Read Ge'ez NT – ሐዲስ ኪዳን በልሳነ ግእዝ ወንጌል ዘማቴዎስ 26 Bible Online

ወንጌል ዘማቴዎስ 26 - Ge'ez NT – ሐዲስ ኪዳን በልሳነ ግእዝ bible

ወንጌል ዘማቴዎስ 26

¹ ወኮነ እምዘ ፈጸመ እግዚእ ኢየሱስ ዘንተ ኵሎ ነገረ ይቤሎሙ ለአርዳኢሁ።

² ተአምሩሁ ከመ እምድኅረ ክልኤ መዋዕል ይከውን ፋሲካ ወይእኅዝዎ ለወልደ ዕጓለ እመሕያው ወይሰቅልዎ።

³ወእምዝ ተጋብኡ ሊቃነ ካህናት ወጸሐፍት ወሊቃናተ ሕዝብ ውስተ ዐጸደ ሊቀ ካህናት ዘስሙ ቀያፋ።

⁴ወተማከሩ ከመ በሕብል የአኀዝዎ ለእግዚእ ኢየሱስ ወይቅትልዎ።

⁵ወይቤሉ ባሕቱ አኮኬ በበዓል ከመ ኢይኩን ሀከክ በውስተ ሕዝብ።

⁶ወበጺሖ እግዚእ ኢየሱስ ቢታንያ ቦአ ቤተ ስምዖን ዘለምጽ።

⁷ ወመጽአት ኀቤሁ ብእሲት እንተ ባቲ ቢረሌ ዘምሉእ ዕፍረተ ዘአልባስጥሮስ ዘብዙኅ ሤጡ ወሶጠት ዲበ ርእሱ ለእግዚእ ኢየሱስ እንዘ ይረፍቅ።

⁸ወርእዮሙ ዘንተ አርዳኢሁ ተምዑ ወአንጐርጐሩ ወይቤሉ ለምንት ዘመጠነዝ ዕፍረተ አኅጐለት ዛቲ ብእሲት።

⁹እምኢተሠይጠኑ ለብዙኅ ንዋይ ወይትወሀብ ምጽዋተ ለነዳያን።

¹⁰ወአእመሮሙ እግዚእ ኢየሱስ ወይቤሎሙ ለምንት ታሰርሕዋ ለዛቲ ብእሲት ሠናየ ግብረ ገብረት ላዕሌየ።

¹¹ ወለነዳያንሰ ዘልፈ ትረክብዎሙ ወጊዜ ፈቀድክሙ ታሤንዩ ሎሙ[61] ወኪያየሰ አኮ ዘልፈ ዘትረክቡኒ።

¹²ወዘንተሰ ዕፍረተ ዘሶጠት ዲበ ርእስየ ለቀበርየ ገብረት።

¹³አማን እብለክሙ በኀበ ተሰብከ ዝ ወንጌል በውስተ ኵሉ ዓለም ያንብቡ ላቲ ዘገብረት ዛቲ ብእሲት ወይዝክርዋ።

¹⁴ወእምዝ ሖረ አሐዱ እምዐሠርቱ ወክልኤቱ አርዳኢሁ ዘስሙ ይሁዳ አስቆሮታዊ ኀበ ሊቃነ ካህናት።

¹⁵ ወይቤሎሙ ሚ መጠነ ትሁቡኒ እመ አገብኦ ለክሙ ወተናገሩ ምስሌሁ ወተሰናአዉ የሀብዎ ሠላሳ ብሩረ።

¹⁶ወእምይእቲ ዕለት ኮነ የኀሥሥ ሣኅተ ከመ ያግብኦ ሎሙ።

¹⁷ ወበቀዳሚት ዕለተ ፍሥሕ ቀርቡ አርዳኢሁ ለእግዚእ ኢየሱስ ወይቤልዎ በአይቴ ትፈቅድ ናስተዳሉ ለከ ትብላዕ ፍሥሐ።

¹⁸ ወይቤሎሙ እግዚእ ኢየሱስ ሑሩ ውስተ ሀገር ኀበ እገሌ ወበልዎ ለበዓለ ውእቱ ቤት[62] ይቤለከ ሊቅ ጊዜየ ቀርበ ወበኀቤከ እገብር ፋሲካ ምስለ አርዳእየ።

