Read Ge'ez NT – ሐዲስ ኪዳን በልሳነ ግእዝ ወንጌል ዘማቴዎስ 6 Bible Online

ወንጌል ዘማቴዎስ 6 - Ge'ez NT – ሐዲስ ኪዳን በልሳነ ግእዝ bible

ወንጌል ዘማቴዎስ 6

¹ ወባሕቱ ዑቁ ምጽዋተክሙ ኢትግበሩ ለዐይነ ሰብእ ከመ ታስተርእዩ ሎሙ ወእመ አኮሰ ዐስብ አልብክሙ በኀበ አቡክሙ ዘበሰማያት።

²ወሶበሂ ትገብሩ ምጽዋተክሙ ኢትንፍሑ ቀርነ ቅድሜክሙ በከመ ይገብሩ መደልዋን በመኳርብት ወበአስኳት ወበፍናው ከመ ይትአኰቱ እምኀበ ሰብእ አማን እብለክሙ ኀጕሉ ዕሴቶሙ።

³ ወአንተሰ ሶበ ትገብር ምጽዋተከ ኢታእምር ፀጋምከ ዘትገብር የማንከ።

⁴ ከመ በኅቡእ ይኩን ምጽዋትከ ወአቡከ ዘይሬእየከ በኅቡእ የዐስየከ ክሡተ።

⁵ወሶበሂ ትጼልዩ ኢትኩኑ ከመ መደልዋን እስመ እሙንቱ ያፈቅሩ ቀዊመ ወጸልዮ በመኳርብት ወውስተ መዓዝነ መራሕብት ከመ ያስተርእዩ ለሰብእ አማን እብለክሙ ኀጕሉ ዕሴቶሙ።

⁶ ወአንተሰ ሶበ ትጼሊ ባእ ቤተከ ወዕፁ ኆኅተከ ወጸሊ ለአቡከ ሰማያዊ በኅቡእ ወአቡከ ዘይሬእየከ በኅቡእ የዐስየከ ክሡተ።

⁷ወእንዘ ትጼልዩ ኢትዘንግዑ ከመ አሕዛብ እስመ ይመስሎሙ በአብዝኆ ንባቦሙ ዘይሰምዖሙ።

⁸ኢትትመሰልዎሙኬ እስመ የአምር አቡክሙ ሰማያዊ ዘትፈቅዱ ዘእንበለ ትስአልዎ።

⁹ አንትሙሰ ሶበ ትጼልዩ ከመዝ በሉ አቡነ ዘበሰማያት ይትቀደስ ስምከ።

¹⁰ ትምጻእ መንግሥትከ ወይኩን ፈቃድከ በከመ በሰማይ ከማሁ በምድር።

¹¹ ሲሳየነ ዘለለ ዕለትነ ሀበነ ዮም።

¹² ኅድግ ለነ አበሳነ ወጌጋየነ ከመ ንሕነኒ ንኅድግ ለዘአበሰ ለነ።

¹³ኢታብአነ እግዚኦ ውስተ መንሱት አላ አድኅነነ ወባልሐነ እምኵሉ እኩይ እስመ ዚኣከ ይእቲ መንግሥት ኀይል ወስብሐት ለዓለመ ዓለም አሜን።

¹⁴ እስመ ለእመ ኀደግሙ ለሰብእ አበሳሆሙ የኀድግ ለክሙኒ አቡክሙ ሰማያዊ አበሳክሙ።

¹⁵ወእመሰ ኢኀደግሙ ለሰብእ አበሳሆሙ አቡክሙኒ ሰማያዊ ኢየኀድግ አበሳክሙ።

¹⁶ ወሶበሂ ትጸውሙ ኢትኩኑ ከመ መደልዋን እስመ እሙንቱ ይትመጸለዉ ወይቈጽሩ ገጾሙ ወያማስኑ ከመ ያእምር ሰብእ ከመ ጾሙ አማን እብለክሙ ነሥኡ ዕሴቶሙ።

