Read Ge'ez NT – ሐዲስ ኪዳን በልሳነ ግእዝ ወንጌል ዘማቴዎስ 21 Bible Online

ወንጌል ዘማቴዎስ 21 - Ge'ez NT – ሐዲስ ኪዳን በልሳነ ግእዝ bible

ወንጌል ዘማቴዎስ 21

¹ ወቀሪቦ እግዚእ ኢየሱስ ኢየሩሳሌም በጽሐ ቤተ ፋጌ እንተ ገቦ ደብረ ዘይት ወእምዝ ፈነወ እግዚእ ኢየሱስ ክልኤተ እምአርዳኢሁ።

²ወይቤሎሙ ሑሩ ሀገረ ዘቅድሜክሙ ወይእተ ጊዜ ትረክቡ እድግተ እስርተ ምስለ ዕዋላ ፍትሕዎሙ ወአምጽእዎሙ ሊተ።

³ወእመቦ ዘይቤለክሙ ምንተ ትገብሩ በሉ እግዚኦሙ ይፈቅዶሙ ወበጊዜሃ ይፌንዉክሙ።

⁴ወዝ ኵሉ ዘኮነ ከመ ይትፈጸም ዘተብህለ በነቢይ።

⁵ «በልዋ ለወለተ ጽዮን ነዋ ንጉሥኪ ይመጽእ ኀቤኪ ጻድቅ ወየዋህ እንዘ ይጼዐን ዲበ እድግት ወዲበ ዕዋላ።»

⁶ወሐዊሮሙ አርዳኢሁ ገብሩ በከመ አዘዞሙ እግዚእ ኢየሱስ።

⁷ወአምጽኡ እድግተ ወዕዋላ ወረሐኑ አልባሲሆሙ ላዕሌሆሙ ወተጽዕነ እግዚእ ኢየሱስ ዲቤሆሙ።

⁸ ወዘይበዝኁ ሕዝብ ነጸፉ አልባሲሆሙ ውስተ ፍኖት ወካልኣንሂ መተሩ አዕጹቀ እምውስተ ዕፀው ወነጸፉ ውስተ ፍኖት።

⁹ ወሕዝብሰ እለ የሐውሩ ቅድሜሁ ወእለሂ ይተልዉ ይጸርሑ ወይብሉ ሆሣዕና ለወልደ ዳዊት ቡሩክ ዘይመጽእ በስመ እግዚአብሔር ሆሣዕና በአርአያም።

¹⁰ ወበዊኦ እግዚእ ኢየሱስ ኢየሩሳሌም ተሀውከት ኵላ ሀገር እንዘ ትብል መኑ ውእቱ ዝንቱ።

¹¹ወይቤሉ አሕዛብ ዝ ውእቱ ኢየሱስ ነቢይ ዘእምናዝሬት ዘገሊላ።

¹² ወቦአ እግዚእ ኢየሱስ ቤተ መቅደስ ወሰደደ ኵሎ እለ ይሠይጡ ወይሣየጡ በቤተ መቅደስ ወገፍትዐ ማእዳቲሆሙ ለመወልጣን ወመናብርቲሆሙ ለእለ ይሠይጡ ርግበ።

¹³ ወይቤሎሙ ጽሑፍ ዘይብል ቤትየሰ ቤተ ጸሎት ይሰመይ ወአንትሙሰ ረሰይክምዎ በኣተ ፈያት ወሰረቅት።

¹⁴ወመጽኡ ኀቤሁ ዕዉራን ወሐንካሳን በቤተ መቅደስ ወአሕየዎሙ።

¹⁵ወሶበ ርእዩ ሊቃነ ካህናት ወጸሐፍት መንክረ ዘገብረ ወደቂቅኒ እንዘ ይጸርሑ በቤተ መቅደስ፥ ወይብሉ ሆሣዕና ለወልደ ዳዊት ኢሐወዞሙ አላ አንጐርጐሩ።[55]

