Read Ge'ez NT – ሐዲስ ኪዳን በልሳነ ግእዝ ወንጌል ዘማቴዎስ 25 Bible Online

ወንጌል ዘማቴዎስ 25 - Ge'ez NT – ሐዲስ ኪዳን በልሳነ ግእዝ bible

ወንጌል ዘማቴዎስ 25

¹ አሜሃ ትመስል መንግሥተ ሰማያት ዐሥሮን ደናግለ እለ ነሥኣ መኃትዊሆን ወወፅኣ ለቀበላ መርዓዊ።

²ወኀምስ እምውስቴቶን አብዳት እማንቱ ወኀምስ ጠባባት።

³ወአብዳትሰ ነሢኦን መኃትዊሆን ኢነሥኣ ቅብዐ ምስሌሆን።

⁴ወጠባባትሰ ነሥኣ ቅብዐ በገማዕዊሆን ምስለ መኃትዊሆን።

⁵ወጐንድዮ መርዓዊ ደቀሳ ኵሎን ወኖማ።

⁶ ወከዊኖ መንፈቀ ሌሊት ውውዓ ኮነ ናሁ መርዓዊ መጽአ ፃኡ ውስተ ቀበላሁ።

⁷ ወእምዝ ነቅሓ እልኩ ደናግል ኵሎን ወአሠነያ መኃትዊሆን ወወፅጽኣ ለቀበላ መርዓዊ።

⁸ወእልኩ አብዳት ይቤላሆን ለጠበባት ሀባነ ቅብዐ እምቅብዕክን እስመ መኃትዊነ ጠፍኣነ።

⁹ወአውሥኣሆን ጠበባት ወይቤላሆን አልቦ ዘየአክል ለነ ወለክን አላ ሑራ ኀቤሆሙ ለእለ ይሠይጡ ወተሣየጣ ለክን።

¹⁰ወሐዊሮን ይሣየጣ በጽሐ መርዓዊ ወቦአ ምስሌሁ እልኩ እለ ድልዋት ውስተ ከብካብ ወተዐጽወ ኆኅት።

¹¹ወድኅረ መጽኣ እልክቱሂ ደናግል ወይቤላ እግዚኦ እግዚኦ አርኅወነ።

¹² ወአውሥኦን፥ ወይቤሎን አማን እብለክን ከመ ኢየአምረክን እስመ ስእንክን ተጊሀ ወአምስዮ አሐተ ሰዓተ ምስሌየ[60]።

¹³ ትጉሁኬ እስመ ኢተአምሩ ዕለታ ወሰዓታ እንተ ባቲ ይመጽእ ወልደ ዕጓለ እመሕያው።

¹⁴ እስመ ከመ ብእሲ ዘይነግድ ወጸውዐ አግብርቲሁ ወወሀቦሙ ንዋዮ ይትገበሩ ቦቱ።

¹⁵ ቦ ለዘወሀቦ ኀምስተ መክሊተ ወቦ ለዘወሀቦ ክልኤተ መክሊተ ወቦ ለዘወሀቦ አሐደ መክሊተ ወለለአሐዱ እምኔሆሙ በአምጣነ ይክሉ ወሀቦሙ ወነገደ በጊዜሃ።

¹⁶ወሖረ ዝኩ ዘኀምሰ መካልየ ነሥአ ወተገበረ ቦቶን ወረብኀ ካልኣተ ኀምሰ መካልየ።

¹⁷ወከማሁ ዘሂ ክልኤተ መካልየ ነሥአ ረብኀ ካልኣተ ክልኤተ መካልየ።

¹⁸ወዘአሐተሰ መክሊተ ነሥአ ኀለፈ ወከረየ ምድረ ወኀብአ ወርቀ እግዚኡ።

¹⁹ ወእምድኅረ ብዙኅ መዋዕል አተወ እግዚኦሙ ለእሉ አግብርት ወአኀዘ ይትሐሰቦሙ፤

²⁰ወቀርበ ዘኀምሰ መካልየ ነሥአ ወአምጽአ ካልኣተ ኀምሰ መካልየ እንዘ ይብል አኮኑ እግዚኦ ኀምሰ መካልየ ወሀብከኒ ወናሁ ኀምስ መካልይ እለ ረባኅኩ ዲቤሆን።

²¹ ወይቤሎ እግዚኡ ኦ ገብር ኄር ወምእመን ዘበውኁድ ምእመነ ኮንከ ዲበ ብዙኅ እሠይመከ ባእ ውስተ ፍሥሓሁ ለእግዚእከ።

²²ወመጽአ ዘክልኤተ መክሊተ ነሥአ ወይቤ እግዚኦ አኮኑ ክልኤተ መካልየ ወሀብከኒ ናሁ ክልኤተ ካልኣተ መካልየ እለ ረባኅኩ ዲቤሆን።

²³ወይቤሎ እግዚኡ ኦ ገብር ኄር ወምእመን ዘበውኁድ ምእመነ ኮንከ ዲበ ብዙኅ እሠይመከ ባእ ውስተ ፍሥሓሁ ለእግዚእከ።

²⁴ወመጽአ ዘአሐተኒ መክሊተ ነሥአ ወይቤ እግዚኦ አአምረከ ከመ ድሩክ ብእሲ አንተ ተአርር እምኀበ ኢዘራዕከ ወታስተጋብእ እምኀበ ኢዘረውከ።

