Read Ge'ez NT – ሐዲስ ኪዳን በልሳነ ግእዝ ወንጌል ዘማቴዎስ 23 Bible Online

ወንጌል ዘማቴዎስ 23 - Ge'ez NT – ሐዲስ ኪዳን በልሳነ ግእዝ bible

ወንጌል ዘማቴዎስ 23

¹ ወእምዝ ነገሮሙ እግዚእ ኢየሱስ ለሕዝብ ወለአርዳእሁ እንዘ ይብል።

² ዲበ መንበረ ሙሴ ነበሩ ለክሙ ጸሐፍት ወፈሪሳውያን።

³ ኵሎ ዘመሀሩክሙ ግበሩ ወዕቀቡ ወዘከመ ምግባሮሙሰ ኢትግበሩ እስመ እሙንቱ ዘይሜህሩ ለሰብእ ኢይገብሩ።

⁴ ወየአስሩ ጾረ ዐቢየ ወክቡደ ወያሰክምዎ ለሰብእ ዲበ መትከፍቱ ወለሊሆሙሰ ኢይለክፍዎ ጥቀ በአጽባዕቶሙ።

⁵ ወኵሎ ምግባሮሙ ዘይገብሩ ለዐይነ ሰብእ ይገብሩ ወይሰፍሑ ኵርበታቲሆሙ ወያዐብዩ አዝፋረ አልባሲሆሙ።

⁶ ወያፈቅሩ ርእሰ ምርፋቃት በውስተ ምሳሐት ወነቢረ ፍጽም በውስተ አዕዋዳት።

⁷ወተአምኆ በውስተ ምሥያጣት ከመ ይበሎሙ ሰብእ መምህራነ።

⁸አንትሙሰኬ ኢትሰመዩ መምህረ በዲበ ምድር እስመ አሐዱ ውእቱ መምህርክሙ ወአንትሙሰ አኀው ኵልክሙ።

⁹ ወኢትረስዩ አበ በዲበ ምድር እስመ አሐዱ ውእቱ አቡክሙ ሰማያዊ።

¹⁰ወኢትስምዩ እግዚአ በዲበ ምድር እስመ አሐዱ ውእቱ እግዚእክሙ ክርስቶስ።

¹¹ ወባሕቱ ዘይልህቀክሙ ይኩንክሙ ላእከ።

¹² እስመ ዘአዕበየ ርእሶ የኀሥር ወዘአትሐተ ርእሶ ይከብር።

¹³ አሌ ለክሙ ጸሐፍት ወፈሪሳውያን መደልዋን እስመ ትበልዑ አብያተ መበለታት በምክንያተ አንኆ ጸሎትክሙ ወበእንተ ዝንቱ ትረክቡ ኵነኔ ፈድፋደ።

¹⁴ አሌ ለክሙ ጸሐፍት ወፈሪሳውያን መደልዋን እስመ ተዐጽዉ መንግሥተ ሰማያት ቅድመ ገጹ ለሰብእ አንትሙሂ ኢትበውኡ ወለእለሂ ይበውኡ ትከልእዎሙ በዊአ።

¹⁵አሌ ለክሙ ጸሐፍት፥ ወፈሪሳውያን መደልዋን እስመ ተዐውዱ ባሕረ ወየብሰ ከመ ታጥምቁ አሐደ ፈላሴ ወተጠሚቆ ትሬስይዎ ካዕበተክሙ ወልደ ገሃነም።

¹⁶ አሌ ለክሙ ጸሐፍት ወፈሪሳውያን አምርሕተ ዕዉራን እለ ትብሉ ዘመሐለ በቤተ መቅደስ ኢይጌጊ ወዘሰ መሐለ በወርቀ ቤተ መቅደስ ይጌጊ።

