Read Ge'ez NT – ሐዲስ ኪዳን በልሳነ ግእዝ ወንጌል ዘማቴዎስ 22 Bible Online

ወንጌል ዘማቴዎስ 22 - Ge'ez NT – ሐዲስ ኪዳን በልሳነ ግእዝ bible

ወንጌል ዘማቴዎስ 22

¹ ወአውሥአ እግዚእ ኢየሱስ ዳግመ ወተናገረ በምሳሌ እንዘ ይብል።

²ትመስል መንግሥተ ሰማያት ብእሴ ንጉሠ ዘገብረ ከብካበ ለወልዱ።

³ወፈነወ አግብርቲሁ ይጸውዕዎሙ ለእለ ተዐሠሩ ውስተ ከብካብ ወአበዩ መጺአ።

⁴ ወዳግመ ፈነወ ካልኣነ አግብርተ እንዘ ይብል በልዎሙ ለእለ ዐሠርናሆሙ ናሁ ምሳሕየ አስተዳሎኩ ወጠባሕኩ መጋዝእትየ ወአስዋርየ ወኵሉ ድልው ንዑ ውስተ ከብካብየ።

⁵ወእሙንቱሰ ተሀየዩ ወኀለፉ ቦ ዘሖረ ውስተ ገራህቱ ወቦ ዘሖረ ውስተ ንግዱ ወቦ ዘሖረ ውስተ ዐጸደ ወይኑ።

⁶ወእለሰ ተርፉ አኀዝዎሙ ለአግብርቲሁ ወቀተልዎሙ ወኪያሁኒ ጸዐልዎ።

⁷ ወሰሚዖ ንጉሥ ተምዐ ወፈነወ ሐራሁ ይቅትልዎሙ ለእልክቱ ቀተልት ወቀተልዎሙ ወሀገሮሙኒ አውዐዩ።

⁸ ወእምዝ ይቤሎሙ ለአግብርቲሁ ከብካብየሰ ድልው ውእቱ ወባሕቱ ኢደለዎሙ ለእለ ዐሠርናሆሙ።

⁹ ሑሩኬ እንከ ውስተ መራሕብት ወአናቅጽ ወኵሎ ዘረከብክሙ ጸውዑ ውስተ ከብካብ።

¹⁰ወወፂኦሙ እሙንቱ አግብርት ውስተ ፍናው አስተጋብኡ ኵሎ ዘረከቡ እኩያነ ወኄራነ ወመልአ ቤተ በዓል እምእለ ይረፍቁ።

¹¹ወበዊኦ ንጉሥ ይርአዮሙ ለእለ ይረፍቁ ረከበ በህየ ብእሴ ዘኢለብሰ ልብሰ መርዓ።

¹² ወይቤሎ ካልእየ እፎ ቦእከ ዝየ ዘእንበለ ትልበስ ልብሰ መርዓ ወተፈፅመ ውእቱ ብእሲ።

¹³ ወእምዝ አዘዞሙ ንጉሥ ለአግብርቲሁ ይእስርዎ እደዊሁ ወእገሪሁ ወያውፅእዎ ውስተ ጸናፌ ጽልመት ኀበ ሀሎ ብካይ ወሐቅየ ስነን።

¹⁴ እስመ ብዙኃን እሙንቱ ጽዉዓን ወኅዳጣን ኅሩያን።

¹⁵ ወእምዝ ወፂኦሙ ፈሪሳውያን ተማከሩ ላዕለ እግዚእ ኢየሱስ ከመ ያስሕትዎ በቃሉ።

¹⁶ ወፈነዉ ኀቤሁ አርዳኢሆሙ ምስለ ሰብአ ሄሮድስ ወይቤልዎ ሊቅ ነአምር ከመ ራትዕ አንተ ወበጽድቅ ትሜህር ፍኖተ እግዚአብሔር ወኢተሐስብ መነሂ ወኢታደሉ ለገጸ ሰብእ።