¹⁶ ወይቤልዎ ኢትሰምዕኑ ዘይብሉ እሉ ደቂቅ ወይቤሎሙ እግዚእ ኢየሱስ እወ አልቦሁ አመ አንበብክሙ ዘይቤ «እምአፈ ደቂቅ ወሕፃናት አስተዳሎከ ስብሐተ።»

¹⁷ወኀደጎሙ ወወፅአ አፍኣ እምሀገር ወቦአ ቢታንያ ወቤተ ህየ።

¹⁸ወጸቢሖ እንዘ የዐርግ እግዚእ ኢየሱስ ሀገረ ርኅበ።

¹⁹ ወርእየ ዕፀ በለስ በፍኖት ወሖረ ኀቤሃ ይንሣእ ፍሬ እምኔሃ[56] ወኢረከበ ውስቴታ ዘእንበለ ቈጽል ባሕቲቱ ወይቤላ ኢይኩን እንከ ፍሬ እምውስቴትኪ ለዓለም ወየብሰት በጊዜሃ ይእቲ በለስ።

²⁰ወርእዮሙ አርዳኢሁ አንከሩ ወይቤሉ እፎ በጊዜሃ የብሰት ዛቲ በለስ።

²¹ ወአውሥአ እግዚእ ኢየሱስ ወይቤሎሙ አማን እብለክሙ እመ ብክሙ ሃይማኖት ወኢትናፍቁ አኮ ክመ ዕፀ ባሕቲቶ ዘትገብሩ አላ ለዝንቱ ደብር ለእመ ትብልዎ ተንሥእ ወተወረው ውስተ ባሕር ይከውን ለክሙ።

²²ወኵሎ ዘሰአልክሙ በጸሎት እንዘ ትትአመኑ ትነሥኡ።

²³ ወበዊኦ ቤተ መቅደስ እንዘ ይሜህር ቀርቡ ኀቤሁ ሊቃነ ካህናት ወመላህቅተ ሕዝብ እንዘ ይብሉ በመባሕተ መኑ ትገብር ዘንተ ወመኑ ወሀበከ ዘንተ ሥልጣነ።

²⁴ወአውሥአ እግዚእ ኢየሱስ ወይቤሎሙ እሴአለክሙ አነሂ አሐተ ቃለ ወእምከመ ነገርክሙኒ አነሂ አየድዐክሙ በአይ ሥልጣን እገብር ዘንተ።

²⁵ጥምቀቱ ለዮሐንስ እምአይቴ ውእቱ እምሰማይኑ ወሚመ እምሰብእ ወኀለዩ በበይናቲሆሙ ወይቤሉ እመ ንብሎ እምሰማይ ይብለነ በእፎኬ ዘኢአመንክምዎ።

²⁶ ወእመሂ ንብሎ እምሰብእ ንፈርሆሙ ለሕዝብ እስመ ከመ ነቢይ ይሬእይዎ ለዮሐንስ።

²⁷ወአውሥእዎ ለእግዚእ ኢየሱስ ወይቤልዎ ኢነአምር ወይቤሎሙ ውእቱኒ አነሂ ኢያየድዐክሙ በአይ ሥልጣን እገብር ዘንተ።

²⁸ወምንተ ትብሉ አሐዱ ብእሲ ቦቱ ክልኤቱ ደቂቅ አኀው ወይቤሎ ለቀዳማዊ ወልድየ ሑር ተቀነይ ዮም ውስተ ዐጸደ ወይንየ።

²⁹ወአውሥአ ወይቤ ኦሆ እግዚእየ ወኢሖረ።

³⁰ወለካልኡኒ ዘይንእስ ይቤሎ ከማሁ ወአውሥአ ወይቤ እንብየ ወእምድኅረዝ ነስሐ ወሖረ።

³¹ መኑ እንከ እምክልኤሆሙ ዘገብረ ፈቃደ አቡሁ ወይቤልዎ ደኃራዊ ወይቤሎሙ እግዚእ ኢየሱስ አማን እብለክሙ ከመ ኃጥኣን ወመጸብሓን ወዘማውያን ይቀድሙክሙ በዊአ ውስተ መንግሥተ እግዚአብሔር።