¹⁷ወአንትሙሰ ሶበ ትጸውሙ ቅብዑ ርእሰክሙ ወኀጽቡ ገጸክሙ።

¹⁸ከመ ኢያእምር ሰብእ ከመ ጾምክሙ ዘእንበለ አቡክሙ ዘበሰማያት ዘበኅቡእ ወአቡክሙ ዘይሬእየክሙ በኅቡእ የዐስየክሙ ክሡተ።

¹⁹ ኢትዝግቡ ለክሙ መዝገበ ዘበምድር ኀበ ይበሊ ወይማስን ወኀበ ፃፄ ወቍንቍኔ ያማስኖ ወኀበ ሰረቅት ይከርዩ ወይሰርቅዎ።

²⁰ ዝግቡ ለክሙ መዝገበ ዘበሰማያት ኀበ ኢይበሊ ወኢይማስን ወኀበ ኢያማስኖ ፃፄ ወቍንቍኔ ወኀበ ሰረቅት ኢይከርዩ ወኢይሰርቅዎ።

²¹እስመ ኀበ ሀሎ መዝገብክሙ ህየ ይሄሉ ልብክሙኒ።

²²ማኅቶቱ ለሥጋከ ዐይንከ ውእቱ እምከመ ዐይንከ ብሩህ ወስፉሕ ውእቱ ኵሉ ሥጋከ ብሩሀ ይከውን።

²³ ወእመሰ ዐይንከ ሐማሚ ኵሉ ሥጋከ ጽልመተ ይከውን ወሶበ ብርሃን ዘላዕሌከ ጽልመት ውእቱ ጽልመትከ እፎ ብርሃነ ይከውነከ።[20]

²⁴ ኢይክል አሐዱ ገብር ተቀንዮ ለክልኤ አጋዕዝት ወእመ አኮሰ አሐደ ይጸልእ ወካልኦ ያፈቅር ወእመአኮ ለአሐዱ ይትኤዘዝ ወለካልኡ ኢይትኤዘዝ ኢትክሉኬ ተቀንዮ ለእግዚአብሔር ወለንዋይ።

²⁵ ወበእንተዝ እብለክሙ ኢትተክዙ ለነፍስክሙ ዘትበልዑ ወዘትሰትዩ ወኢ ለሥጋክሙ ዘትለብሱ አኮሁ ነፍስ ተዐፅብ እምሲሲት ወሥጋ የዐፅብ እምዐራዝ።

²⁶ ነጽሩ አዕዋፈ ሰማይ እለ ኢይዘርዑ ወኢየአርሩ ወኢያስተጋብኡ ውስተ አብያት ወአቡክሙ ሰማያዊ ይሴስዮሙ አኮኑ አንትሙ ፈድፋደ ትኄይስዎሙ።

²⁷መኑ እምኔክሙ በተክዞ ዘይክል ወስኮ አሐደ እመተ በዲበ ቆሙ ወበእንተ አራዝኒ ምንተኑ ትኄልዩ።

²⁸ርእዩ ጽጌያተ ገዳም ዘከመ ይልህቁ እንዘ ኢይጻምዉ ወኢይፈትሉ።

²⁹ እብለክሙ ከመ ሰሎሞን ጥቀ በኵሉ ክብሩ ኢለብሰ ከመ አሐዱ እምእሉ።

³⁰ ወናሁ ሣዕረ ገዳም ዘዮም ሀሎ ወጌሠመ ውስተ እቶነ እሳት ይትወደይ ወእግዚአብሔር ዘከመዝ ያለብሶ እፎ እንከ ፈድፋደ ኪያክሙ ኦ ሕጹጻነ ሃይማኖት።

³¹ኢትተክዙኬ እንከ እንዘ ትብሉ ምንተ ንበልዕ ወምንተ ንሰቲ ወምንተ ንትከደን።

³²እስመ ዘንተሰ ኵሎ አሕዛበ ዓለም ዘአፍኣ የኀሥሥዎ ወለክሙሰ የአምር አቡክሙ ሰማያዊ ዘከመ ትፈቅዱ ዘንተ ኵሎ።

³³ አንትሙሰ ኅሡ መቅድመ መንግሥቶ ወጽድቆ ወዝንቱሰ ኵሉ ይትዌሰከክሙ።

³⁴ ኢትተክዙኬ ወኢተበሉ ለጌሠም እስመ ጌሠምሰ ትኄሊ ለርእሳ የአክላ ለዕለት እከያ ወስራሓ።