Read Tungag АПОКАЛИПСИС 2 Bible Online

АПОКАЛИПСИС 2 - Tungag bible

АПОКАЛИПСИС 2

¹Ефес клисесинин ангилинӓ йаз: „Бӧлӓ деер О, Ким саа елиндӓ тутэр еди йылдызы, Ким гезер еди алтын шамдал арасында:

²Билерим сенин йаптыкларыны, чалышманы хем сабурлууну хем ани кӧтӱ адамнара дайанамээрсын. Денедин оннары, ани кендилерини сайэрлар апостол, макар ки диил апостол, да аннадын, ки оннар йаланӂы.

³Сабурлуйсун, зеетлерӓ дайандын Беним адым ичин да йорулмадын.

⁴Ама Бендӓ сана каршы бу: сӓн брактын илк севгини.

⁵Онуштан аклына гетир, нередӓн дӱштӱн, гӱнахларындан бана дӧн да йап баштанкы ишлери. Башка тӱрлӱ, гелеӂӓм да шамдалыны ериндӓн алаӂам, еер гӱнахларындан бана дӧнмӓрсейдин.

⁶Ама сендӓ ии бу, ки азетмеерсин Николайӂыларын ишлериндӓн, ангыларындан Бӓн дӓ азетмеерим.

⁷Кимин вар кулаа, ишитсин, не Айоз Дух сӧлеер клиселерӓ: ким енсейеӂек, она изин вереӂӓм, исин йашамак фиданындан, ани Аллахын райында“.

⁸Смирна клисесинин ангилинӓ йаз: „Бӧлӓ деер О, Ким Баш хем Сон, Ким ӧлӱйдӱ хем дирилди:

⁹Билерим сенин зеетини хем фукааралыыны, ама хеп окадар зенгинсин. Билерим, ани ким сени кӧтӱлеер, оннар сайэрлар кендилерини иудей, ама бу диил аслы. Оннар — шейтанын топлушу.

¹⁰Не лӓӓзым олаӂэк гечирӓсин, бишейдӓн коркма. Диавол кимисини сиздӓн капана атаӂэк, ки дененӓсиниз. Зеетленмиш олаӂэныз он гӱн. Ол инанч ӧлӱмӓ кадар, да вереӂӓм сана йашамак фенецини.

¹¹Кимин вар кулаа, ишитсин, не Айоз Дух сӧлеер клиселерӓ: ким енсейеӂек, она икинӂи ӧлӱмдӓн зарар олмайаӂэк“.

¹²Пергама клисесинин ангилинӓ йаз: „Бӧлӓ деер О, Кимдӓ вар икиӱзлӱ кескин кылыч:

¹³Билерим, нередӓ йашээрсын. Шейтанын чорбаӂылык скемнеси орада. Хеп окадар инанч калэрсын Беним адыма да вазгечмедин Бана инанмаа, артык о гӱннердӓ, незаман Антипа, Беним инанч шаадым, ӧлдӱрӱлдӱ аранызда орада, нередӓ шейтан йашээр.

¹⁴Ама Бендӓ вар биркач маана сана каршы: сендӓ вар инсаннар, ангылары тутунэрлар Валаамын ӱӱретмесиндӓн, ким ӱӱретти Валакы, несой гӱнаха дадандырсын Израил ушакларыны, ки исиннӓр идоллара баашланмыш курбан йаанысындан хем ороспулук йапсыннар.

¹⁵Хеп ӧлӓ сендӓ дӓ вар инсаннар, ани тутунэрлар Николайӂыларын ӱӱретмесиндӓн, /недӓн Бӓн азетмеерим/.

¹⁶Онуштан гӱнахларындан бана дӧн, башка тӱрлӱ, тездӓ гелеӂӓм да ӂенк едеӂӓм оннара каршы кылычлан, ани Беним аазымдан чыкэр.

¹⁷Кимин вар кулаа, ишитсин, не Айоз Дух сӧлеер клиселерӓ: ким енсейеӂек, она изин вереӂӓм, исин саклы маннадан хем вереӂӓм бир бийаз таш, да бу ташта йазылы бир ени ад, не кимсей билмеер кабледендӓн каарӓ“.

¹⁸Фиатира клисесинин ангилинӓ йаз: „Бӧлӓ деер Аллахын Оолу, Кимин гӧзлери атеш йалыны гиби хем айаклары йалабык тунч гиби.

¹⁹Билерим сенин йаптыкларыны, сенин севгини, инаныны, изметчилиини хем дайанманы хем, ани сон ишлерин таа чок, некадар баштанкылары.

²⁰Ама Бендӓ вар биркач маана сана каршы: сӓн бракэрсын Иезавел карыйы, ани сайэр кендини пророк, ӱӱретсин хем алдатсын Беним чыракларымы, ки ороспулук йапсыннар хем исиннӓр идоллара баашланмыш курбан йаанысындан.

²¹Бӓн вердим она вакыт, ки ороспулуундан дӧнсӱн, ама о дӧнмӓӓ истӓмеди.

²²Бак, атарым ону хасталык йатаана хем ороспулук йапаннары онуннан барабар бир бӱӱк зеетӓ койарым, еер дӧнмӓрсейдилӓр ишлердӓн, ани о йапэр.

²³Онун ушакларыны чарпаӂам ӧлӱмнӓн. Озаман хепси клиселӓр таныйаӂэк, ани Бӓним, Ким аараштырэр инсанын неетлерини хем ӱреени. Хепсинизӓ кенди ишлеринизӓ гӧрӓ ӧдейеӂӓм.

²⁴Ама каланына сиздӓн, ким булунэр Фиатирада, ангылары тутунмээрлар бу ӱӱретмектӓн да билмеерлӓр ‘шейтанын дерин ишлерини’, ниӂӓ денер, сӧлеерим, ани коймайаӂам ӱстӱнӱзӓ башка аарлык.

²⁵Салт сыкы тутун ону, не вар сиздӓ, Бӓн гелинӂӓ.

²⁶[26-27] Ким енсейеӂек хем биткийӓдӓн таманнайаӂэк Беним ишлерими, она вереӂӓм заабитлик миллетлӓр ӱстӱнӓ, ниӂӓ Бӓн дӓ каблеттим заабитлик Беним Бобамдан. Оннары гӱдеӂек демир бастоннан, да ниӂӓ топрактан каплары фалайаӂэк.

²⁸Енсейиӂийӓ вереӂӓм сабаа йылдызыны.

²⁹Кимин вар кулаа, ишитсин, не Айоз Дух сӧлеер клиселерӓ“.