¹⁷ንግረነኬ እንከ ዘይረትዕ ምንተ ትብል ይከውንሁ ውሂበ ጸባሕተ ዲናር ለቄሳር ወሚመ ኢይከውንኑ።

¹⁸ወአእመሮሙ እግዚእ ኢየሱስ እከዮሙ ወይቤሎሙ ለምንት ታሜክሩኒ ኦ መደልዋን።

¹⁹አርእዩኒ አላደ ዲናሩ ወአምጽኡ ሎቱ ዲናረ።

²⁰ወይቤሎሙ እግዚእ ኢየሱስ ዘመኑ ዝንቱ መልክዑ ወጽሕፈቱ።

²¹ ወይቤልዎ ዘቄሳር ወይቤሎሙ ሀቡ ዘቄሳር ለቄሳር ወዘእግዚአብሔር ለእግዚአብሔር።

²²ወሰሚዖሙ አንከሩ ወኀደግዎ ወኀለፉ።

²³ ወበይእቲ ዕለት መጽኡ ኀቤሁ ሰዱቃውያን እለ ይብሉ አልቦ ትንሣኤ ምዉታን።

²⁴ ወተስእልዎ እንዘ ይብሉ ኦ ሊቅ ሙሴ ጸሐፈ ለነ እመቦ ብእሲ ዘሞተ እኁሁ እንዘ አልቦ ውሉድ ያውስባ ለብእሲተ እኁሁ ወያቅም ዘርዐ ለእኁሁ።

²⁵ሀለዉ እንከ ኀቤነ ሰብዐቱ አኀው ወዘይልህቅ አውሰበ ብእሲተ ወሞተ እንዘ አልቦ ውሉድ ወኀደገ ብእሲቶ ለእኁሁ።

²⁶ወከማሁ ካልኡኒ ወሣልሱኒ እስከ ሰብዐቲሆሙ።[57]

²⁷ወድኅረ ኵሎሙ ሞተት ይእቲ ብእሲት።

²⁸ወአመ ይትነሥኡ እንከ ምዉታን ለመኑ እምሰብዐቲሆሙ ትከውን ብእሲተ እስመ ኵሎሙ አውሰብዋ።

²⁹ወአውሥአ እግዚእ ኢየሱስ ወይቤሎሙ ስሕትክሙ በኢያእምሮ መጻሕፍት ወኢኀይለ እግዚአብሔር።

³⁰ አመሰ የሐይዉ ምዉታን ኢያወስቡ ወኢይተዋሰቡ አላ ከመ መላእክተ እግዚአብሔር በሰማያት እሙንቱ።

³¹ወበእንተ ትንሣኤ ምዉታንሰ ኢያንበብክሙኑ ዘተብህለ ለክሙ እምኀበ እግዚአብሔር ዘይቤ።

³² «አነ ውእቱ እግዚአብሔር አምላከ አብርሃም ወአምላከ ይስሐቅ ወአምላከ ያዕቆብ» ኢኮነኬ አምላከ ምዉታን አላ አምላከ ሕያዋን ውእቱ።

³³ወሰሚዖሙ ሕዝብ አንከሩ ምህሮቶ።

³⁴ወሰሚዖሙ ፈሪሳውያን ከመ ፈፀሞሙ ለሰዱቃውያን ተጋብኡ ኀቤሁ ኅቡረ።

³⁵ ወተስእሎ እምውስቴቶሙ አሐዱ ጸሓፌ ሀገር እንዘ ያሜክሮ።

³⁶ኦ ሊቅ አይኑ ትእዛዝ የዐቢ በውስተ ኦሪት።

³⁷ ወይቤሎ እግዚእ ኢየሱስ «አፍቅሮ ለእግዚአብሔር አምላክከ በኵሉ ልብከ ወበኵሉ ነፍስከ ወበኵሉ ኀይልከ ወበኵሉ ኅሊናከ።»

³⁸ዛቲ ትእዛዝ ዐባይ ወቀዳሚት።

³⁹ ወካልእታሂ እንተ ትመስላ «አፍቅር ቢጸከ ከመ ነፍስከ።»

⁴⁰ በእላ ክልኤቲ ትእዛዛት ተሰቅሉ ኵሉ ኦሪት ወነቢያት።

⁴¹ ወእንዘ ጉቡኣን ፈሪሳውያን ተስእሎሙ እግዚእ ኢየሱስ እንዘ ይብል።

⁴²ምንተ ትብሉ በእንተ ክርስቶስ ወልደ መኑ ውእቱ።

⁴³ወይቤልዎ ወልደ ዳዊት።

⁴⁴ ወይቤሎሙ እግዚእ ኢየሱስ እፎ እንከ ለሊሁ ዳዊት በመንፈስ ቅዱስ ይቤ «ይቤሎ እግዚእ ለእግዚእየ ንበር በየማንየ እስከ አገብኦሙ ለጸላእትከ ታሕተ መከየደ እገሪከ።»

⁴⁵ዘለሊሁ እንከ ዳዊት እግዚእየ ይቤሎ እፎ እንከ ይከውኖ ወልዶ።

⁴⁶ወአልቦ ዘክህለ አውሥኦቶ ቃለ፥ ወአልቦ ዘተኀበለ ይሰአሎ ምንተኒ እምይእቲ ዕለት።