Read Ge'ez NT – ሐዲስ ኪዳን በልሳነ ግእዝ ወንጌል ዘማቴዎስ 14 Bible Online

ወንጌል ዘማቴዎስ 14 - Ge'ez NT – ሐዲስ ኪዳን በልሳነ ግእዝ bible

ወንጌል ዘማቴዎስ 14

¹ ወበውእቱ መዋዕል ሰምዐ ሄሮድስ ንጉሥ ነገሮ ለእግዚእ ኢየሱስ።

²ወይቤሎሙ ለአግብርቲሁ ዝ ውእቱ ዮሐንስ መጥምቅ ውእቱ ተንሥአ እሙታን ወበእንተ ዝንቱ ይትገበራ ኀይላት ቦቱ።

³እስመ ውእቱ ሄሮድስ አኀዞ ለዮሐንስ ወሞቅሖ በቤተ ሞቅሕ በእንተ ሄሮድያዳ ብእሲተ ፊልጶስ እኁሁ እስመ ኪያሃ አውሰበ[39]

⁴ እስመ ይቤሎ ዮሐንስ ሎቱ ኢይከውነከ ታውስብ ብእሲተ እኁከ ፊልጶስ።

⁵ ወእንዘ ይፈቅድ ይቅትሎ ይፈርሆሙ ለሕዝብ እስመ ከመ ነቢይ ይሬእይዎ ለዮሐንስ።

⁶ ወከዊኖ ዕለተ ልደቱ ለሄሮድስ መጽአት ወለተ ሄሮድያዳ ወዘነፈት ሎቱ በማእከሎሙ ወአደመቶ ለሄሮድስ።

⁷ወበእንተዝ መሐለ ላቲ ከመ የሀባ ዘሰአለቶ።

⁸ወይእቲሰ አቅደመት አእምሮ በኀበ እማ ወትቤሎ ሀበኒ በዝየ በጻሕል ርእሶ ለዮሐንስ መጥምቅ።

⁹ወተከዘ ንጉሥ በእንተ መሐላሁ ወበእንተ እለ ይረፍቁ ምስሌሁ ወአዘዘ ከመ የሀብዋ።

¹⁰ወፈነወ ሶቤሃ መስተራትዓተ ሐራ ወመተሩ ርእሶ ለዮሐንስ በቤተ ሞቅሕ።

¹¹ወአምጽኡ ርእሶ በጻሕል ወወሀብዋ ለይእቲ ወለት ወይእቲሰ ወሰደት ወወሀበት ለእማ።

¹²ወመጽኡ አርዳኢሁ ወነሥኡ በድኖ ወቀበርዎ ወመጺኦሙ ዜነውዎ ለእግዚእ ኢየሱስ።

¹³ ወሰሚዖ እግዚእ ኢየሱስ ተግኅሠ እምህየ በሐመር ውስተ ገዳም እንተ ባሕቲቱ ወሰሚዖሙ አሕዛብ ተለውዎ በእግር እምአህጉር።

¹⁴ ወወፂኦ ርእየ ብዙኃነ አሕዛበ ወምሕሮሙ ወአሕየወ ድዉያኒሆሙ።

¹⁵ወምሴተ ከዊኖ ቀርቡ ኀቤሁ አርዳኢሁ ወይቤልዎ ገዳም ውእቱ ብሔር ወሰዓቱኒ ኀለፈ ፈንዎሙ ለአሕዛብ ከመ ይሑሩ ውስተ አህጉር ወይሣየጡ ለርእሶሙ መብልዐ።

¹⁶ወይቤሎሙ እግዚእ ኢየሱስ አኮ መፍትው ይሑሩ ርኁባኒሆሙ አላ ሀብዎሙ አንትሙ ዘይበልዑ።

¹⁷ወይቤልዎ አልብነ ዝየ ዘእንበለ ኀምስ ኅብስት ወክልኤቲ ዓሣ።

¹⁸ወይቤሎሙ አምጽእዎን ሊተ ዝየ።

¹⁹ወአዘዞሙ ለሰብእ ይርፍቁ ዲበ ሣዕር ወነሥአ ውእተ ኀምሰ ኅብስተ ወክልኤ ዓሣ ወነጸረ ኀበ ሰማይ ወባረከ ወፈተተ ወወሀበ ለአርዳኢሁ ወአርዳኢሁኒ አቅረቡ ለሕዝብ።

