Read Ge'ez NT – ሐዲስ ኪዳን በልሳነ ግእዝ ወንጌል ዘማቴዎስ 13 Bible Online

ወንጌል ዘማቴዎስ 13 - Ge'ez NT – ሐዲስ ኪዳን በልሳነ ግእዝ bible

ወንጌል ዘማቴዎስ 13

¹ወበይእቲ ዕለት ወፂኦ እግዚእ ኢየሱስ እምቤት ነበረ መንገለ ሐይቀ ባሕር።

²ወተጋብኡ ኀቤሁ ሰብእ ብዙኃን እስከ ሶበ የዐርግ ውስተ ሐመር ወይነብር ወኵሉ ሰብእ ውስተ ሐይቅ ይቀውሙ።

³ ወነገሮሙ ብዙኀ በምሳሌ እንዘ ይብል ናሁ ወፅአ ዘራዒ ከመ ይዝራዕ።

⁴ወእንዘ ይዘርዕ ቦ ዘወድቀ ውስተ ፍኖት ወመጽኡ አዕዋፈ ሰማይ ወበልዕዎ።

⁵ወቦ ዘወድቀ ዲበ ኰኵሕ ኀበ አልቦ መሬት ብዙኅ ወውእተ ጊዜ ሠረጸ እስመ አልቦ ዕመቅ ለመሬቱ።

⁶ወሶበ ሠረቀ ፀሐይ መጽለወ ወየብሰ እስመ አልቦ ሥርው።

⁷ ወቦ ዘወድቀ ውስተ ሦክ ወበቍሎ ጠበቆ ሦክ ወኀነቆ።

⁸ወቦ ዘወድቀ ውስተ ምድር ሠናይት ወወሀበ ፍሬ ቦ ዘምእት ወቦ ዘስሳ ወቦ ዘሠላሳ።

⁹ ዘቦ እዝን ሰሚዐ ለይስማዕ።

¹⁰ወቀሪቦሙ አርዳኢሁ ይቤልዎ በእንተ ምንት በአምሳል ትትናገሮሙ።

¹¹ወአውሥአ እግዚእ ኢየሱስ ወይቤሎሙ እስመ ለክሙ ተውህበ አእምሮ ምሥጢራቲሃ ለመንግሥተ ሰማያት ወሎሙሰ ኢተውህቦሙ።

¹²እስመ ለዘቦ ይሁብዎ ወይዌስክዎ ወለዘሰ አልቦ እለሂ ቦ የሀይድዎ።

¹³ ወበእንተ ዝንቱ በአምሳል እትናገሮሙ እስመ እንዘ ይሬእዩ ኢይሬእዩ ወእንዘ ይሰምዑ ኢይሰምዑ ወኢይሌብዉ።

¹⁴ከመ ይትፈጸም ላዕሌሆሙ ትንቢተ ኢሳይያስ ዘይቤ «ሰሚዐ ትሰምዑ ወኢትሌብዉ ወነጽሮ ትኔጽሩ ወኢትሬእዩ።

¹⁵ እስመ ገዝፈ ልቡ ለዝ ሕዝብ ወእዘኒሆሙ ደንቀወ እምሰሚዕ ወከደኑ አዕይንቲሆሙ ከመ ኢይርአዩ በአዕይንቲሆሙ ወበእዘኒሆሙ ኢይስምዑ ወበልቦሙ ኢይለብዉ ወኢይትመየጡ ኀቤየ ወኢይሣሀሎሙ።»

¹⁶ወለክሙሰ ብፁዓት አዕይንቲክሙ እስመ ይሬእያ ወእዘኒክሙ እስመ ይሰምዓ።

¹⁷ አማን እብለክሙ ከመ ብዙኃን ነቢያት ወጻድቃን ፈተዉ ይርአዩ አንትሙ ዘትሬእዩ ወኢርእዩ ወፈተዉ ይስምዑ አንትሙ ዘትሰምዑ ወኢሰምዑ።

¹⁸አንትሙኬ ስምዑ ምሳሌሁ ለዘይዘርዕ።

¹⁹ኵሉ ዘይሰምዕ ነገረ መንግሥተ ሰማያት ወኢይሌቡ ይመጽእ እኩይ ወይመሥጥ ቃለ ዘተዘርዐ ውስተ ልቡ ውእቱኬ ዘተዘርዐ ውስተ ፍኖት።

