Read Ge'ez NT – ሐዲስ ኪዳን በልሳነ ግእዝ ወንጌል ዘማቴዎስ 12 Bible Online

ወንጌል ዘማቴዎስ 12 - Ge'ez NT – ሐዲስ ኪዳን በልሳነ ግእዝ bible

ወንጌል ዘማቴዎስ 12

¹ ወበውእቱ መዋዕል ኀለፈ እግዚእ ኢየሱስ በሰንበት እንተ መንገለ ገራውህ ወአርዳኢሁሰ ርኅቡ ወአኀዙ ይምሐዉ ሰዊተ ወይብልዑ።

² ወርእዮሙ ፈሪሳውያን ይቤልዎ ናሁ ርኢ አርዳኢከ ዘይገብሩ ዘኢይከውን ገቢረ በሰንበት።

³ ወይቤሎሙ ኢያንበብክሙኑ ዘገብረ ዳዊት አመ ርኅበ ውእቱኒ ወእለ ምስሌሁ።

⁴ ዘከመ ቦአ ቤቶ ለእግዚአብሔር ወበልዐ ኀባውዘ ቍርባን ዘኢይከውኖ ለበሊዕ ወኢ ለእለ ምስሌሁ ዘእንበለ ለካህናት ለባሕቲቶሙ።

⁵ ወኢያንበብክሙኑ ዘሀሎ ውስተ ኦሪት ከመ ካህናት እለ ውስተ ቤተ መቅደስ ያረኵስዋ ለሰንበት ወኢይከውኖሙ ጌጋየ።

⁶ወአነሂ እብለክሙ ከመ ዘየዐቢ እምቤተ መቅደስ ሀሎ ዝየ።

⁷ ሶበሰ ተአምሩ ምንት ውእቱ ዘይቤ «ምጽዋተ አበድር እመሥዋዕት»[33] እምኢኰነንክምዎሙ ለእለ ኢአበሱ።

⁸ እስመ ወልደ ዕጓለ እመሕያው ለሊሁ ውእቱ እግዚኣ ለሰንበት።

⁹ ወፈሊሶ እግዚእ ኢየሱስ እምህየ ቦአ ውስተ ምኵራቦሙ።

¹⁰ ወናሁ ብእሲ ዘየብሰት እዴሁ ወተስእልዎ እንዘ ይብሉ ይከውንኑ በሰንበት ፈውሶ ከመ ያስተዋድይዎ።

¹¹ወይቤሎሙ መኑ እምውስቴትክሙ ብእሲ ዘቦ አሐዱ በግዕ ወእመ ወድቆ በሰንበት ውስተ ግብ አኮኑ ይእኅዞ ወያነሥኦ።

¹²እፎ እንከ ፈድፋደ ይኄይስ ሰብእ እምነ በግዕ ይከውንኬ በሰንበት ገቢረ ሠናይ።

¹³ወእምዝ ይቤሎ ለውእቱ ብእሲ ስፋሕ እዴከ ወሰፍሐ እዴሁ ወሐይወት ሶቤሃ ወኮነት ከመ ካልእታ።

¹⁴ ወወፂኦሙ ፈሪሳውያን ተማከሩ በእንቲኣሁ ከመ ይቅትልዎ።

¹⁵ወአእሚሮ እግዚእ ኢየሱስ ተግኅሠ እምህየ ወተለውዎ ብዙኃን ሕዝብ ወአሕየዎሙ ለኵሎሙ።

¹⁶ ወገሠጾሙ ከመ ኢያግህድዎ።

¹⁷ ከመ ይትፈጸም ዘተብህለ በኢሳይያስ ነቢይ እንዘ ይብል።

¹⁸ «ናሁ ወልድየ ዘኀረይኩ ፍቁርየ ዘሠምረቶ ነፍስየ ወአነብር መንፈስየ ላዕሌሁ ውእቱ ይነግር ፍትሕየ ወኵነኔየ ለአሕዛብ።

¹⁹ኢይደምፅ ወኢይጸርሕ ወአልቦ ዘይሰምዕ ቃሎ እንዘ ይሜህር በምኵራብ።

²⁰ብርዐ ቅጥቁጠ ኢይሰብር ወሱዐኒ ዘይጠይስ ኢያጠፍእ እስከ ያገብእ ፍትሐ መዊኦቱ።

²¹ ወበስመ ዚኣሁ አሕዛብ ይትአመኑ።»

