Read Ge'ez NT – ሐዲስ ኪዳን በልሳነ ግእዝ ወንጌል ዘማቴዎስ 27 Bible Online

ወንጌል ዘማቴዎስ 27 - Ge'ez NT – ሐዲስ ኪዳን በልሳነ ግእዝ bible

ወንጌል ዘማቴዎስ 27

¹ ወጸቢሖ ተማከሩ ሊቃነ ካህናት ወረበናተ ሕዝብ ይቅትልዎ ለእግዚእ ኢየሱስ።

²ወአሲሮሙ ወሰድዎ፥ ወመጠውዎ ለጲላጦስ ጰንጤናዊ መልአከ አሕዛብ።

³ ወእምዝ ሶበ ርእየ ይሁዳ ዘአግብኦ ከመ አርስሕዎ ነስሐ ወአግብአ ውእተ ሠላሳ ብሩረ ለሊቃነ ካህናት ወለሊቃናተ ሕዝብ[68] እንዘ ይብል አበስኩ ዘአግባእኩ ደመ ንጹሐ ወዘአቅተልኩ ጻድቀ።

⁴ወይቤልዎ ሚ ላዕሌነ ወሚ ላዕሌከ[69] ለሊከ አእምር።

⁵ ወገደፈ ውእተ ብሩረ ውስተ ምኵራብ ወሖረ ወተሐንቀ ወሞተ።[70]

⁶ ወነሥኡ ሊቃነ ካህናት ውእተ ብሩረ ወይቤሉ ኢይደልወነ ንደዮ ውስተ ቤተ መባእ እስመ ሤጠ ደም ውእቱ።

⁷ ወተማኪሮሙ ተሣየጡ ቦቱ ገራህተ ለብሓዊ ለመቃብረ እንግዳ።

⁸ወተሰምየ ውእቱ ገራህት ገራህተ ደም እስከ ዮም።

⁹ ወይእተ አሚረ በጽሐ ቃለ ኤርምያስ ነቢይ ዘይቤ «ነሥኡ ሠላሳ ብሩረ ሤጦ ለክቡር ዘአክበርዎ ደቂቀ እስራኤል።

¹⁰ወወሀብዎ ለገራህተ ለብሓዊ በከመ አዘዘኒ እግዚአብሔር።»

¹¹ ወቆመ እግዚእ ኢየሱስ ቅድሜሁ ለመልአከ አሕዛብ ወተስእሎ መልአከ አሕዛብ ወይቤሎ አንተሁ ንጉሦሙ ለአይሁድ ወይቤሎ እግዚእ ኢየሱስ አንተ ትቤ።

¹² ወእንዘ ያስተዋድይዎ ሊቃነ ካህናት ወሊቃውንተ ሕዝብ አልቦ ዘተሰጥዎሙ ወኢምንተሂ።

¹³ወእምዝ ይቤሎ ጲላጦስ ኢትሰምዕኑ እንዘ መጠነ ዝ ያስተዋድዩከ።

¹⁴ወኢያውሥኦ ወኢአሐተኒ ቃለ እስከ ያነክር መልአክ።

¹⁵ወቦ ልማድ ለመስፍን ለለ በዓል ያሕዩ ሎሙ ለሕዝብ አሐደ እምነ ሙቁሓን ዘፈቀዱ።

¹⁶ወቦ አሜሃ ሙቁሕ ዘስሙ በርባን ስሙዕ ወየአምሮ ኵሉ ሰብእ።

¹⁷ወእንዘ ጉቡኣን እሙንቱ ይቤሎሙ ጲላጦስ ለሕዝብ መነ ትፈቅዱ አሕዩ ለክሙ በርባንሃኑ ወሚመ ኢየሱስሃ ዘይብልዎ ክርስቶስ።

¹⁸እስመ የአምር ከመ በቅንአቶሙ አግብእዎ።

¹⁹ወእንዘ ይነብር ጲላጦስ ዐውደ ለአከት ኀቤሁ ብእሲቱ እንዘ ትብል ዑቅአ ኢተአብስ ላዕለ ውእቱ ጻድቅ እስመ ብዙኀ ሐመምኩ በዛቲ ሌሊት በሕልምየ በእንቲኣሁ።