¹⁹ወገብሩ አርዳኢሁ በከመ አዘዞሙ እግዚእ ኢየሱስ ወአስተዳለዉ ፍሥሐ።

²⁰ወምሴተ ከዊኖ ረፈቀ ምስለ ዐሠርቱ ወክልኤቱ አርዳኢሁ።

²¹ ወእንዘ ይበልዑ ይቤ አማን እብለክሙ ከመ አሐዱ እምኔክሙ ያገብአኒ።

²²ወተከዙ ጥቀ ወአኀዙ ይበልዎ በበ አሐዱ አነሁ እንጋ እግዚኦ።

²³ ወአውሥአ ወይቤሎሙ ዘያወርድ እዴሁ ምስሌየ ውስተ መጽብሕየ ውእቱ ያገብአኒ።

²⁴ ወወልደ ዕጓለ እመሕያውሰ የሐውር በከመ ተሠርዐ በእንቲኣሁ፥ ወባሕቱ አሌ ሎቱ ለውእቱ ብእሲ ዘያገብኦ ለወልደ ዕጓለ እመሕያው እምኀየሶ ለውእቱ ብእሲ ሶበ ኢተወልደ።

²⁵ወአውሥአ ይሁዳ ዘያገብኦ ወይቤ አነሁ እንጋ ረቢ ወይቤሎ ለሊከ ትቤ።

²⁶ ወእንዘ ይበልዑ ነሥአ ኅብስተ እግዚእ ኢየሱስ ወባረከ ወፈተተ ወወሀቦሙ ለአርዳኢሁ ወይቤሎሙ ሕንክሙ ብልዑ ዝ ውእቱ ሥጋየ።

²⁷ወነሥአ ጽዋዐኒ ወአእኰተ ወወሀቦሙ እንዘ ይብል ስትዩ እምኔሁ ኵልክሙ።

²⁸ ዝ ውእቱ ደምየ ዘሐዲስ ሥርዐት ዘይትከዐው ለቤዛ ብዙኃን ወለኅድገተ ኀጢአት።

²⁹ወናሁ እብለክሙ ኢይሰቲ እንከ እምዝንቱ አፂረ ፍሬ ወይን እስከ እንታክቲ ዕለት አመ አስትዮ ሐዲሰ ምስሌክሙ በመንግሥተ አቡየ።

³⁰ ወሰቢሖሙ ወፅኡ ውስተ ደብረ ዘይት።

³¹ ወእምዝ ይቤሎሙ እግዚእ ኢየሱስ ኵልክሙ ተዐልዉኒ[63] በዛቲ ሌሊት እስመ ይቤ መጽሐፍ እቀትሎ ለኖላዊ ወይዘረዉ አባግዐ መርዔቱ።

³² ወእምከመ ተንሣእኩ እቀድመክሙ ገሊላ።

³³ወአውሥአ ጴጥሮስ ወይቤሎ እመሂ ኵሎሙ ዐለዉከ አንሰ ኢየዐልወከ ግሙራ።

³⁴ ወይቤሎ እግዚእ ኢየሱስ አማን እብለከ ከመ በዛቲ ሌሊት ሥልሰ ትክሕደኒ ዘእንበለ ይንቁ ዶርሆ።

³⁵ ወይቤሎ ጴጥሮስ እመውትሂ ምስሌከ ወኢይክሕደከ ወከማሁ ይቤሉ ኵሎሙ አርዳኢሁ።

³⁶ወእምዝ ሖረ ምስሌሆሙ ውስተ ዐጸደ ወይን ዘስሙ ጌቴሴማን ወይቤሎሙ ለአርዳኢሁ ንበሩ ዝየ እስከ ሶበ አሐውር ከሃ ወእጼሊ።

³⁷ ወነሥኦሙ ለጴጥሮስ ወለክልኤቱ ደቂቀ ዘብዴዎስ ወአኀዘ ይተክዝ ወይኅዝን።

³⁸ ወእምዝ ይቤሎሙ ተከዘት ነፍስየ እስከ ለሞት ንበሩ ዝየ ወትግሁ ምስሌየ፤

³⁹ ወተአተተ ሕቀ እምኔሆሙ ወሰገደ በገጹ ወጸለየ ወይቤ አቡየ እመሰ ይትከሀል ይኅልፍ እምኔየ ዝንቱ ጽዋዕ ወባሕቱ ፈቃደ ዚኣከ ይኩን ወአኮ ፈቃደ ዚኣየ።

