Read Ge'ez NT – ሐዲስ ኪዳን በልሳነ ግእዝ ወንጌል ዘማቴዎስ 10 Bible Online

ወንጌል ዘማቴዎስ 10 - Ge'ez NT – ሐዲስ ኪዳን በልሳነ ግእዝ bible

ወንጌል ዘማቴዎስ 10

¹ ወጸውዖሙ ለዐሠርቱ ወክልኤቱ አርዳኢሁ ወወሀቦሙ ሥልጣነ ዲበ መናፍስት ርኩሳን ከመ ያውፅእዎሙ ወይፈውሱ ኵሎ ድዉያነ ወሕሙማነ።

²ወለዐሠርቱ ወክልኤቱ ሐዋርያት ከመዝ አስማቲሆሙ ቀዳሚ ስምዖን ዘተሰምየ ጴጥሮስ ወእንድርያስ አኁሁ። ወያዕቆብ ወልደ ዘብዴዎስ ወዮሐንስ እኁሁ።

³ፊልጶስ ወበርተሎሜዎስ ቶማስ ወማቴዎስ መጸብሓዊ ወያዕቆብ ወልደ እልፍዮስ ወልብድዮስ ዘተሰምየ ታዴዎስ።

⁴ ወስምዖን ቀነናዊ ወይሁዳ አስቆሮታዊ ዘአግብኦ።

⁵እሎንተ ዐሠርተ ወክልኤተ ፈነዎሙ እግዚእ ኢየሱስ ወአዘዞሙ እንዘ ይብል ውስተ ፍኖተ አሕዛብ ኢትሑሩ ወሀገረ ሳምር ኢትባኡ።

⁶ ወሑሩ ባሕቱ ኀበ አባግዕ ዘተኀጕላ እምቤተ እስራኤል።

⁷ ወሐዊረክሙ ስብኩ እንዘ ትብሉ ቀርበት መንግሥተ ሰማያት።

⁸ ድዉያነ ፈውሱ ሙታነ አንሥኡ እለ ለምጽ አንጽሑ አጋንንተ አውፅኡ በጸጋ ዘነሣእክሙ በጸጋ ሀቡ በከንቱ ዘነሣእክሙ በከንቱ ሀቡ።[28]