²² ወእምዝ አምጽኡ ሎቱ ዘጋኔን ዕዉረ ወጽሙመ ወበሃመ ወፈወሶ እስከ ውእቱ ዕዉር ወጽሙም ወበሃም ነበበሂ ወርእየሂ ወሰምዐሂ።

²³ወይዴመሙ ኵሎሙ አሕዛብ ወይቤሉ አኮኑ ዝንቱ ወልደ ዳዊት።

²⁴ ወፈሪሳውያንሰ ሰሚዖሙ ይቤሉ ዝንቱሰ ኢያወፅእ አጋንንተ ዘእንበለ በብዔል ዜቡል መልአኮሙ ለአጋንንት።

²⁵ወአእሚሮ እግዚእ ኢየሱስ ኅሊናሆሙ ይቤሎሙ ኵላ መንግሥት እንተ ትትናፈቅ በበይናቲሃ ትማስን ወኢትቀውም ወኵላ ሀገር ወእመሂ ቤት እንተ ትትናፈቅ በበይናቲሃ ኢትቀውም።

²⁶ወእመሰ ሰይጣን ለሰይጣን ያወፅኦ ተናፈቀኬ በበይናቲሁ እፎ እንከ ትቀውም መንግሥቱ።

²⁷ወእመሰ አነ በብዔል ዜቡል አወፅኦሙ ለአጋንንት ውሉድክሙ በምንት ያወፅእዎሙ ወበእንተዝ እሙንቱ ፈታሕተ ይከውኑክሙ።

²⁸ ወእመሰ አነ በመንፈሰ እግዚአብሔር አወፅኦሙ ለአጋንንት ዮጊኬ በጽሐት ላዕሌክሙ መንግሥተ እግዚአብሔር።

²⁹ ወአልቦ ዘይክል መኑሂ በዊአ ቤተ ኀያል ወበርብሮተ ንዋዩ ለእመ ኢቀደመ አሲሮቶ ለኀያል ወእምዝ ቤቶ ይበረብር።

³⁰ ዘኢኮነ ምስሌየ ዕድውየ ውእቱ ወዘኢይትጋባእ ምስሌየ ይዘርወኒ[34]

³¹ በእንተዝ እብለክሙ ኵሉ ኀጢአት ወፅርፈት ይትኀደግ ለሰብእ ወዘሰ ፀረፈ ላዕለ መንፈስ ቅዱስ ኢይትኀደግ ሎቱ።

³² ወዘሰ ነበበ ቃለ ላዕለ ወልደ ዕጓለ እመሕያው ይትኀደግ ሎቱ ወዘሰ ነበበ ላዕለ መንፈስ ቅዱስ ኢይትኀደግ ሎቱ ኢበ ዝ ዓለም ወኢ በዘይመጽእ።