²⁰ ወበልዑ ኵሎሙ ወጸግቡ ወአግኀሡ ዘተርፈ ፍተታተ ወመልአ ዐሠርተ ወክልኤተ መዛርዐ ምሉአ።

²¹ወእለሰ በልዑ እሙንቱ ሰብእ የአክሉ ኀምሳ ምእት ብእሲ ዘእንበለ አንስት ወደቅ።

²² ወአዘዞሙ ሶቤሃ ለአርዳኢሁ ከመ ይዕርጉ ውስተ ሐመር ወይቅድምዎ ወይሑሩ ኀበ ማዕዶተ ባሕር እስከ ሶበ ይፌንዎሙ ለአሕዛብ።

²³ ወእምዝ ፈትሖሙ ለአሕዛብ ወዐርገ ውስተ ደብር እንተ ባሕቲቱ ይጸሊ ወምሴተ ከዊኖ ባሕቲቱ ሀሎ ህየ።

²⁴ወሐመርሰ ናሁ ሀሎ ማእከለ ባሕር ርኁቀ መጠነ ዕሥራ ወኀምስቱ[40] ምዕራፍ ወይትሀወክ እሞገድ ወያመነድቦ ማዕበለ ባሕር እስመ እምቅድሜሁ ውእቱ ነፋስ።

²⁵ወበራብዕት ሰዓተ ሌሊት መጽአ ኀቤሆሙ እግዚእ ኢየሱስ እንዘ የሐውር ዲበ ባሕር።

²⁶ወሶበ ርእይዎ አርዳኢሁ እንዘ ዲበ ባሕር የሐውር ደንገፁ ወፈርሁ እንዘ ይብሉ ምትሐት ውእቱ ወእምግርማሁ ዐውየዉ።

²⁷ወበጊዜሃ ተናገሮሙ እግዚእ ኢየሱስ እንዘ ይብል ተአመኑ አነ ውእቱ ኢትፍርሁ።

²⁸ወአውሥአ ጴጥሮስ ወይቤ እመሰ አንተሁ እግዚኦ አዝዘኒ እምጻእ ኀቤከ እንተ ዲበ ማይ፤

²⁹ወይቤሎ ነዓ ወወሪዶ ጴጥሮስ እምዲበ ሐመር ሖረ ዲበ ማይ ይብጻሕ ኀበ እግዚእ ኢየሱስ።

³⁰ ወሶበ ርእየ ነፋሰ ኀያለ ፈርሀ ወአኀዘ ይሰጠም ወዐውየወ ሶቤሃ እንዘ ይብል እግዚኦ አድኅነኒ።

³¹ ወሶቤሃ ሰፍሐ እዴሁ እግዚእ ኢየሱስ ወአኀዞ ወይቤሎ ውኁደ ሃይማኖት ለምንት ናፈቀ።

³²ወዐሪጎ ውስተ ሐመር ይእተ ጊዜ ኀደገ ነፋስ።

³³ ወእለ ውስተ ሐመር ሰገዱ ሎቱ እንዘ ይብሉ አማን ወልደ እግዚአብሔር አንተ።

³⁴ ወዓዲዎሙ ባሕረ በጽሑ ምድረ ጌንሴሬጥ።

³⁵ወአእመርዎ ሰብአ ውእቱ ብሔር ወፈነዉ ኀበ ኵሉ አድያም ወአምጽኡ ሎቱ ኵሎ ሕሙማነ።

³⁶ ወአስተብቍዕዎ ከመ ይግሥሡ ጽንፈ ልብሱ እስመ ኵሎሙ እለ ገሠሥዎ የሐይዉ።