²⁵ወፈሪህየ ሖርኩ ወኀባእኩ መክሊተከ ውስተ ምድር ናሁ እንከ መክሊትከ።

²⁶ወአውሥኦ እግዚኡ ወይቤሎ ኦ ገብር ሀካይ ወእኩይ ተአምረኒኑ ከመ ድሩክ ብእሲ አነ ወአአርር እምኀበ ኢዘራዕኩ ወአስተጋብእ እምኀበ ኢዘረውኩ።

²⁷እምደለወከ ታግብእ ወርቅየ ውስተ ማእድየ ወመጺእየ እምአስተገበርክዎ ለልየ በርዴ።

²⁸ወይቤሎሙ ለእለ ይቀውሙ ህየ ንሥኡ እምኀቤሁ ዘንተ መክሊተ ወሀብዎ ለዘቦቱ ዐሠርቱ መክሊት።

²⁹ እስመ ለዘቦ ይሁብዎ ወይዌስክዎ ወለዘሰ አልቦ እለሂ ቦ የሀይድዎ።

³⁰ ወለገብርሰ እኩይ ወሀካይ አውፅእዎ አፍኣ ወደይዎ ውስተ ጸናፌ ጽልመት ኀበ ሀሎ ብካይ ወሐቅየ ስነን።

³¹ ወአመ ይመጽእ ወልደ ዕጓለ እመሕያው በስብሐቲሁ ወኵሎሙ መላእክቲሁ ቅዱሳን ምስሌሁ አሜሃ ይነብር ዲበ መንበረ ስብሐቲሁ።

³² ወይትጋብኡ ኵሎሙ አሕዛብ ቅድሜሁ ወይፈልጦሙ ዘዘዚኣሆሙ ከመ እንተ ይፈልጥ ኖላዊ አባግዐ እምአጣሊ።

³³ወያቀውም አባግዐ በየማኑ ወአጣሌ በፀጋሙ።

³⁴ አሜሃ ይብሎሙ ንጉሥ ለእለ በየማኑ ንዑ ኀቤየ ቡሩካኑ ለአቡየ ትረሱ መንግሥተ ሰማያት ዘድልው ለክሙ እምቅድመ ይትፈጠር ዓለም።

³⁵ እስመ ርኅብኩ ወአብላዕክሙኒ ጸማእኩ ወአስተይክሙኒ ነግደ ኮንኩ ወተወከፍክሙኒ።

³⁶ዐረቁ ወአልበስክሙኒ ደወይኩ ወሐውጽክሙኒ ተሞቃሕኩ ወመጻእክሙ ኀቤየ ወነበብክሙኒ።

³⁷አሜሃ ያወሥኡ ጻድቃን ወይብሉ እግዚኦ ማእዜኑ ርኢናከ ርኁበከ ወአብላዕናከ ወጽሙአከ ወአስተይናከ።

³⁸ወማእዜ ርኢናከ እንግዳከ ወተወከፍናከ ወዕሩቀከ ወአልበስናከ።

³⁹ወማዕዜ ርኢናከ ድዉየከኒ ወሐውጽናከ ወሙቁሐከኒ ወመጻእነ ኀቤከ ወነበብናከ።

⁴⁰ ወእምዝ ያወሥኦሙ ንጉሥ ለእለ በየማኑ ወይብሎሙ አማን እብለክሙ ኵሎ ዘገበርክሙ ለአሐዱ እምእሉ ንኡሳን አኀውየ እለ የአምኑ ብየ፥ ሊተ ገበርክሙ።

⁴¹ ወእምዝ ይብሎሙ ለእለ በፀጋሙ ሑሩ እምኔየ ርጉማን ውስተ እሳት ዘለዓለም ዘድልው ለሰይጣን፥ ወለመላእክቲሁ።

⁴² እስመ ርኅብኩ ወኢያብላዕክሙኒ ጸማእኩ ወኢያስተይክሙኒ።

⁴³ነግደ ኮንኩ ወኢተወከፍክሙኒ ዐረቁ ወኢያልበስክሙኒ ደወይኩ ወኢሐወጽክሙኒ ተሞቃሕኩ ወኢመጻእክሙ ኀቤየ ወኢነበብክሙኒ።

⁴⁴አሜሃ ያወሥኡ እለ በፀጋሙ ወይብሉ እግዚኦ ማእዜኑ ርኢናከ ርኁበከ ወኢያብላዕናከ ወማእዜ ርኢናከ ጽሙአከ ወኢያስተይናከ ወእንግዳከ ወኢተወከፍናከ ወዕሩቀከ ወኢያልበስናከ ወድዉየከኒ ወኢሐወጽናከ ወሙቁሐከኒ ወኢነበብናከ።

⁴⁵ወእምዝ ያወሥኦሙ ንጉሥ እንዘ ይብል አማን እብለክሙ ዘኢገበርክሙ ለአሐዱ እምእሉ ንኡሳን አኀውየ ሊተ ኢገበርክሙ።

⁴⁶ ወየሐውሩ እሉሂ ውስተ ኵነኔ ዘለዓለም ወጻድቃንሰ ውስተ ሕይወት ዘለዓለም።