³³ እመ አኮ ግበሩ ዕፀ ሠናየ ወፍሬሁኒ ሠናየ ወእመ አኮ ግበሩ ዕፀ እኩየ ወፍሬሁኒ እኩየ እስመ እምፍሬሁ ይትዐወቅ ዕፅ።

³⁴ ኦ ትውልደ አራዊተ ምድር በእፎ ትክሉ ሠናየ ተናግሮ እንዘ እኩያን አንትሙ እስመ እምተረፈ ልብ ይነብብ አፍ።

³⁵ኄር ብእሲ እምሠናይ መዝገበ ልቡ ያውፅኣ ለሠናያት ወእኩይሰ ብእሲ እምእኩይ መዝገበ ልቡ ያወፅኣ ለእኪት።

³⁶አንሰ እብለክሙ ኵሉ ሰብእ ዘይነብብ ንባበ ፅሩዐ ያገብኡ ሎቱ ቃለ በዕለተ ደይን።

³⁷እስመ እምቃልከ ትጸድቅ ወእምቃልከ ትትኴነን።

³⁸ ወአሜሃ መጽኡ ሰብእ እምጸሐፍት ወእምፈሪሳውያን ወይቤልዎ ሊቅ ንፈቅድ እምኀቤከ ትእምርተ ንርአይ።

³⁹ ወአውሥአ እግዚእ ኢየሱስ ወይቤሎሙ ትውልድ ዕሉት ዐማፂት ወዘማዊት ትእምርተ ተኀሥሥ ወትእምርትሰ ኢይትወሀባ ዘእንበለ ትእምርተ ዮናስ ነቢይ።

⁴⁰ እስመ በከመ ነበረ ዮናስ ውስተ ከርሠ ዐንበሪ ሠሉሰ መዋዕለ ወሠሉሰ ለያልየ ከማሁ ይነብር ወልደ ዕጓለ እመሕያው ውስተ ልበ ምድር ሠሉሰ መዋዕለ ወሠሉሰ ለያልየ።

⁴¹ ሰብአ ነነዌ ይትነሥኡ አመ ዕለተ ደይን ወይትፋትሕዋ ለዛቲ ትውልድ ወያስተኀፍርዋ እስመ ነስሑ በስብከተ ዮናስ ወናሁ ዘየዐቢ እምዮናስ ሀሎ ዝየ።

⁴² ንግሥተ አዜብ ትትነሣእ አመ ዕለተ ደይን ወትትፋታሕ ምስለ ዛ ትውልድ ወታስተኀፍራ እስመ መጽአት እምአጽናፈ ምድር ትስማዕ ጥበቢሁ ለሰሎሞን ወናሁ ዘየዐቢ እምሰሎሞን ሀሎ ዝየ።

⁴³ወእምከመ ወፅአ መንፈስ ርኩስ እምሰብእ የዐውድ በድወ ኀበ አልቦ ማይ እንዘ የኀሥሥ ዕረፍተ ወየኀጥእ።

⁴⁴ወእምዝ ይብል እገብእ እንከሰ ውስተ ቤትየ እምኀበ ወፃእኩ ወመጺኦ ይረክቦ እንዘ ያስተራክብ እዳወ ዕሩቀ ወኵስቱረ ወምሩገ።[35]

⁴⁵ ወእምዝ የሐውር ወያመጽእ ምስሌሁ ካልኣነ ሰብዐተ አጋንንተ እለ የአክዩ እምኔሁ ወበዊኦሙ የኀድሩ ህየ ወይከውን ደኃሪቱ ለውእቱ ብእሲ ዘየአኪ እምቀዳሚቱ ከማሁ ይከውና ለዛቲ ትውልድ እኪት።

⁴⁶ ወእንዘ ይነግሮሙ ዘንተ ለሕዝብ ናሁ እሙ ወአኀዊሁ ይቀውሙ አፍኣ እንዘ ይፈቅዱ ይትናገርዎ።

⁴⁷ወመጽአ አሐዱ እምአርዳኢሁ ወይቤሎ ናሁ እምከ ወአኀዊከ አፍኣ ይቀውሙ ወየኀሥሡ ይትናገሩከ።

⁴⁸ ወአውሥአ ወይቤሎ ለዘነገሮ መኑ ይእቲ እምየ ወእለ መኑ እሙንቱ አኀውየ።

⁴⁹ወሰፍሐ እዴሁ ወአመረ[36] ኀበ አርዳኢሁ ወይቤ ነዮሙ እምየ ወአኀውየ።

⁵⁰ እስመ ኵሉ ዘይገብር ፈቃዶ ለአቡየ ዘበሰማያት ውእቱ እኁየኒ ወእኅትየኒ ወእምየኒ ውእቱ።