Read Ge'ez NT – ሐዲስ ኪዳን በልሳነ ግእዝ ወንጌል ዘማቴዎስ 4 Bible Online

ወንጌል ዘማቴዎስ 4 - Ge'ez NT – ሐዲስ ኪዳን በልሳነ ግእዝ bible

ወንጌል ዘማቴዎስ 4

¹ ወእምዝ ወሰዶ መንፈስ ለእግዚእ ኢየሱስ ገዳመ ከመ ይትመከር እምኀበ ዲያብሎስ።

² ወጾመ አርብዓ መዓልተ ወአርብዓ ሌሊተ ወእምድኅረ ዝ ርኅበ።

³ወቀርበ ዘያሜክሮ ወይቤሎ እመሰ ወልደ እግዚአብሔር አንተ በል ከመ እላ አእባን ኅብስተ ይኩና።

⁴ ወአውሥአ እግዚእ ኢየሱስ ወይቤሎ ጽሑፍ «ከመ አኮ በኅብስት ክመ ዘየሐዩ ሰብእ አላ በኵሉ ቃል ዘይወፅእ እምአፉሁ ለእግዚአብሔር።»

⁵ወእምዝ ነሥኦ ዲያብሎስ ወወሰዶ ውስተ ቅድስት ሀገር ወአቀሞ ውስተ ተድባበ ቤተ መቅደስ።

⁶ ወይቤሎ እመሰ አማን ወልደ እግዚአብሔር አንተ ቅንጽ እምዝየ[8] ወተወረው ታሕተ እስመ ጽሑፍ «ከመ ለመላእክቲሁ ይኤዝዞሙ በእንቲኣከ ከመ ይዕቀቡከ በኵሉ ፍናዊከ ወበእደዊሆሙ ያነሥኡከ ከመ ኢትትዐቀፍ በእብን እግርከ።»

⁷ ወአውሥአ እግዚእ ኢየሱስ ወይቤሎ ካዕበ ጽሑፍ «ኢታመክሮ ለእግዚአብሔር አምላክከ።»

⁸ወእምዝ ነሥኦ ዲያብሎስ[9] ውስተ ደብር ነዋኅ ጥቀ ወአርአዮ ኵሎ መንግሥታተ ዓለም ወኵሎ ክብሮሙ።

⁹ወይቤሎ ዘንተ ኵሎ እሁበከ እምከመ ሰገድከ ሊተ ወአማኅከኒ።

¹⁰ወእምዝ ይቤሎ እግዚእ ኢየሱስ ሑር እምድኅሬየ ሰይጣን ጽሑፍ ለእግዚአብሔር አምላክከ ትስግድ ወኪያሁ ባሕቲቶ ታምልክ።

¹¹ ወእምዝ ኀደጎ ዲያብሎስ ወናሁ መላእክት መጽኡ ይትለአክዎ።

¹² ወሰሚዖ እግዚእ ኢየሱስ ከመ አኀዝዎ ለዮሐንስ ተግኅሠ ውስተ ደወለ ገሊላ።

¹³ወኀደጋ ለናዝሬት ወመጺኦ ኀደረ ቅፍርናሆም እንተ መንገለ ባሕር ውስተ አድባረ ዛብሎን ወንፍታሌም።

¹⁴ከመ ይትፈጸም ዘተብህለ በኢሳይያስ ነቢይ እንዘ ይብል።

¹⁵ «ምድረ ዛብሎን ወምድረ ንፍታሌም ፍኖተ ባሕር ማዕዶተ ዮርዳኖስ (ጰራልዩ ወጰራልያስ) ወገሊላ ዘአሕዛብ።

¹⁶ ሕዝብ ዘይነብር ውስተ ጽልመት ርእየ ብርሃነ ዐቢየ ወለእለሂ ይነብሩ ውስተ ጽልመት ወጽላሎተ ሞት ብርሃን ሠረቀ ሎሙ።»

¹⁷ወእምይእቲ ዕለት አኀዘ እግዚእ ኢየሱስ ይስብክ፥ ወይበል ነስሑ እስመ ቀርበት መንግሥተ ሰማያት።

¹⁸ ወእንዘ ያንሶሱ መንገለ ባሕረ ገሊላ ርእየ ክልኤተ አኀወ ስምዖንሃ ዘተሰምየ ጴጥሮስ ወእንድርያስሃ እኅዋሁ እንዘ ይወድዩ መርበብቶሙ ውስተ ባሕር እስመ መሠግራን እሙንቱ።

¹⁹ ወይቤሎሙ እግዚእ ኢየሱስ ንዑ ትልዉኒ ድኅሬየ ወእሬስየክሙ ትኩኑ መሠግራነ ሰብእ።

²⁰ወበጊዜሃ ኀደጉ መሣግሪሆሙ ወተለውዎ።

²¹ወኀሊፎ ሕቀ እምህየ ርእየ ካልኣነ ክልኤተ አኀወ ያዕቆብሃ ወልደ ዘብዴዎስ ወዮሐንስሃ እኅዋሁ ውስተ ሐመር ምስለ ዘብዴዎስ አቡሆሙ እንዘ ይሠርዑ ወያስተሣንዩ[10] መሣግሪሆሙ ወጸውዖሙ።

²²ወበጊዜሃ ኀደጉ ሐመሮሙ ወዘብዴዎስሃ አባሆሙ ወተለውዎ።

²³ ወአንሶሰወ እግዚእ ኢየሱስ ውስተ ኵሉ ገሊላ እንዘ ይሜህር በምኵራባቲሆሙ ወይሰብክ ወንጌለ መንግሥት ወይፌውስ ኵሎ ደዌ ወኵሎ ሕማመ ዘውስተ ሕዝብ።

²⁴ ወወፅአ ስሙዓተ ነገሩ ውስተ ኵላ ሶርያ ወአምጽኡ ኀቤሁ ኵሎ ድውያነ[11] ወኵሎ ሕሙማነ ዘለለ ዚኣሁ ሕማሞሙ ወጽዑራነ ወእለሂ ቦሙ አጋንንት ወወርኃውያነ ወእለሂ ነገርጋር ወመፃጕዓነ ወአሕየዎሙ ለኵሎሙ።

²⁵ወተለውዎ ብዙኃን አሕዛብ እምገሊላ ወእምዐሥሩ አህጉር ወእምኢየሩሳሌም ወእምይሁዳ ወእማዕዶተ ዮርዳኖስ።