²⁰ወዘሰ ውስተ ኰኵሕ ተዘርዐ ውእቱ ዝ ዘነገረ ይሰምዕ ወሶቤሃ በፍሥሓ ይትዌከፎ።

²¹ ወባሕቱ አልቦ ሥርው ላዕሌሁ ለጊዜሃ ዳእሙ ውእቱ ወከዊኖሰ ምንዳቤ ወስደት በእንተዝ ነገር በጊዜሃ የዐሉ።

²² ወዘሰ ውስተ ሦክ ተዘርዐ ዝ ውእቱ ዘነገረ ይሰምዕ ወትካዘ ዝ ዓለም ወስፍጠተ ብዕል ተኀንቆ ለነገር ወዘእንበለ ፍሬ ይከውን።

²³ወዘሰ ተዘርዐ ውስተ ምድር ሠናይት ዝ ውእቱ ዘነገረ ይሰምዕ ወይሌቡ ወይፈሪ ወይገብር ቦ ዘምእት ወቦ ዘስሳ ወቦ ዘሠላሳ።

²⁴ካልእተ ምሳሌ አምጽአ ሎሙ እንዘ ይብል ትመስል መንግሥተ ሰማያት ብእሴ ዘዘርዐ ሠናየ ዘርዐ ውስተ ገራህቱ።

²⁵ወእንዘ ይነውሙ ሰብኡ መጽአ ጸላኢሁ ወዘርዐ ክርዳደ ማእከለ ሥርናይ ወኀለፈ።

²⁶ወሶበ በቈለ ሥርናይ ወፈረየ ፍሬ አሜሃ አስተርአየ ክርዳድኒ።

²⁷ወመጺኦሙ አግብርቲሁ ለበዐለ ገራህት ይቤልዎ እግዚኦ አኮሁ ሠናየ ዘርዐ ዘራዕከ ውስተ ገራህትከ እምአይቴ እንከ ሎቱ ክርዳድ።

²⁸ወይቤሎሙ ብእሲ ፀራዊ ገብረ ዘንተ ወአግብርቲሁሰ ይቤልዎ ትፈቅድኑ እንከ ንሑር ወንጻሕይዮ።

²⁹ ወይቤሎሙ አልቦ ከመ እንዘ ትጸሐይዩ ክርዳደ ኢትምሐዉ ምስሌሁ ሥርናየኒ።

³⁰ ኅድግዎሙ ይልሀቁ ኅቡረ እስከ ጊዜ ማእረር ወበጊዜ ማእረር እብሎሙ ለእለ የዐጽዱ እርዩ ቅድመ ክርዳደ ወእስርዎ በበከላስስቲሁ ወአውዕይዎ በእሳት ወሥርናዮሰ አስተጋብኡ ውስተ መዛግብትየ።

³¹ካልእተ ምሳሌ አምጽአ ሎሙ እንዘ ይብል ትመስል መንግሥተ ሰማያት ኅጠተ ሰናፔ እንተ ነሥኣ ብእሲ ወዘርዓ ውስተ ገራህቱ።

³² ወይእቲ ትንእስ እምኵሉ አዝርዕት ወሶበ ልህቀት ተዐቢ እምኵሎን አሕማላት ወትከውን ዕፀ ዐባየ እስከ ይመጽኡ አዕዋፈ ሰማይ ወያጸልሉ ታሕተ አዕፁቂሃ።

³³ ካልእተ ምሳሌ አምጽአ ሎሙ ወይቤሎሙ ትመስል መንግሥተ ሰማያት ብኁአ ዘነሥአት ብእሲት ወአብኅአቶ ውስተ ሠለስቱ መስፈርተ ሐሪጽ ወአብኅአ ኵሎ።

³⁴ ዘንተ ኵሎ ተናገረ እግዚእ ኢየሱስ በምሳሌ ለአሕዛብ ወዘእንበለ ምሳሌሰ ኢተናገሮሙ።

³⁵ ከመ ይትፈጸም ዘተብህለ በነቢይ እንዘ ይብል «እከሥት በምሳሌ አፉየ ወእነግር አምሳለ[37] ዘእምትካት።»

³⁶ወእምዝ ኀደጎሙ ለአሕዛብ ወቦአ ውስተ ቤት ወቀርቡ ኀቤሁ አርዳኢሁ ወይቤልዎ ፈክር ለነ ምሳሌ ዘክርዳድ ወዘሥርናይ ወዘገራህት።

