Read Ge'ez NT – ሐዲስ ኪዳን በልሳነ ግእዝ ወንጌል ዘማቴዎስ 24 Bible Online

ወንጌል ዘማቴዎስ 24 - Ge'ez NT – ሐዲስ ኪዳን በልሳነ ግእዝ bible

ወንጌል ዘማቴዎስ 24

¹ ወወፂኦ እግዚእ ኢየሱስ እምቤተ መቅደስ ሖረ ወቀርቡ አርዳኢሁ ወአርአይዎ ንደቀ ሕንጻሁ ለቤተ መቅደስ።

²ወአውሥአ ወይቤሎሙ ትሬእዩኑ ዘንተ ኵሎ አማን እብለክሙ ኢይትኀደግ ዝየ እብን ዲበ እብን ዘኢይትነሠት።

³ወእንዘ ይነብር እግዚእነ ውስተ ደብረ ዘይት ቀርቡ ኀቤሁ አርዳኢሁ እንተ ባሕቲቶሙ ወይቤልዎ ንግረነ ማእዜ ይከውን ዝንቱ ወምንት ተአምሪሁ ለምጽአትከ ወለኅልቀተ ዓለም።

⁴ወአውሥአ እግዚእ ኢየሱስ ወይቤሎሙ ዑቁ ኢያስሕቱክሙ።

⁵ እስመ ብዙኃን ይመጽኡ በስምየ እንዘ ይብሉ አነ ውእቱ ክርስቶስ ወያስሕትዎሙ ለብዙኃን።

⁶ወሀለወክሙ ትስምዑ ቀትለ ወድምፀ ጸባኢት ዑቁ ኢትደንግፁ እስመ ግብር ይከውን ከማሁ ወባሕቱ አኮ በጊዜሃ ዘየኀልቅ።

⁷ወይትነሥኡ ሕዝብ ዲበ ሕዝብ ወነገሥት ላዕለ ነገሥት ወይመጽእ ረኃብ ወብድብድ ወድልቅልቅ ወሀከክ በበ በሓውርቲሁ።

⁸ወዝንቱ ኵሉ ቀዳሚሁ ለሕማም።

⁹ አሜሃ ይትባጽሑክሙ ወይሜጥዉክሙ ለምንዳቤ ወይቀሥፉክሙ ወይቀትሉክሙ ወይጸልኡክሙ ወትከውኑ ጽሉኣነ በኀበ ኵሉ ሰብእ በእንተ ስምየ።

¹⁰ወአሜሃ የዐልዉ ብዙኃን ሃይማኖቶሙ ወይጻልኡ በበይናቲሆሙ ወይትቃተሉ።

¹¹ ወብዙኃን ሐሳውያነ ነቢያት ይመጽኡ ወለብዙኃን ያስሕትዎሙ።

¹² ወእምብዝኀ ዓመፃ ወእከይ ትሴኵስ ፍቅር እምብዙኃን[58]።

¹³ ወዘሰ አዝለፈ ትዕግሥቶ ውእቱ ይድኅን።

¹⁴ ወይሰበክ ዝ ወንጌለ መንግሥት ውስተ ኵሉ ዓለም ከመ ይኩን ስምዐ ላዕለ ኵሉ አሕዛብ ወይእተ አሚረ ይበጽሕ ኅልቅት።

¹⁵ ወእምከመ ርኢክሙ ትእምርተ ርኵስ ዘምዝባሬ ዘተብህለ በዳንኤል ነቢይ «እንዘ ይቀውም ውስተ መካን ቅዱስ ዘያነብብ ለይለቡ።»

¹⁶አሜሃ እለ ውስተ ይሁዳ ይጐዩ ውስተ አድባር።

¹⁷ ወዘሂ ሀሎ ውስተ ናሕስ ኢይረድ ይንሣእ ዘውስተ ቤቱ።

¹⁸ወዘሂ ውስተ ገራህት ሀሎ ኢይትመየጥ ድኅሬሁ ይንሣእ ልብሶ።

¹⁹ወባሕቱ አሌ ሎን ለፅኑሳት ወለእለ የሐፅና በውእቱ መዋዕል።

²⁰ ወጸልዩ ባሕቱ ከመ ኢይኩን ጕያክሙ በክረምት ወበሰንበት።

²¹ እስመ ይከውን ይእተ አሚረ ዐቢይ ሕማም ወምንዳቤ ዘኢኮነ ከማሁ እምአመ ተፈጥረ ዓለም እስከ ዮም ወኢይከውንሂ።

²²ወሶበ ኢኀጽራ እማንቱ መዋዕል እምኢድኅነ መኑሂ ኵሉ ዘሥጋ ወባሕቱ በእንተ ኅሩያኒሁ የኀጽራ እማንቱ መዋዕል።

²³ አሜሃ እመቦ ዘይቤለክሙ ነዋ ዝየ ሀሎ ክርስቶስ ወነዋ ከሃክ ኢትእመኑ።

²⁴ እስመ ይትነሥኡ ሐሳውያነ መሲሕ ወሐሳውያነ ነቢያት ወይገብሩ ተአምራተ ወመንክራተ ዐበይተ ለአስሕቶ ሶበሰ ይትከሀሎሙ ለኅሩያንሂ እምአስሐትዎሙ።

