Read Ge'ez NT – ሐዲስ ኪዳን በልሳነ ግእዝ ወንጌል ዘማቴዎስ 7 Bible Online

ወንጌል ዘማቴዎስ 7 - Ge'ez NT – ሐዲስ ኪዳን በልሳነ ግእዝ bible

ወንጌል ዘማቴዎስ 7

¹ ኢትኰንኑ ከመ ኢትትኰነኑ።

² እስመ በኵነኔ ዘኰነንክሙ ትትኴነኑ አንትሙ ወበመስፈርት ዘሰፈርክሙ ይሰፍሩ ለክሙ።

³ለምንት ትሬኢ ሐሠረ ዘውስተ ዐይነ እኁከ ወኢትሬኢ ሠርዌ ዘውስተ ዐይንከ ኢታቤይንኑ።

⁴ወእፎ ትብሎ ለእኁከ ኅድገኒ አውፅእ ሐሠረ እምውስተ ዐይንከ ወናሁ ሠርዌ ውስተ ዐይንከ።

⁵ኦ መደልው አውፅእ ቅድመ ሠርዌ እምውስተ ዐይንከ ወእምዝ ትሬኢ ለአውፅኦ ሐሠር ዘውስተ ዐይነ እኁከ።

⁶ ኢተሀቡ ቅድሳተ ለከለባት ወኢትደዩ ባሕርየክሙ ቅድመ አሕርው ከመ ኢይኪድዎ በእገሪሆሙ ወተመዪጦሙ ይነፅኁክሙ።

⁷ ሰአሉ ወይትወሀበክሙ ኅሡ ወትረክቡ ጐድጕዱ ወይትረኀወክሙ።

⁸እስመ ኵሉ ዘሰአለ ይነሥእ ወዘሂ ኀሠሠ ይረክብ ወለዘሂ ጐድጐደ ይትረኀዎ።

⁹መኑ ውእቱ እምኔክሙ ብእሲ ዘይስእሎ ወልዱ ኅብስተ ወእብነ ይሁቦ።

¹⁰ወእመሂ ዓሣ ሰአሎ አርዌ ምድርኑ ይሁቦ።[21]

¹¹ ወሶበ እንከ እንዘ እኩያን አንትሙ ተአምሩ ሠናየ ሀብተ ውሂበ ለውሉድክሙ እፎ ፈድፋደ አቡክሙ ዘበሰማያት ይሁብ ሠናየ ለእለ ይስእልዎ።

¹² ኵሎኬ ዘትፈቅዱ ይግበሩ ለክሙ ሰብእ ከማሁ ግበሩ ሎሙ አንትሙኒ እስመ ከማሁ ውእቱ ኦሪትኒ ወነቢያትኒ።

¹³ ባኡ እንተ ጸባብ አንቀጽ እስመ ረሓብ አንቀጽ ወስፍሕት ፍኖት እንተ ትወስድ ውስተ ኀጕል ወብዙኃን እሙንቱ እለ ይበውኡ ውስቴታ።

¹⁴ ጥቀ ጸባብ አንቀጽ ወጽዕቅት ፍኖት እንተ ትወስድ ውስተ ሕይወት ወውኁዳን እሙንቱ እለ ይበውእዋ።

¹⁵ ተዐቀቡኬ እምሐሳውያን ነቢያት እለ ይመጽኡ ኀቤክሙ በአልባሰ አባግዕ ወእንተ ውስጦሙሰ ተኵላት መሠጥ እሙንቱ።

¹⁶ ወእምፍሬሆሙ ተአምርዎሙ ይቀሥሙሁ እምአሥዋክ አስካለ ወእምአሜከላ በለሰ።

¹⁷ከማሁኬ ኵሉ ዕፅ ሠናይ ፍሬ ሠናየ ይፈሪ ወእኩይሰ ዕፅ ፍሬ እኩየ ይፈሪ።

¹⁸ኢይክል ዕፅ ሠናይ ፍሬ እኩየ ፈርየ ወኢዕፅ እኩይ ፍሬ ሠናየ ፈርየ።

¹⁹ ኵሉ ዕፅ ዘኢይፈሪ ፍሬ ሠናየ ይገዝምዎ ወውስተ እሳት ይወድይዎ።

²⁰ወእምፍሬሆሙ እንከ ተአምርዎሙ።

²¹ አኮ ኵሉ ዘይብለኒ እግዚኦ እግዚኦ ዘይበውእ ውስተ መንግሥተ ሰማያት ዘእንበለ ዘይገብር ፈቃዶ ለአቡየ ዘበሰማያት።

²² ወብዙኃን ይብሉኒ በይእቲ ዕለት እግዚኦ እግዚኦ አኮኑ በስምከ ተነበይነ ወበስምከ አጋንንተ አውፃእነ ወበስምከ ኀይላተ ብዙኀ ገበርነ።

²³ ወይእተ ጊዜ እብሎሙ ግሙራ ኢየአምረክሙ ረኀቁ እምኔየ ኵልክሙ እለ ትገብሩ ዐመፃ።

²⁴ ኵሉኬ ዘይሰምዕ ዘንተ ቃልየ ወይገብሮ ይመስል ብእሴ ጠቢበ ዘሐነጸ ቤቶ ዲበ ኰኵሕ።

²⁵ዘንሙ ዝናማት ወውኅዙ ወኀይዝት ወነፍሑ ነፋሳት ወገፍዕዎ ለውእቱ ቤት ወኢወድቀ እስመ ዲበ ኰኵሕ ተሣረረ።

²⁶ወኵሉ ዘይሰምዕ ዘንተ ቃልየ ወኢይገብሮ ይመስል ብእሴ አብደ ዘሐነጸ ቤቶ ዲበ ኆፃ።

²⁷ ዘንሙ ዝናማት ወውኅዙ ወኀይዝት ወነፍሑ ነፋሳት ወገፍዕዎ ለውእቱ ቤት ወወድቀ ወኮነ ድቀቱ ዐቢየ።

²⁸ ወሶበ ፈጸመ እግዚእ ኢየሱስ ዘንተ ነገረ ተደሙ አሕዛብ ወአንከሩ ምህሮቶ።

²⁹ እስመ ከመ መኰንን ይሜህሮሙ ወአኮ ከመ ጸሐፍቶሙ።