³² እስመ መጽአ ኀቤክሙ ዮሐንስ በፍኖተ ጽድቅ ወኢአመንክምዎ ወመጸብሓንሰ ወዘማውያን አምንዎ ወአንትሙሰ ርእየክሙሂ ኢነሳሕክሙ ጥቀ ድኅረ ለአሚን ቦቱ።

³³ ወይቤሎሙ ካእልተ ምሳሌ ስምዑ ብእሲ በዓለ ቤት ተከለ ዐጸደ ወይን ወገብረ ሎቱ ጸቈነ ወከረየ ውስቴቱ ምክያደ ወሐነጸ ማኅፈደ ወወሀቦሙ ለዐቀብት ወነገደ።

³⁴ ወአመ በጽሐ ጊዜ ፍሬሁ ፈነወ አግብርቲሁ ኀበ ዐቀብት ከመ ያምጽኡ ሎቱ እምፍሬ ወይኑ።

³⁵ ወአኀዝዎሙ እሉ ዐቀብት ለአግብርቲሁ ቦ ዘቀሠፉ ወቦ ዘወገሩ ወቦ ዘቀተሉ።

³⁶ ወእምዝ ፈነወ ካልኣነ አግብርተ እለ ይበዝኁ እምቀደምት ወኪያሆሙኒ ከማሆሙ ረሰይዎሙ።

³⁷ወድኅረ ፈነወ ኀቤሆሙ ወልዶ እንዘ ይብል የኀፍርዎ ለወልድየሰ።

³⁸ ወሶበ ርእይዎ እሉ ዐቀብት ለወልዱ ይቤሉ በበይናቲሆሙ ነዋ ዝ ውእቱ ወራሲሁ ንዑ ንቅትሎ ወንርከብ ርስቶ።

³⁹ ወነሥእዎ ወአውፅእዎ አፍኣ እምዐጸደ ወይን ወቀተልዎ።

⁴⁰ ወአመ መጽአ በዓለ ዐጸደ ወይን ምንተ እንከ ይሬስዮሙ ለእሉ ዐቀብት።

⁴¹ወይቤልዎ በእኪት ይቀትሎሙ ለእኩያን ወወይኖሂ ይሁብ ለካልኣን ዐቀብት እለ ይሁብዎ ፍሬሁ በበጊዜሁ።

⁴² ወይቤሎሙ እግዚእ ኢየሱስ አልቦሁ አመ አንበብክሙ ውስተ መጻሕፍት «እብን እንተ መነንዋ ነደቅት ይእቲ ኮነት ውስተ ርእሰ ማዕዘንት እምኀበ እግዚአብሔር ኮነት ዛቲ ወነካር ይእቲ ለአዕይንቲነ።»

⁴³በእንተ ዝንቱ እብለክሙ ከመ ትትሀየድ እምኔክሙ መንግሥተ እግዚአብሔር ወትትወሀብ ለካልኣን እለ ይገብሩ ፍሬሃ።

⁴⁴ ወዘሰ ወድቀ ዲበ ይእቲ እብን ይትቀጠቀጥ ወለዘሂ ወድቀት ዲቤሁ ተሐርጾ።

⁴⁵ወሰሚዖሙ ሊቃነ ካህናት ወፈሪሳውያን ምሳልያቲሁ አእመሩ ከመ በእንቲኣሆሙ ይብል፤

⁴⁶ወእንዘ ይፈቅዱ የአኀዝዎ ፈርህዎሙ ለሕዝብ እስመ ከመ ነቢይ ውእቱ በኀቤሆሙ።