²⁰ወሊቃነ ካህናትሰ ወረበናት ኄጥዎሙ ለሕዝብ ወኦሆ አበልዎሙ ይስአሉ ከመ በርባንሃ ያሕዩ ሎሙ ወኢየሱስሃ ይስቅሉ።

²¹ወአውሥአ መስፍን ወይቤሎሙ መነ ትፈቅዱ እምክልኤሆሙ አሕዩ ለክሙ ወይቤሉ በርባንሃ።

²²ወይቤሎሙ ጲላጦስ ምንተ እንከ እረስዮ ለኢየሱስ ዘተብህለ ክርስቶስ ወይቤሉ ኵሎሙ ስቅሎ።

²³ወይቤሎሙ መስፍን ምንተ እኩየ ገብረ ወአፈድፈዱ ጸሪሐ እንዘ ይብሉ ስቅሎ ስቅሎ።

²⁴ ወእምዝ ሶበ ርእየ ጲላጦስ ከመ አልቦ ዘይበቍዕ ዘእንበለ ዳዕሙ ዘይበዝኅ ሀከክ ነሥአ ማየ ወተኀፅበ እዴሁ በቅድሜሆሙ ለሕዝብ እንዘ ይብል ንጹሕ አነ እምደሙ ለዝ ብእሲ ጻድቅ ወአንትሙ ለሊክሙ አእምሩ።

²⁵ ወአውሥኡ ወይቤሉ ኵሎሙ ሕዝብ ደሙ ላዕሌነ ወላዕለ ውሉድነ።

²⁶ወእምዝ አሕየወ ሎሙ በርባንሃ ወቀሠፎ ለእግዚእ ኢየሱስ ወመጠዎሙ ይስቅልዎ።

²⁷ ወእምዝ ነሥእዎ መስተራትዓተ ሐራ ለእግዚእ ኢየሱስ ወወሰድዎ ውስተ ዐውደ ምኵናን ወአስተጋብኡ ላዕሌሁ ኵሎ ሠርዌ ሐራ።

²⁸ወአእተቱ አልባሲሁ ወአልበስዎ ከለሜዳ ዘለይ።

²⁹ወጸፈሩ አክሊለ ዘሦክ ወአስተቀጸልዎ ዲበ ርእሱ ወአስተአኀዝዎ ኅለተ በየማኑ ወአስተብረኩ ቅድሜሁ ወተሣለቁ ላዕሌሁ ወይቤልዎ በሓ ንጉሠ አይሁድ።

³⁰ ወይወርቁ ላዕሌሁ ወይኰርዕዎ ርእሶ በኅለት።

³¹ወተሣሊቆሙ ላዕሌሁ ሰለብዎ ውእተ ከለሜዳ ዘለይ ወአልበስዎ አልባሲሁ ወወሰድዎ ይስቅልዎ።

³² ወእንዘ ይወፅኡ ረከቡ ብእሴ ቀሬናዌ ዘስሙ ስምዖን[71] ወዐበጥዎ ይጹር መስቀሎ።

³³ ወበጺሖሙ ብሔረ ዘስሙ ጎልጎታ ዘበትርጓሜሁ ቀራንዮ።

³⁴ ወወሀብዎ ይስተይ ወይነ ወሐሞተ ድሙረ ወጥዒሞ አበየ ሰትየ።

³⁵ ወእምዝ ሰቀልዎ ወተካፈሉ አልባሲሁ ወተዐፀዉ ላዕሌሁ ከመ ይትፈጸም ቃለ መጽሐፍ ዘይቤ «ተካፈሉ አልባስየ ለርእሶሙ ወተዐፀዉ ዲበ ዐራዝየ።»

³⁶ወነበሩ የዐቅብዎ ህየ።

³⁷ወአንበሩ መልዕልተ ርእሱ ጽሒፎሙ መጽሐፈ ጌጋዩ ዘይብል ዝንቱ ውእቱ ኢየሱስ ንጉሦሙ ለአይሁድ።

³⁸ ወእምዝ ሰቀሉ ምስሌሁ ክልኤተ ፈያተ አሐደ በየማኑ ወአሐደ በፀጋሙ።

³⁹ ወእለሂ የኀልፉ ይፀርፉ ላዕሌሁ እንዘ የሐውሱ ርእሶሙ።

⁴⁰ ወይብሉ ኦ ዘይነሥቶ ለቤተ መቅደስ ወበሠሉስ ዕለት የሐንጾ አድኅን ርእሰከ እመሰ ወልደ እግዚአብሔር አንተ ረድ እስኩ እመስቀልከ።

⁴¹ወከማሁ ሊቃነ ካህናትሂ ይሣለቁ ምስለ ጸሐፍት ወሊቃናት እንዘ ይብሉ።

⁴²ባዕደ ያድኅን ወርእሶ ኢይክል አድኅኖ እመሰ ንጉሠ እስራኤል ውእቱ ለይረድኬ ይእዜ እመስቀሉ ንርአይ ወንእመን ቦቱ።

⁴³ ወለእመ ተአመነ በእግዚአብሔር ናሁ ይእዜ ለያድኅኖ እመ ይፈቅዶ እስመ ይብል ወልደ እግዚአብሔር አነ።

⁴⁴ ወከማሁ ፈያትኒ እለ ተሰቅሉ ምስሌሁ ይዘነጕጕዎ።

⁴⁵ወእምጊዜ ስሱ ሰዓት ጸልመ ኵሉ ዓለም እስከ ተስዐቱ ሰዓት።

⁴⁶ ወጊዜ ተስዐቱ ሰዓት ጸርሐ እግዚእ ኢየሱስ በዐቢይ ቃል እንዘ ይብል ኤሎሄ ኤሎሄ ኤልማስ[72] ላማ ሰበቅታኒ ዝ ውእቱ ብሂል አምላኪየ አምላኪየ ለምንት ኀደገኒ።