¹⁷ኦ አብዳን ወዕዉራን አይኑ የዐቢ ወርቅኑ ወሚመ ቤተ መቅደስ አኮኑ ቤተ መቅደስ ዘይቄድሶ ለወርቅ።

¹⁸ዘሰ መሐለ በምሥዋዕ ኢይጌጊ ትብሉ ወዘሰ መሐለ በጽንሓሕ ዘላዕሌሁ ይጌጊ ትብሉ።

¹⁹ ኦ አብዳን ወዕዉራን አይኑ የዐቢ ጽንሓሕኑ ወሚመ ምሥዋዕ አኮኑ ምሥዋዕ ዘይቄድሶ ለውእቱ ጽንሓሕ።

²⁰ዘሰኬ መሐለ በምሥዋዕ መሐለ ቦቱ ወበኵሉ ዘይነብር ዲቤሁ።

²¹ወዘሂ መሐለ በቤተ መቅደስ መሐለ ቦቱ ወበኵሉ ዘይነብር ውስቴቱ።

²² ወዘሂ መሐለ በሰማይ መሐለ በመንበሩ ለእግዚአብሔር ወበዘይነብር ዲቤሁ።

²³ አሌ ለክሙ ጸሐፍት ወፈሪሳውያን መደልዋን እለ ታበውኡ ዐሥራተ እዴሁ ለአዛብ ወለሲላን ወለከሙን ወኀደግሙ ዘየዐቢ ትእዛዛተ ኦሪት ፍትሐ ወጽድቀ ወሃይማኖተ ዘኒ መፍትው ትግበሩ ወዝክተኒ ኢትኅድጉ።

²⁴አምርሕተ ዕዉራን እለ ጻጹተ ትነጥፉ ወገመለሰ ትውኅጡ።

²⁵ አሌ ለክሙ ጸሐፍት ወፈሪሳውያን መደልዋን እለ ተኀፅብዎ ለጽዋዕ ወለጻሕል እንተ አፍኣሁ ወውስጡሰ ምሉእ ሀዪደ ወዐመፃ ወትዕግልተ።

²⁶ ኦ ፈሪሳዊ ዕዉር ቅድመ ኅፅቦ ለጽዋዕ፥ ወለጻሕል እንተ ውስጡ፥ ከመ ይኩን ንጹሐ እንተ አፍኣሁኒ።

²⁷ አሌ ለክሙ ጸሐፍት ወፈሪሳውያን መደልዋን እለ ትመስሉ መቃብራተ ግብሱሳነ እለ እንተ አፍኣሆሙ ያስተርእዩ ሠናያነ ወእንተ ውስጦሙሰ ምሉኣን አዕፅምተ ወአብድንተ ወኵሎ ርኵሰ።

²⁸ከማሁኬ አንትሙኒ እንተ አፍኣክሙ ትጼደቁ ለዐይነ ሰብእ ወእንተ ውስጥክሙሰ ምሉኣን አንትሙ ዐመፃ ወሀዪደ ወአድልዎ።

²⁹ አሌ ለክሙ ጸሐፍት ወፈሪሳውያን መደልዋን እለ ትነድቁ መቃብሪሆሙ ለነቢያት ወታስተሣንዩ ዝኅሮሙ ለጻድቃን።

³⁰ወትብሉ ሶበሰ ሀለውነ በመዋዕለ አበዊነ እምኢተሳተፍነ ምስሌሆሙ በደመ ነቢያት።

³¹ ናሁኬ ለሊክሙ ተአምኑ፥ ከመ ደቂቆሙ አንትሙ ለቀተልተ ነቢያት።

³²አንትሙሂ ፈጽሙ መስፈርተ አበዊክሙ።

³³ ኦ አፍዖታት! ትውልደ አራዊተ ምድር፥ በእፎ ትክሉ አምስጦ እምኵነኔ ገሃነም።

³⁴ ወበእንተዝ ናሁ አነ እፌኑ ኀቤክሙ ነቢያተ ወጠቢባነ ወጸሐፍተ ወትቀትሉ እምውስቴቶሙ ወትሰቅሉ ወትቀሥፉ በመኳርብቲክሙ ወትሰድድዎሙ እምሀገር ውስተ ሀገር።

³⁵ ከመ ይብጻሕ ላዕሌክሙ ደመ ኵሎሙ ጻድቃን ዘተክዕወ ዲበ ምድር እምደመ አቤል ጻድቅ እስከ ደመ ዘካርያስ ወልደ በራክዩ ዘቀተልክምዎ በማእከለ ቤተ መቅደስ ወምሥዋዕ።

³⁶አማን እብለክሙ ከመ ዝንቱ ኵሉ ይበጽሓ ለዛቲ ትውልድ።

³⁷ ኢየሩሳሌም ኢየሩሳሌም እንተ ትቀትሎሙ ለነቢያት ወትዌግሮሙ ለሐዋርያት እለ ተፈነዉ ኀቤሃ ሚመጠነ ፈቀድኩ አስተጋብኦሙ ለውሉድኪ ከመ እንተ ታስተጋብእ ዶርሆ ዕጐሊሃ ታሕተ ክነፊሃ ወአበይክሙ።

³⁸ ናሁ ይትኀደግ ለክሙ ቤትክሙ በድወ።

³⁹ አማን እብለክሙ እምይእዜሰ ኢትሬእዩኒ እስከ ሶበ ትብሉ «ቡሩክ ዘይመጽእ በስመ እግዚአብሔር።»