Read Tungag АПОКАЛИПСИС 7 Bible Online

АПОКАЛИПСИС 7 - Tungag bible

АПОКАЛИПСИС 7

¹Бундан сора гӧрдӱм дӧрт ангил, ангылары дурардылар ерин дӧрт тарафында да тутардылар ерин дӧрт лӱзгерини, ки лӱзгӓр есмесин не ер ӱстӱнӓ, не дениз ӱстӱнӓ, не дӓ бир аач ӱстӱнӓ.

²Сора гӧрдӱм башка бир ангил, ким калкты гӱндуусундан, ангысында варды дири Аллахын мӱхӱрӱ. О баарды бӱӱк сеслӓн дӧрт ангилӓ, ангыларына изин верилийди, кедерлесиннӓр ери хем денизи, дейип:

³«Кедерлӓмейин не ери, не денизи, не дӓ фиданнары, биз Аллахымызын чыракларынын анныларына мӱхӱр коймайынӂа!»

⁴Бӓн ишиттим мӱхӱрлӱ оланнарын сайысыны: мӱхӱрлӱ олду ӱз кырк дӧрт бин, хепси Израил оолларынын тамызлыкларындан.

⁵Мӱхӱрлӱ олду Иуданын тамызлыындан — оники бин, Рувимин тамызлыындан — оники бин, Гадын тамызлыындан — оники бин,

⁶Асирин тамызлыындан — оники бин, Неффалимин тамызлыындан — оники бин, Манассийанын тамызлыындан — оники бин,

⁷Симеонун тамызлыындан — оники бин, Левийин тамызлыындан — оники бин, Иссахарын тамызлыындан — оники бин,

⁸Зевулонун тамызлыындан — оники бин, Иосифин тамызлыындан — оники бин, Вениаминин тамызлыындан — оники бин.

⁹Ондан сора бактым да гӧрдӱм бир бӱӱк сӱрӱ инсан, ангыларыны кимсей йокту насыл сайсын, хертӱрлӱ миллеттӓн, сенселедӓн, халктан хем дилдӓн, ангылары дурардылар чорбаӂылык скемнесинин хем Кузунун ӧнӱндӓ, бийаз рубаларлан гиийимни хем хурма даллары еллериндӓ.

¹⁰Оннар бӱӱк сеслӓн баарардылар: «Куртулмак бизим Аллахтан, Ким отурэр чорбаӂылык скемнесиндӓ, хем Кузудан!»

¹¹Хепси ангиллӓр дурдулар чорбаӂылык скемнесинин, аксакалларын хем дӧрт йаратыын долайында, ӱзӱкойну дӱштӱлӓр чорбаӂылык скемнесинин каршысында да баш иилттилӓр Аллаха, дейерӓк:

¹²«Амин! Ии сӧз, метинник, аарифлик, шӱкӱр, икрам, кудрет хем кувет олсун бизим Аллаха дивечтӓн дивеӂӓ! Амин!»

¹³Бириси аксакаллардан, данышып бана, сорду: «Буннар, ани гиийимни бийаз рубаларлан, кимдир оннар хем нередӓн гелдилӓр?»

¹⁴«Чорбаӂы, — ӂувап еттим бӓн, — сӓн билерсин». О деди бана: «Буннар о бӱӱк зееттӓн гечип-геленнӓр. Оннар рубаларыны йыкадылар хем Кузунун каныннан бийазлаттылар.

¹⁵Онуштан оннар булунэрлар Аллахын чорбаӂылык скемнесинин каршысында да измет едерлӓр Она геӂӓ-гӱндӱз Онун Айоз бинасында. Чорбаӂылык скемнесиндӓ Отуран чадырыны оннарын ӱстӱнӓ гереӂек.

¹⁶Оннар шиндӓн сора аӂыкмайаӂэк хем сусамайаӂэк, гӱнеш оннары чарпмайаӂэк, не дӓ бир башка кызгыннык.

¹⁷Зерӓ Кузу, ани булунэр чорбаӂылык скемнесинин ортасында, оннары гӱдеӂек да гӧтӱреӂек йашамак суйунун сызынтыларына. Аллах силеӂек хер йашы оннарын гӧзлериндӓн».