⁴⁷ወሰሚዖሙ እለ ይቀውሙ ህየ ይቤሉ ዝሰ ኤልያስሃ ይጼውዕ።

⁴⁸ ወውእተ ጊዜ ሮጸ አሐዱ እምኔሆሙ ወነሥአ ሰፍነገ ወመልአ ብሒአ ወአሰረ ውስተ ኅለት ወአሕዘዞ ውስተ አፉሁ።

⁴⁹ወቦ እለ ይቤሉ ኅድጉ ንርአይ ለእመ ይመጽእ ኤልያስ ያድኅኖ።

⁵⁰ ወጸርሐ ካዕበ እግዚእ ኢየሱስ በዐቢይ ቃል ወወፅአት መንፈሱ ሶቤሃ።

⁵¹ ወተሠጠ መንጦላዕተ ቤተ መቅደስ እምላዕሉ እስከ ታሕቱ ወኮነ ለክልኤ ክፍል ወአድለቅለቀት ምድር ወነቅዐ ኰኵሕ።

⁵²ወተከሥቱ መቃብራት ወተንሥኡ ብዙኃን እምአብድንቲሆሙ[73] ለጻድቃን።

⁵³ወወፅኡ እመቃብሪሆሙ ወቦኡ ውስተ ሀገር ቅድስት እምድኅረ ተንሥኡ ወአስተርአይዎሙ ለብዙኃን።

⁵⁴ወመኰንነ ምእትሰ ወእለ ምስሌሁ የዐቅብዎ ለእግዚእ ኢየሱስ ርእዮሙ ውእተ ድልቅልቀ ዘኮነ ፈርሁ ጥቀ ወይቤሉ አማን ወልደ እግዚአብሔር ውእቱ ዝንቱ።

⁵⁵ ወሀለዋ ህየ ብዙኃት አንስት እለ ይሬእያ እምርኁቅ ኵሎ ዘኮነ ወውእቶን እለ ተለዋሁ ለእግዚእ ኢየሱስ እምገሊላ ከመ ይትለአካሁ።

⁵⁶ወእማንቱ ማርያም መግደላዊት ወማርያም እንተ ያዕቆብ ወእሙ ለዮሳ ወእሞሙ ለደቂቀ ዘብዴዎስ።

⁵⁷ ወመስዮ መጽአ ብእሲ ባዕል እምአርማትያስ ዘስሙ ዮሴፍ ወውእቱሂ ይፀመዶ ለእግዚእ ኢየሱስ።

⁵⁸ወሖረ ኀበ ጲላጦስ ወሰአለ ሥጋሁ[74] ለእግዚእ ኢየሱስ ወአዘዘ ጲላጦስ የሀብዎ።

⁵⁹ወነሢኦ ዮሴፍ ሥጋሁ ለእግዚእ ኢየሱስ ገነዞ በሰንዱናት ንጹሕ።

⁶⁰ ወቀበሮ ውስተ መቃብር ሐዲስ ዘሎቱ አውቀረ ውስተ ኰኵሕ ወአንኰርኰረ እብነ ዐቢየ ወአንበረ ውስተ አፈ መቃብር ወኀለፈ።

⁶¹ወሀለዋ ህየ ማርያም መግደላዊት ወካልእታሂ ማርያም ይነብራ ቅድመ መቃብር።

⁶²ወበሳኒታ እንተ ይእቲ እምድኅረ ዐርብ ተጋብኡ ሊቃነ ካህናት ወፈሪሳውያን ኀበ ጲላጦስ።

⁶³ ወይቤልዎ ተዘከርነ እግዚኦ ዘይቤ ዝኩ መስሐቲ አመ ሕያው ውእቱ አመ ሣልስት ዕለት እትነሣእ።

⁶⁴አዝዝ እንከ ይዕቀቡ መቃብሪሁ እስከ ሠሉስ መዋዕል ከመ ኢይምጽኡ አርዳኢሁ ሌሊተ ወኢይስርቅዎ ወኢይበሉ ለሕዝብ ተንሥአ እሙታን ወትከውን ደኃሪት ጌጋዩ እንተ ተአኪ እምቀዳሚት።

⁶⁵ወይቤሎሙ ጲላጦስ ንሥኡ ሠገራተ ወሑሩ ወአጽንዑ መቃብሮ በከመ ተአምሩ።

⁶⁶ ወሖሩ ወቀተሩ ወአጽንዑ መቃብሮ ወኀተምዋ ለይእቲ እብን ምስለ ሠገራት።