²⁵ናሁ አቅደምኩ ነጊሮተክሙ።

²⁶እመቦ ዘይቤለክሙ ነዋ ገዳመ ሀሎ ኢትፃኡ ወነዋ ውስተ አብያት ኢትእመኑ።

²⁷ እስመ ከመ መብረቅ ዘይወፅእ እምጽባሕ ወያስተርኢ እስከ ዐረብ ከማሁ ምጽአቱ ለወልደ ዕጓለ እመሕያው።

²⁸ ኀበ ሀሎ ገደላ ህየ ይትጋብኡ አንስርት።

²⁹ ወበጊዜሃ እምድኅረ ሕማሞን ለእማንቱ መዋዕል ፀሐይኒ ይጸልም ወወርኅኒ ኢይሁብ ብርሃኖ ወከዋክብትኒ ይወድቁ እምሰማይ ወያንቀለቅል ኀይለ ሰማያት።

³⁰ ወይእተ አሚረ ያስተርኢ ተአምሪሁ ለወልደ ዕጓለ እመሕያው በሰማይ አሜሃ ይበክዩ ኵሎሙ አሕዛበ ምድር ሶበ ይሬእይዎ ለወልደ ዕጓለ እመሕያው እንዘ ይመጽእ በደመና ሰማይ ምስለ ኀይል ወስብሐት ብዙኅ።

³¹ ወይፌንዎሙ ለመላእክቲሁ ምስለ ቃለ ቀርን ወስብሐት ዐቢይ ወያስተጋብእዎሙ ለኅሩያኒሁ እምአርባዕቱ ነፋሳት እምአጽናፈ ሰማይ እስከ አጽናፊሃ።

³²ወእምበለስ አእምሩ አምሳሊሁ እምከመ ኮነ ዐጽቃ ድኩመ ወቈጽላ ልምሉመ ተአምሩ ከመ ቀርበ ማእረር።

³³ከማሁኬ አንትሙሂ እምከመ ርኢክሙ ዘንተ ኵሎ አእምሩ ከመ ቀርበ ወሀሎ ኀበ ኆኅት።

³⁴ አማን እብለክሙ ከመ ኢተኀልፍ ዛቲ ትውልድ እስከ ዝ ኵሉ ይትገበር።

³⁵ሰማይ ወምድር የኀልፍ ወቃልየሰ ኢየኀልፍ።

³⁶ ወበእንተሰ ይእቲ ዕለት ወኪያሃ ሰዓት አልቦ ዘየአምራ ኢመላእክተ ሰማይ ወኢወልድ ዘእንበለ አብ ባሕቲቱ።

³⁷ ወበከመ ኮነ በመዋዕለ ኖኅ ከማሁ ይከውን ምጽአቱ ለወልደ ዕጓለ እመሕያው።

³⁸በከመ ይእተ አሚረ እምቅድመ አይኅ ይበልዑ ወይሰትዩ ያወስቡ፥ ወይትዋሰቡ እስከ አመ ቦአ ኖኅ ውስተ ንፍቀ ታቦት።

³⁹ወኢያእመሩ እስከ አመ መጽአ ማየ አይኅ ወአጥፍአ ኵሎ ከማሁኬ ይከውን ምጽአቱ ለወልደ ዕጓለ እመሕያው።

⁴⁰ አሜሃ ክልኤቱ ይሄልዉ ውስተ አሐዱ ገራህት አሐደ ይነሥኡ ወካልኦ የኀድጉ።

⁴¹ወክልኤቲ የሐርጻ በአሐዱ ማሕረጽ አሐተ ይነሥኡ ወካልእታ የኀድጉ ወክልኤቱ ይሰክቡ ውስተ አሐዱ ዐራት አሐደ ይነሥኡ ወካልኦ የኀድጉ።

⁴² ትግሁ እንከ እስመ ኢተአምሩ በአይ ሰዓት ይመጽእ እግዚእክሙ።

⁴³ ወዘንተ ባሕቱ አእምሩ ሶበሁ የአምር በዓለ ቤት ጊዜ ይመጽእ ሰራቂ እምተግሀ ወእምኀለወ ወእምኢኀደገ ይክርዩ ቤቶ።

⁴⁴ከማሁ አንትሙሂ ድልዋኒክሙ ሀልዉ እስመ በጊዜ ኢተሐዘብክሙ ይመጽእ ወልደ ዕጓለ እመሕያው።

⁴⁵መኑ እንጋ፥ ገብር ምእመን፥ ወጠቢብ ዘይሠይሞ እግዚኡ ውስተ ቤቱ[59] ከመ የሀቦሙ ሲሳዮሙ በጊዜሁ።

⁴⁶ብፁዕ ውእቱ ገብር ዘመጺኦ እግዚኡ ይረክቦ እንዘ ዘንተ ይገብር።

⁴⁷ አማን እብለክሙ ከመ ዲበ ኵሉ ንዋዩ ይሠይሞ።

⁴⁸ወእመሰ ይቤ ውእቱ ገብር እኩይ በልቡ ይጐነዲ አቲወ እግዚእየ።

⁴⁹ወይዘብጥ አብያጺሁ አግብርተ ወይበልዕ ወይሰቲ ምስለ ሰካርያን።

⁵⁰ወይመጽእ እግዚኡ ለውእቱ ገብር በዕለተ ኢተሐዘበ ወበጊዜ ኢያእመረ።

⁵¹ ወይሠጥቆ እማእከሉ ወይሬሲ መክፈልቶ ምስለ መደልዋን ኀበ ሀሎ ብካይ ወሐቅየ ስነን።