⁴⁰ወሖረ ኀበ አርዳኢሁ ወረከቦሙ እንዘ ይነውሙ ወይቤሎ ለጴጥሮስ ከመዝኑ ስእንክሙ ተጊሀ አሐተ ሰዓተ ምስሌየ።

⁴¹ትግሁ፥ ወጸልዩ፥ ከመ ኢትባኡ ውስተ መንሱት እስመ መንፈስ ይፈቱ፥ ወሥጋ ይደክም።

⁴²ወካዕበ ሖረ ወጸለየ ወይቤ ኦ አቡየ እመ ይትከሀል[64] ዝንቱ ጽዋዕ ይኅልፍ ዘእንበለ እስተዮ ወባሕቱ ይኩን ፈቃድከ።

⁴³ወገብአ ካዕበ ኀበ አርዳኢሁ ወረከቦሙ እንዘ ይነውሙ እስመ ከብዳ አዕይንቲሆሙ በድቃስ።

⁴⁴ወኀደጎሙ ወሖረ ካዕበ በሣልስ ወጸለየ ኪያሁ ክመ ቃለ እንዘ ይብል።

⁴⁵ወገብአ ካዕበ ኀበ አርዳኢሁ ወይቤሎሙ ኑሙ እንከሰ ወአዕርፉ ናሁ በጽሐ ጊዜሁ ወያገብእዎ ለወልደ ዕጓለ እመሕያው ውስተ እደ ኃጥኣን።

⁴⁶ተንሥኡ፥ ንሑር ናሁ ቀርበ ዘያገብአኒ።

⁴⁷ወእንዘ ዘንተ ይትናገር ናሁ በጽሐ ይሁዳ እምዐሠርቱ ወክልኤቱ አርዳኢሁ ወምስሌሁ መጽኡ ብዙኃን ሰብእ ምስለ መጣብሕ ወዕፀው እምኀቤሆሙ ለሊቃነ ካህናት ወሊቃናተ ሕዝብ።

⁴⁸ወዘያገብኦ ወሀቦሙ ትእምርተ እንዘ ይብል ዘእስዕሞ ውእቱ ኪያሁ አኀዙ።

⁴⁹ወቀርበ ይእተ ጊዜ ይሁዳ ኀበ እግዚእ ኢየሱስ ወሰዐሞ ወይቤሎ በሓ ረቢ።

⁵⁰ ወይቤሎ እግዚእ ኢየሱስ በእንተዝኑ መጻእከ ካልእየ ወእምዝ ቀርቡ ወአንሥኡ እደዊሆሙ ወአኀዝዎ ለእግዚእ ኢየሱስ።

⁵¹ ወናሁ አሐዱ እምእለ ምስሌሁ ለእግዚእ ኢየሱስ ሰፍሐ እዴሁ ወመልሐ መጥባሕቶ ወዘበጦ ለገብረ ሊቀ ካህናት ወመተሮ እዝኖ ዘየማን።[65]

⁵² ወይቤሎ እግዚእ ኢየሱስ አግብኣ ለመጥባሕትከ ውስተ ቤታ እስመ ኵሎሙ እለ መጥባሕተ ያነሥኡ በመጥባሕት ይመውቱ።

⁵³ ይመስለከኑ ዘኢይክል አስተብቍዖቶ ለአቡየ ይፈኑ ሊተ ዘይበዝኁ እምዐሠርቱ ወክልኤቱ ሠራዊተ መላእክት።

⁵⁴ ወእፎ እንከ ይትፌጸም ቃለ መጽሐፍ ዘይቤ እስመ ከመ ዝ ሀለዎ ይኩን።

⁵⁵ ወይቤሎሙ እግዚእ ኢየሱስ ለሕዝብ ሶቤሃ ከመ ሰራቂኑ መጻእክሙ ትዴግኑኒ ወተአኀዙኒ በዕፀው ወበመጣብሕ ወዘልፈ እነብር ምስሌክሙ በምኵራብ ወእሜህር ወኢአኀዝክሙኒ።