⁹ኢታጥርዩ ለክሙ ወርቀ ወብሩረ ወኢ ጸሪቀ ውስተ ቅናውቲክሙ።

¹⁰ ወኢጽፍነተ ለፍኖት ወኢ ክልኤ ክዳናተ ወኢ አሣእነ ወኢ በትረ እስመ ይደልዎ ዐስቡ[29] ለዘይትቀነይ።

¹¹ወውስተ ሀገር እንተ ቦእክሙ ወእመኒ አብያት ተሰአሉ ወበሉ ለመኑ ይደልዎ ሰላም በውስቴታ ወህየ ኅድሩ እስከ አመ ትወፅኡ።

¹² ወበዊአክሙ ውስተ ቤት ተአምኅዎሙ፤

¹³ ወለእመ ይደልዎ ለውእቱ ቤት ይኅድር ሰላምክሙ ላዕሌሁ ወእመሰ ኢይደልዎ ይግባእ ሰላምክሙ ላዕሌክሙ።

¹⁴ ወለዘሰ ኢተወክፈክሙ ወኢሰምዐክሙ ነገረክሙ ወፂአክሙ አፍኣ እምይእቲ ቤት ወእምይእቲ ሀገር ንግፉ ጸበለ እገሪክሙ።

¹⁵ አማን እብለክሙ ከመ ይረክባ ሣኅተ ምድረ ሰዶም ወገሞራ አመ ዕለተ ደይን ፈድፋደ እምይእቲ ሀገር።

¹⁶ ወናሁ አነ እፌንወክሙ ከመ አባግዕ ማእከለ ተኵላት ኩኑ እንከ ጠቢባነ ከመ አርዌ ምድር ወየዋሃነ ከመ ርግብ።

¹⁷ ወተዐቀቡ እምሰብእ እኩያን እስመ ያገብኡክሙ ውስተ አዕዋዳት ወይቀሥፉክሙ በምኵራባቲሆሙ።

¹⁸ ወያገብኡክሙ ኀበ መሳንፍት ወነገሥት በእንቲኣየ ከመ ይኩን ስምዐ ላዕሌሆሙ ወላዕለ አሕዛብ።

¹⁹ ወሶበ ያገብኡክሙ ኢተኀልዩ ዘትነብቡ ወዘትትናገሩ እስመ ይትወሀበክሙ በይእቲ ሰዓት ዘትትናገሩ።

²⁰እስመ ኢኮንክሙ አንትሙ ዘትትናገሩ አላ መንፈሱ ለአቡክሙ ሰማያዊ ውእቱ ይትናገር በላዕሌክሙ።

²¹ወያገብእ እኍ እኅዋሁ ለሞት ወአብኒ ውሉዶ ወይትነሥኡ ውሉድ ላዕለ አዝማዲሆሙ ወይቀትልዎሙ።

²² ወትከውኑ ጽሉኣነ በኀበ ኵሉ ሰብእ በእንተ ስምየ ወዘሰ አዝለፈ ትዕግሥቶ ውእቱ ይድኅን።

²³ ወሶበ ይሰድዱክሙ እምዛቲ ሀገር ጕዩ ውስተ ካልእታ አማን እብለክሙ ኢይትፌጸማ አህጉረ እስራኤል እስከ ሶበ ይመጽእ ወልደ ዕጓለ እመሕያው።

²⁴ አልቦ ረድእ ዘየዐቢ እምሊቁ ወኢገብር ዘየዐቢ እምእግዚኡ።

²⁵ መጠኑ ለረድእ እምከመ ኮነ ከመ ሊቁ ወለገብርኒ ከመ እግዚኡ ወለእመ ኮነ ይቤልዎ ለበዓለ ቤት በብዔል ዜቡል ያወፅኦሙ ለአጋንንት እፎ ፈድፋደ ለሰብአ ቤቱ።

²⁶ ኢትፍርህዎሙኬ እንከ እስመ አልቦ ክዱን ዘኢይትከሠት ወአልቦ ኅቡእ ዘኢይትዐወቅ።

²⁷ ዘነገርኩክሙ በጽልመት ንግርዎ በብርሃን ወዘኒ አልኈሰስኩ ውስተ እዝንክሙ ስብክዎ በዲበ አንሕስት።

²⁸ኢትፍርህዎሙኬ ለእለ ይቀትሉ ሥጋክሙ ወለነፍስክሙሰ ኢይክሉ ቀቲሎታ ወባሕቱ ፍርህዎ ለዘቦ ሥልጣን ወይክል እምድኅረ ቀተለ[30] ነፍሰ ወሥጋ ኅቡረ አኅጕሎ በውስተ ገሃነም።

²⁹አኮኑ ክልኤቲ አዕዋፍ ይሠየጣ በክልኤ ጸሪቀ አሶርዮን ወአሐቲ እምኔሆን ኢትወድቅ ውስተ ምድር ዘእንበለ ያእምር አቡክሙ ሰማያዊ።

³⁰ወለክሙሰ ሥዕርተ ርእስክሙኒ ኵሉ ኍሉቍ ውእቱ።

³¹ኢትፍርሁኬ እስመ እምብዙኅ አዕዋፍ ትኄይሱ አንትሙ።

³² ኵሉ እንከ ዘየአምን ብየ በቅድመ ሰብእ አነሂ አአምኖ በቅድመ አቡየ ዘበሰማያት።

³³ ወለዘሰ ክሕደኒ በቅድመ ሰብእ አነሂ እክሕዶ በቅድመ አቡየ ዘበሰማያት።

³⁴ ኢይምሰልክሙ ዘአምጻእኩ ሰላመ ለምድር አላ መጥባሕተ።

³⁵ወመጻእኩሰ እፍልጥ ብእሴ እምአቡሁ ወወለተኒ እምእማ ወመርዓተኒ እምሐማታ።

³⁶ወሰብአ ቤቱ ይፃረሮ ለሰብእ። ዘያፈቅር አባሁ ወእሞ እምኔየ ኢይደሉ ሊተ ወኢይክል ይፀመደኒ።

³⁷ ወዘያፈቅር ወልዶ ወወለቶ እምኔየ ኢይደሉ ሊተ ወኢይክል ይፀመደኒ።[31]

³⁸ ዘኢያጥብዐ ወዘኢነሥአ መስቀለ ሞቱ ወዘኢተለወኒ ድኅሬየ ኢይደሉ ሊተ ወኢይክል ይፀመደኒ።

³⁹ ዘረከባ ለነፍሱ ለይግድፋ ወዘሰ ገደፋ ለነፍሱ በእንቲኣየ ይረክባ።

⁴⁰ ዘኪያክሙ ተወክፈ ኪያየ ተወክፈ ወዘኪያየ ተወክፈ ተወክፎ ለዘፈነወኒ።

⁴¹ዘተወክፈ ነቢየ በስመ ነቢይ ዐስበ ነቢይ ይነሥእ ወዘተወክፈ ጻድቀ በስመ ጻድቅ ዐስበ ጻድቅ ይነሥእ።

⁴² ወዘአስተየ ለአሐዱ እምእሉ ንኡሳን ጽዋዐ ማይ ቈሪር ባሕቲቶ በስመ ረድእየ አማን እብለክሙ ኢየኀጕል ዐስቦ።