахтан сечилмиш, ниӂӓ дӓ сиз. Селӓмнеер сизи Марк, беним оолум.

¹⁴Селӓмнейин бири-биринизи севги ӧпӱшӱннӓн. Услулук сизӓ хепсинизӓ, ким инанӂы Иисус Христоза. /Амин./