³⁷ወአውሥአ ወይቤሎሙ ዘይዘርዕሰ ሠናየ ዘርዐ ወልደ ዕጓለ እመሕያው ውእቱ።

³⁸ወገራህቱኒ ዓለም ውእቱ ወሠናይኒ ዘርዕ ውሉደ መንግሥት እሙንቱ ወክርዳድኒ ውሉዱ ለእኩይ።

³⁹ወፀራዊኒ ዘዘርዖ ዲያብሎስ ውእቱ ወማእረሩኒ ኅልቀተ ዓለም ውእቱ ወዐጸዱኒ መላእክት እሙንቱ።

⁴⁰ከመኬ የአርይዎ ለክርዳድ ቅድመ ወበእሳት ያውዕይዎ ከማሁ ይከውን በኅልቀተ ዝንቱ ዓለም።

⁴¹ወይፌንዎሙ ወልደ ዕጓለ እመሕያው ለመላእክቲሁ ወየአርዩ እመንግሥቱ ኵሎ ዐላውያነ ወእለ ይገብሩ አበሳ።

⁴² ወይወድይዎሙ ውስተ እቶነ እሳት ወበህየ ይከውን ብካይ ወሐቅየ ስነን።

⁴³አሜሃ ይበርሁ ጻድቃን ምስብዒተ እደ እምብርሃነ ፀሐይ[38] በመንግሥተ አቡሆሙ ዘበሰማያት ዘቦ እዝን ሰሚዐ ለይስማዕ።

⁴⁴ ካዕበ ትመስል መንግሥተ ሰማያት መድፍነ ዘኅቡእ ውስተ ገራህት ወረኪቦ ብእሲ ኀብኣ ወእምፍሥሓሁ ሖረ ወሤጠ ኵሎ ዘቦ ወተሣየጣ ለይእቲ ገራህት።

⁴⁵ካዕበ ትመስል መንግሥተ ሰማያት ብእሴ ሠያጤ ዘየኀሥሥ ባሕርየ ሠናየ።

⁴⁶ ወረኪቦ አሐተ ባሕርየ እንተ ብዙኅ ሤጣ ሖረ ወሤጠ ኵሎ ዘቦ ወተሣየጣ።

⁴⁷ ካዕበ ትመስል መንግሥተ ሰማያት ገሪፈ እንተ ተወድየት ውስተ ባሕር ወአስተጋብአት ኵሎ ዘመደ ዓሣት።

⁴⁸ወሶበ መልአት አዕረግዋ ውስተ ሐይቅ ወነቢሮሙ አረዩ ሠናዮ ውስተ ሙዳዮሙ ወእኩዮሰ ገደፍዎ አፍኣ።

⁴⁹ ከማሁ ይከውን በኅልቀተ ዓለም ይመጽኡ መላእክት ወይፈልጡ እኩያነ እማእከሎሙ ለጻድቃን።

⁵⁰ወይወድይዎሙ ውስተ እቶነ እሳት ኀበ ሀሎ ብካይ ወሐቅየ ስነን።

⁵¹ወይቤሎሙ እግዚእ ኢየሱስ ለበውክሙኑ እንከ ዘንተ ኵሎ ወይቤልዎ እወ እግዚኦ።

⁵² ወይቤሎሙ በእንተ ዝንቱ ኵሉ ጸሓፊ ዘይጸመድ ለመንግሥተ ሰማያት ይመስል ብእሴ በዓለ ቤት ዘያወፅእ እመዝገቡ ሐዲሰ ወብሉየ።

⁵³ ወፈጺሞ እግዚእ ኢየሱስ እሎንተ ምሳሌያተ ተንሥአ እምህየ።

⁵⁴ ወሖረ ሀገሮ ወመሀሮሙ በምኵራቦሙ እስከ ሶበ ይዴመሙ ወይብሉ እምአይቴ እንከ ሎቱ ዝንቱ ኵሉ ጥበብ ወኀይል።

⁵⁵ አኮኑ ዝንቱ ውእቱ ወልዱ ለጸራቢ ወስማ ለእሙ ማርያም ወአኀዊሁ ያዕቆብ ወዮሳ ወስምዖን ወይሁዳ።

⁵⁶ ወአኃቲሁ ኵሎን ኀቤነ ሀለዋ እምአይቴ እንከ ሎቱ ዝንቱ ኵሉ ጥበብ ወኀይል ወአኀዙ ያንጐርጕሩ በእንቲኣሁ።

⁵⁷ ወይቤሎሙ እግዚእ ኢየሱስ አልቦ በኀበ ኢይከብር ነቢይ ዘእንበለ በሀገሩ ወበቤቱ።

⁵⁸ወኢገብረ በህየ ኀይለ ብዙኀ በእንተ ኢአሚኖቶሙ።