⁵⁶ ወዝ ኵሉ ዘኮነ ከመ ይብጻሕ ቃለ ነቢያት ወእምዝ ኵሎሙ አርዳኢሁ ኀደግዎ ወጐዩ።

⁵⁷ ወእለሰ አኀዝዎ ለእግዚእ ኢየሱስ ወሰድዎ ኀበ ቀያፋ ሊቀ ካህናት ወኀበ ተጋብኡ ጸሐፍት ወሊቃናት።

⁵⁸ወተለዎ ጴጥሮስ እምርኁቅ እስከ ዐጸደ ሊቀ ካህናት ወቦአ ውስጠ ወነበረ ምስለ ወዐልት ይርአይ ማኅለቅቶ ለነገር።

⁵⁹ወየኀሥሡ ሊቃነ ካህናት ወጸሐፍት ወሊቃናት ወኵሉ ዐውድ ሰማዕተ ሐሰት በዘይቀትልዎ ለእግዚእ ኢየሱስ ወኢረከቡ ሎቱ ጌጋየ።[66]

⁶⁰ወመጽኡ ብዙኃን ሰማዕተ ሐሰት ወስእኑ ወድኅረ መጽኡ ክልኤቱ።

⁶¹ ወይቤሉ ይቤ ዝንቱ እክል ነሢቶቶ ለቤተ እግዚአብሔር ወበሣልስት ዕለት አሐንጾ።

⁶²ወተንሥአ ሊቀ ካህናት ወይቤሎ ኢትሰምዕኑ፥[67] እንዘ መጠነዝ ያስተዋድዩከ።

⁶³ ወኢያውሥኦ እግዚእ ኢየሱስ ወይቤሎ ሊቀ ካህናት አምሐልኩከ በእግዚአብሔር ሕያው ከመ ትንግረኒ እመ አንተሁ ክርስቶስ ወልዱ ለእግዚአብሔር።

⁶⁴ ወይቤሎ እግዚእ ኢየሱስ አንተ ትቤ ወባሕቱ እብለክሙ እምይእዜሰ ትሬእይዎ ለወልደ ዕጓለ እመሕያው እንዘ ይነብር በየማነ ኀይል ወእንዘ ይመጽእ በደመና ሰማይ።

⁶⁵ ወሶቤሃ ሠጠጠ አልባሲሁ ሊቀ ክህናት እንዘ ይብል ምንተ እንከ ትፈቅዱ ሎቱ ሰማዕተ ናሁ ፀረፈ ወሰማዕክሙ ጽርፈቶ ምንተ እንከ ትብሉ፤

⁶⁶ ወአውሥኡ ወይቤሉ ዝንቱ ድልው ለሞት።

⁶⁷ ወእምዝ ወረቁ ውስተ ገጹ ወኰርዕዎ ርእሶ በኅለት ወጸፍዕዎ እንዘ ይብሉ።

⁶⁸ተነበይ ለነ ክርስቶስ መኑ ውእቱ ዘጸፍዐከ።

⁶⁹ ወጴጥሮስሰ ይነብር አፍኣ ውስተ ዐጸድ ወመጽአት አሐቲ ወለት ወትቤሎ አንተሂ ምስለ ኢየሱስ ገሊላዊ ሀለውከ።

⁷⁰ወክሕደ በቅድመ ኵሉ እንዘ ይብል ኢየአምሮ ለዘትብሊ።

⁷¹ወወፂኦ ኆኅተ ርእየቶ ካልእት ወትቤሎሙ ለእለ ይቀውሙ ህየ ዝኒ ሀሎ ምስለ ኢየሱስ ናዝራዊ።

⁷²ወክሕደ ካዕበ ወመሐለ ከመ ኢየአምሮ ለውእቱ ብእሲ።

⁷³ወጐንድዮ ሕቀ መጽኡ እለ ይቀውሙ ወይቤልዎ ለጴጥሮስ አማን አንተሂ እምኔሆሙ አንተ ወነገርከ ያዐውቀከ።

⁷⁴ወሶቤሃ መሐለ ወተረግመ ከመ ኢየአምሮ ለውእቱ ብእሲ ወበጊዜሃ ነቀወ ዶርሆ።

⁷⁵ወተዘከረ ጴጥሮስ ቃሎ ለእግዚእ ኢየሱስ ዘይቤሎ ሥልሰ ትክሕደኒ ዘእንበለ ይንቁ ዶርሆ ወወፅአ አፍኣ ወበከየ ብካየ መሪረ።